തിരുവനന്തപുരം പൗർണമി കാവിൽ തുലാഭാരത്തിനിടെ കയർ പൊട്ടി; വി. മുരളീധരൻ എംഎൽഎയ്ക്ക് പരിക്ക്
തുലാഭാരത്തിനിടെ ത്രാസ് തകർന്നു വീണു; കാലിന് പരിക്കേറ്റ എംഎൽഎയെ ആശുപത്രിയിൽ പ്രവേശിപ്പിച്ചു, ആരോഗ്യനില തൃപ്തികരം.
Desk Mediagraamam 
തിരുവനന്തപുരം: തിരുവനന്തപുരം പൗർണമി കാവിൽ തുലാഭാര ചടങ്ങിനിടെ ത്രാസിന്റെ കയർ പൊട്ടി വീണ് കഴക്കൂട്ടം എംഎൽഎ വി. മുരളീധരന് പരിക്കേറ്റു. തുലാഭാരം നടക്കുന്നതിനിടെയാണ് അപ്രതീക്ഷിതമായി കയർ പൊട്ടി ത്രാസ് താഴേക്ക് പതിച്ചത്.
അപകടത്തിൽ എംഎൽഎയുടെ കാലിന് പരിക്കേറ്റതിനെ തുടർന്ന് ഉടൻ തന്നെ സമീപത്തെ സ്വകാര്യ ആശുപത്രിയിലെത്തിച്ച് ചികിത്സ നൽകി. പ്രാഥമിക ചികിത്സയ്ക്ക് ശേഷം ആരോഗ്യനില തൃപ്തികരമാണെന്നും പരിക്ക് ഗുരുതരമല്ലെന്നും ബന്ധപ്പെട്ടവർ അറിയിച്ചു.
സംഭവത്തെ തുടർന്ന് ക്ഷേത്രത്തിൽ ഉണ്ടായിരുന്ന ഭക്തരും സംഘാടകരും ആശങ്കയിലായെങ്കിലും സാഹചര്യം പിന്നീട് നിയന്ത്രണവിധേയമായി. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
