മുൻ മന്ത്രി വി. അബ്ദുറഹിമാനെതിരെ കേസെടുക്കാൻ ഗവർണറുടെ അനുമതി; വിജിലൻസ് അന്വേഷണം ഉടൻ

തിരുവനന്തപുരം: ലയണൽ മെസ്സിയെയും അർജന്റീന ഫുട്ബോൾ ടീമിനെയും കേരളത്തിലെത്തിക്കാനുള്ള പദ്ധതിയുമായി ബന്ധപ്പെട്ട സ്പോൺസർഷിപ്പ് ഇടപാടിലെ ക്രമക്കേടുകളിൽ മുൻ കായികമന്ത്രി വി. അബ്ദുറഹിമാനെതിരെ കേസെടുക്കാൻ ഗവർണറുടെ അനുമതി. ഇതോടെ വിവാദമായ അർജന്റീന ഫുട്ബോൾ ടീം സന്ദർശന പദ്ധതിയിലെ സാമ്പത്തിക ക്രമക്കേടുകളെക്കുറിച്ചുള്ള അന്വേഷണം കൂടുതൽ നിർണായക ഘട്ടത്തിലേക്ക് കടക്കുകയാണ്.

അഴിമതി നിരോധന നിയമപ്രകാരം കേസെടുക്കാൻ ഗവർണറുടെ അനുമതി തേടി സർക്കാർ നേരത്തെ കത്ത് നൽകിയിരുന്നു. എഡിജിപി പി. വിജയന്റെ നേതൃത്വത്തിലുള്ള പ്രത്യേക അന്വേഷണസംഘം (എസ്ഐടി) സമർപ്പിച്ച പ്രാഥമിക റിപ്പോർട്ടിന്റെ അടിസ്ഥാനത്തിലാണ് നടപടി. മുൻ മന്ത്രിയുടെ ഔദ്യോഗിക പദവി ദുരുപയോഗം ചെയ്ത് സ്വകാര്യ സ്പോൺസറായ റിപ്പോർട്ടർ ബ്രോഡ്കാസ്റ്റിങ് കമ്പനിക്ക് സാമ്പത്തിക നേട്ടമുണ്ടാക്കാൻ ഇടപെടലുകൾ നടത്തിയെന്നാണ് അന്വേഷണസംഘത്തിന്റെ കണ്ടെത്തൽ.

വി. അബ്ദുറഹിമാനെ കൂടാതെ അദ്ദേഹത്തിന്റെ മുൻ പ്രൈവറ്റ് സെക്രട്ടറി സി. സത്യപാലൻ, കേരള സ്പോർട്സ് കൗൺസിൽ മുൻ പ്രസിഡന്റ് യു. ഷറഫലി, റിപ്പോർട്ടർ ബ്രോഡ്കാസ്റ്റിങ് കമ്പനി, കമ്പനിയുടെ ഉടമ ആന്റോ അഗസ്റ്റിൻ എന്നിവർക്കെതിരെയും അഴിമതി നിരോധന നിയമപ്രകാരം കേസെടുക്കണമെന്നാണ് എസ്ഐടി ശുപാർശ ചെയ്തിരിക്കുന്നത്.

അർജന്റീന ഫുട്ബോൾ അസോസിയേഷനുമായി സ്പോൺസർഷിപ്പ് കരാർ ഒപ്പിട്ടതിലും കൊച്ചിയിലെ ജവഹർലാൽ നെഹ്റു സ്റ്റേഡിയം സ്പോൺസർക്ക് കൈമാറിയതിലും നടപടിക്രമങ്ങൾ പാലിച്ചില്ലെന്നാണ് അന്വേഷണത്തിലെ പ്രധാന കണ്ടെത്തലുകൾ. പദ്ധതിയുടെ മറവിൽ സർക്കാരിന് കോടികളുടെ സാമ്പത്തിക നഷ്ടമുണ്ടായെന്നും ഔദ്യോഗിക രേഖകൾ ദുരുപയോഗം ചെയ്തെന്നും അന്വേഷണസംഘം വിലയിരുത്തിയിട്ടുണ്ട്.

അർജന്റീന ഫുട്ബോൾ അസോസിയേഷന് ഏകദേശം 126 കോടി രൂപ നൽകിയെന്നാണ് സ്പോൺസർ അവകാശപ്പെട്ടിരുന്നത്. എന്നാൽ ഈ പണം കൈമാറിയതുമായി ബന്ധപ്പെട്ട ബാങ്ക് രേഖകളും വിദേശ പണമിടപാട് സ്ഥിരീകരിക്കുന്ന രേഖകളും സർക്കാരിന് ലഭ്യമല്ലെന്ന് കായികമന്ത്രി ഒ.ജെ. ജെനീഷ് നിയമസഭയിൽ വ്യക്തമാക്കിയിരുന്നു.

മെസ്സിയെയും അർജന്റീന ടീമിനെയും കേരളത്തിലെത്തിക്കാനുള്ള പദ്ധതി യാഥാർഥ്യമാകാതെ പോയതോടെയാണ് സ്പോൺസർഷിപ്പ് ഇടപാടുകളിലെ സാമ്പത്തികവും ഭരണപരവുമായ ക്രമക്കേടുകൾ പുറത്തുവന്നത്. സംഭവത്തിൽ എൻഫോഴ്സ്മെന്റ് ഡയറക്ടറേറ്റും അന്വേഷണം ആരംഭിച്ചിട്ടുണ്ട്.

ഗവർണറുടെ അനുമതിയോടെ മുൻ മന്ത്രിക്കെതിരെ അഴിമതി നിരോധന നിയമപ്രകാരമുള്ള തുടർനടപടികൾക്ക് വഴിതുറന്നിരിക്കുകയാണ്. അന്വേഷണത്തിൽ കണ്ടെത്തുന്ന തെളിവുകളും തുടർനടപടികളും കേസിൽ നിർണായകമാകും.