സിവിൽ സർവീസ് സ്വപ്നങ്ങൾക്ക് സഞ്ജുവിന്റെ കൈത്താങ്ങ്; 1000 വിദ്യാർത്ഥികൾക്ക് UPSC പരിശീലന സ്കോളർഷിപ്പ്

തിരുവനന്തപുരം: ക്രിക്കറ്റ് മൈതാനത്തെ പ്രകടനങ്ങൾക്കപ്പുറം വിദ്യാഭ്യാസ മേഖലയിലും ശ്രദ്ധേയമായ ഇടപെടലുമായി മലയാളി താരം സഞ്ജു സാംസൺ. രാജ്യത്തെ സിവിൽ സർവീസ് സ്വപ്നം കാണുന്ന 1,000 വിദ്യാർത്ഥികൾക്ക് UPSC പരിശീലനത്തിനുള്ള സ്കോളർഷിപ്പ് നൽകുന്ന പദ്ധതിക്ക് സഞ്ജു സാംസൺ ഫൗണ്ടേഷൻ തുടക്കമിടുന്നു. പ്രമുഖ സിവിൽ സർവീസ് പരിശീലന സ്ഥാപനമായ ലീഡ് IAS അക്കാദമിയുമായി സഹകരിച്ചാണ് പദ്ധതി നടപ്പാക്കുന്നത്. ലീഡ് ഇന്ത്യ സമ്മിറ്റിന്റെ വേദിയിലാണ് പദ്ധതിയുടെ പ്രഖ്യാപനം നടന്നത്.

പദ്ധതിയുടെ ഭാഗമായി തെരഞ്ഞെടുക്കപ്പെടുന്ന 1,000 വിദ്യാർത്ഥികൾക്ക് ലീഡ് IAS അക്കാദമിയിലെ പരിശീലനത്തിനുള്ള പൂർണ സ്പോൺസർഷിപ്പ് സഞ്ജു സാംസൺ ഫൗണ്ടേഷൻ നൽകും. സാമ്പത്തിക സാഹചര്യങ്ങൾ കാരണം മികച്ച സിവിൽ സർവീസ് പരിശീലനം നേടാൻ കഴിയാത്ത വിദ്യാർത്ഥികൾക്ക് അവസരമൊരുക്കുക എന്നതാണ് പദ്ധതിയുടെ പ്രധാന ലക്ഷ്യം. ഒരു വിദ്യാർത്ഥിയുടെയും സിവിൽ സർവീസ് സ്വപ്നം സാമ്പത്തിക പരിമിതികൾ കാരണം അവസാനിക്കരുതെന്ന ആശയമാണ് പദ്ധതിക്ക് പിന്നിലെന്ന് ലീഡ് IAS അക്കാദമി അറിയിച്ചു.

പരിശീലനം ക്ലാസ്‌റൂം കോച്ചിങ്ങിൽ മാത്രം ഒതുങ്ങുന്നതല്ല. മെന്റർഷിപ്പ്, സ്കിൽ അധിഷ്ഠിത പഠനം, വ്യക്തിത്വ വികസനം, ആശയവിനിമയ ശേഷി, ക്രിട്ടിക്കൽ തിങ്കിങ്, ലീഡർഷിപ്പ് സ്കിൽസ് തുടങ്ങിയ മേഖലകൾക്കും പരിശീലനത്തിൽ പ്രാധാന്യം നൽകും. ഓരോ വിദ്യാർത്ഥിയുടെയും കഴിവുകളും പഠന ആവശ്യങ്ങളും പരിഗണിച്ച് വ്യക്തിഗത മെന്റർഷിപ്പിലൂടെ സിവിൽ സർവീസ് പരീക്ഷയ്ക്ക് തയ്യാറെടുക്കാൻ സഹായിക്കുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്.

സഞ്ജു സാംസണിന്റെ സ്വദേശമായ വിഴിഞ്ഞത്തെയും സമീപ തീരദേശ മേഖലകളിലെയും വിദ്യാർത്ഥികൾക്ക് പദ്ധതിയിൽ പ്രത്യേക പരിഗണന ലഭിക്കുമെന്നും റിപ്പോർട്ടുകളുണ്ട്. ഇതോടെ സാധാരണയായി വലിയ സാമ്പത്തിക ചെലവ് ആവശ്യപ്പെടുന്ന UPSC പരിശീലനം കൂടുതൽ വിദ്യാർത്ഥികൾക്ക് ലഭ്യമാകുന്ന അവസരമാണ് ഒരുങ്ങുന്നത്.

ക്രിക്കറ്റിൽ രാജ്യത്തെ പ്രതിനിധീകരിച്ച സഞ്ജു സാംസൺ, രാജ്യത്തെ സേവിക്കാനും നയിക്കാനും ആഗ്രഹിക്കുന്ന പുതിയ തലമുറയുടെ സ്വപ്നങ്ങൾക്ക് പിന്തുണ നൽകുന്ന തരത്തിലാണ് ഈ വിദ്യാഭ്യാസ പദ്ധതിയിലൂടെ ഇടപെടുന്നത്. കായികരംഗത്തെ വിജയത്തിനൊപ്പം വിദ്യാഭ്യാസവും യുവജന ശാക്തീകരണവും ലക്ഷ്യമിട്ടുള്ള ഇത്തരം പ്രവർത്തനങ്ങൾ സഞ്ജുവിന്റെ സാമൂഹിക ഇടപെടലുകൾക്ക് പുതിയൊരു മുഖം നൽകുകയാണ്.

ആയിരം വിദ്യാർത്ഥികൾക്ക് ലഭിക്കുന്ന ഈ അവസരം ഭാവിയിൽ സിവിൽ സർവീസിലേക്ക് കടന്നുവരുന്ന ഒരു പുതിയ തലമുറയെ വളർത്തിയെടുക്കാൻ സഹായിക്കുമെന്നാണ് പ്രതീക്ഷ. സാമ്പത്തികശേഷിയല്ല, കഴിവും കഠിനാധ്വാനവും ലക്ഷ്യബോധവുമാണ് മുന്നേറാനുള്ള മാനദണ്ഡമാകേണ്ടതെന്ന സന്ദേശം കൂടിയാണ് പദ്ധതിയിലൂടെ ഉയരുന്നത്