'എന്നെ ദേശസ്നേഹം പഠിപ്പിക്കേണ്ട, ഞാൻ സ്വാതന്ത്ര്യസമര സേനാനിയുടെ മകൻ'; വന്ദേമാതരം വിവാദത്തിൽ ബിജെപിക്ക് കെ. മുരളീധരന്റെ മറുപടി

കാസർകോട്: മുള്ളേരിയ കുടുംബാരോഗ്യ കേന്ദ്രത്തിലെ പരിപാടിക്കിടെ വന്ദേമാതരം ആലപിച്ചതുമായി ബന്ധപ്പെട്ട വിവാദത്തിൽ ബിജെപിക്ക് മറുപടിയുമായി ആരോഗ്യ മന്ത്രി കെ. മുരളീധരൻ. 'എന്നെ ആരും ദേശസ്നേഹം പഠിപ്പിക്കേണ്ട. ഞാൻ സ്വാതന്ത്ര്യസമര സേനാനിയുടെ മകനാണ്' എന്ന് മന്ത്രി തുറന്നടിച്ചു. സംസ്ഥാന സർക്കാരിന്റെ ഔദ്യോഗിക പരിപാടിയിൽ ബിജെപിയുടെ അജണ്ട നടപ്പാക്കാൻ അനുവദിക്കില്ലെന്നും ബിജെപി നിയമനടപടിയുമായി മുന്നോട്ടുപോയാൽ അതിനെ നേരിടാൻ തയ്യാറാണെന്നും അദ്ദേഹം വ്യക്തമാക്കി.

പരിപാടിയുടെ ഔദ്യോഗിക അജണ്ടയിൽ ഈശ്വരപ്രാർത്ഥന മാത്രമായിരുന്നു ഉണ്ടായിരുന്നത്. വന്ദേമാതരം പൂർണമായി ആലപിക്കണമെന്ന തീരുമാനം പിന്നീട് ഉൾപ്പെടുത്തിയതാണെന്നും മന്ത്രി വിശദീകരിച്ചു. ബിജെപി ഭരിക്കുന്ന കാറഡുക്ക ഗ്രാമപഞ്ചായത്തിന്റെ നിയന്ത്രണത്തിൽ രൂപീകരിച്ച സംഘാടക സമിതിയാണ് വന്ദേമാതരം പൂർണമായി ആലപിക്കാൻ തീരുമാനിച്ചതെന്നും മന്ത്രി പറഞ്ഞു. സർക്കാർ പരിപാടിയിൽ ബിജെപി നിലപാട് അടിച്ചേൽപ്പിക്കാനുള്ള ശ്രമമാണ് നടന്നതെന്നും വിഷയം രാഷ്ട്രീയമായി ഉപയോഗിക്കുകയാണെന്നും അദ്ദേഹം ആരോപിച്ചു.

വന്ദേമാതരത്തിന്റെ രണ്ട് ഈരടികൾക്ക് ശേഷം മന്ത്രി കെ. മുരളീധരൻ, രാജ്മോഹൻ ഉണ്ണിത്താൻ എം.പി, കല്ലട്ര മാഹിൻ ഹാജി എം.എൽ.എ, ജില്ലാ കളക്ടർ ശ്രീധന്യ സുരേഷ് എന്നിവർ ഇരുന്നുവെന്നാണ് ബിജെപിയുടെ ആരോപണം. അതേസമയം, കെ. നീലകണ്ഠൻ എം.എൽ.എ ഗാനം പൂർത്തിയാകുന്നതുവരെ എഴുന്നേറ്റുനിന്നിരുന്നു.

ദേശീയഗീതത്തോടും ഭരണഘടനയോടും അനാദരവ് കാണിച്ചെന്ന് ആരോപിച്ച് ജനപ്രതിനിധികൾക്കും ജില്ലാ കളക്ടർക്കുമെതിരെ കേന്ദ്ര ആഭ്യന്തര മന്ത്രിക്കും ഗവർണർക്കും ചീഫ് സെക്രട്ടറിക്കും പരാതി നൽകുമെന്ന് ബിജെപി ജില്ലാ പ്രസിഡന്റ് എം.എൽ. അശ്വിനി നേരത്തെ വ്യക്തമാക്കിയിരുന്നു.

അതേസമയം, പറവൂരിലെ ചികിത്സാപ്പിഴവുമായി ബന്ധപ്പെട്ട വിഷയത്തിലും മന്ത്രി പ്രതികരിച്ചു. സംഭവത്തിൽ ഇതുവരെ സർക്കാരിനോ ആരോഗ്യവകുപ്പിനോ പരാതി ലഭിച്ചിട്ടില്ലെന്ന് അദ്ദേഹം പറഞ്ഞു. പരാതി ലഭിക്കുന്ന പക്ഷം വിശദമായ പരിശോധന നടത്തി ആവശ്യമായ നടപടികൾ സ്വീകരിക്കുമെന്നും മന്ത്രി വ്യക്തമാക്കി.