എസ്ഐആർ ഹർജികൾ സുപ്രീം കോടതിയിൽ; 'സത്യം ശിവം സുന്ദരം' ശിവസ്തുതിയുമായി രാഹുൽ ഗാന്ധി

ന്യൂഡൽഹി: വോട്ടർ പട്ടികയിലെ പ്രത്യേക തീവ്ര പരിഷ്കരണമായ എസ്ഐആർ (SIR) നടപടികളുമായി ബന്ധപ്പെട്ട ഹർജികൾ സുപ്രീം കോടതി പരിഗണിക്കാനിരിക്കെ സാമൂഹിക മാധ്യമങ്ങളിൽ ശിവസ്തുതി പങ്കുവെച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. മൂന്ന് വെള്ള വരകളും മധ്യത്തിൽ ചുവന്ന തിലകവുമുള്ള ശിവചിഹ്നത്തിനൊപ്പം 'സത്യം ശിവം സുന്ദരം' എന്ന സംസ്കൃത വാക്യവും ഉൾപ്പെടുത്തിയ ചിത്രമാണ് രാഹുൽ പങ്കുവെച്ചത്.

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനും തിരഞ്ഞെടുപ്പ് കമ്മിഷന്റെ നടപടികൾക്കുമെതിരെ കോൺഗ്രസ് അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി എന്നിവരടക്കമുള്ള ഇന്ത്യാ മുന്നണി നേതാക്കൾ നൽകിയ ഹർജികളാണ് സുപ്രീം കോടതിയുടെ പരിഗണനയിലുള്ളത്.

വോട്ടർ പട്ടികയിലെ പ്രത്യേക തീവ്ര പരിഷ്കരണവുമായി ബന്ധപ്പെട്ട് തിരഞ്ഞെടുപ്പ് കമ്മിഷനുമായി കടുത്ത നിയമപോരാട്ടത്തിലാണ് രാഹുൽ ഗാന്ധിയും ഇന്ത്യാ മുന്നണിയും. പരിഷ്കരണ നടപടികളിൽ തിരഞ്ഞെടുപ്പ് കമ്മിഷൻ കൂട്ടായ അധികാരം ഏകപക്ഷീയമായും അനിയന്ത്രിതമായും വിനിയോഗിച്ചെന്നാണ് രാഹുൽ ഗാന്ധി ഹർജിയിൽ ഉന്നയിക്കുന്ന പ്രധാന വാദം.

മറ്റ് തിരഞ്ഞെടുപ്പ് കമ്മിഷണർമാരുടെ അറിവോ അംഗീകാരമോ ഇല്ലാതെയാണോ നിർണായക തീരുമാനങ്ങൾ എടുത്തതെന്ന കാര്യത്തിലും ഹർജിയിൽ സംശയം ഉന്നയിക്കുന്നുണ്ട്.

വോട്ടർ എൻറോൾമെന്റ് ഫോം 6-ൽ വരുത്തിയ മാറ്റങ്ങൾ, ഇലക്ടറൽ ഡാറ്റാബേസിന്റെ പ്രവർത്തനം, ആവശ്യമായ നോട്ടീസ് നൽകാതെയുള്ള വോട്ടർ ഒഴിവാക്കൽ, വോട്ടർമാരെ പട്ടികയിൽ പുനഃസ്ഥാപിക്കുന്നതിന് വ്യക്തമായ സംവിധാനം ഇല്ലാത്തത് തുടങ്ങിയ വിഷയങ്ങളും ഹർജിക്കാർ ചൂണ്ടിക്കാട്ടുന്നു.

തിരഞ്ഞെടുപ്പ് കമ്മിഷന്റെ ബന്ധപ്പെട്ട രേഖകൾ പരിശോധിക്കാൻ അനുമതി നൽകുക, വോട്ടർമാരെ ഒഴിവാക്കിയതും പട്ടികയിൽ മാറ്റങ്ങൾ വരുത്തിയതും സംബന്ധിച്ച് സ്വതന്ത്ര ഓഡിറ്റ് നടത്തുക, കേസിൽ അന്തിമ തീരുമാനമുണ്ടാകുന്നതുവരെ നിലവിലെ വിജ്ഞാപനപ്രകാരമുള്ള നടപടികൾ നിർത്തിവെക്കുക എന്നിവയാണ് ഹർജിയിലെ പ്രധാന ആവശ്യങ്ങൾ.

അതേസമയം, തങ്ങൾക്കെതിരായ ആരോപണങ്ങൾ നിഷേധിച്ച് തിരഞ്ഞെടുപ്പ് കമ്മിഷൻ സുപ്രീം കോടതിയിൽ സത്യവാങ്മൂലം സമർപ്പിച്ചിട്ടുണ്ട്. വോട്ടർ പട്ടിക പരിഷ്കരണവുമായി ബന്ധപ്പെട്ട മൂന്ന് ഉത്തരവുകളും ഏകകണ്ഠമായാണ് എടുത്തതെന്നും മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാർ ഏകപക്ഷീയമായി പ്രവർത്തിച്ചിട്ടില്ലെന്നും കമ്മിഷൻ കോടതിയെ അറിയിച്ചു.

കേവലം ഒരു മാധ്യമ റിപ്പോർട്ടിന്റെ അടിസ്ഥാനത്തിലാണ് പ്രതിപക്ഷ നേതാക്കൾ ഹർജി നൽകിയതെന്നും തിരഞ്ഞെടുപ്പ് കമ്മിഷൻ വാദിക്കുന്നു.

തിരഞ്ഞെടുപ്പ് പ്രക്രിയയിൽ ക്രമക്കേടുകളും 'വോട്ട് ചോരി'യും നടന്നുവെന്ന ആരോപണങ്ങളുമായി നേരത്തേ രാഹുൽ ഗാന്ധി സുപ്രീം കോടതിയിലേക്ക് മാർച്ച് നടത്തിയിരുന്നു. പ്രതിഷേധത്തിൽ പങ്കുചേരാൻ പ്രതിപക്ഷ പാർട്ടികളോടും സിവിൽ സൊസൈറ്റി സംഘടനകളോടും പൊതുജനങ്ങളോടും അദ്ദേഹം ആഹ്വാനം ചെയ്തിരുന്നു.

എസ്ഐആർ നടപടികളുടെ നിയമസാധുതയും തിരഞ്ഞെടുപ്പ് കമ്മിഷന്റെ തീരുമാനങ്ങളുമായി ബന്ധപ്പെട്ട തർക്കങ്ങളും സുപ്രീം കോടതിയുടെ പരിഗണനയിൽ തുടരുന്നതിനിടെ രാഹുൽ ഗാന്ധിയുടെ പുതിയ സാമൂഹിക മാധ്യമ പോസ്റ്റും ശ്രദ്ധ നേടിയിരിക്കുകയാണ്.