മാർട്ടിനെല്ലിയുടെ ഇഞ്ചുറി ടൈം മാജിക്; ജപ്പാനെ വീഴ്ത്തി ബ്രസീൽ പ്രീ-ക്വാർട്ടറിൽ

ഹൂസ്റ്റൺ: ലോകകപ്പ് റൗണ്ട് ഓഫ് 32 പോരാട്ടത്തിൽ ഏഷ്യൻ കരുത്തരായ ജപ്പാനെ ഒന്നിനെതിരെ രണ്ട് ഗോളുകൾക്ക് തകർത്ത് ബ്രസീൽ പ്രീ-ക്വാർട്ടറിലേക്ക്. ആദ്യ പകുതിയിൽ ഒരു ഗോളിന് പിന്നിൽ നിന്ന ശേഷമാണ് കാനറിപ്പട തകർപ്പൻ തിരിച്ചുവരവ് നടത്തിയത്. തോൽവിയോടെ ജപ്പാൻ പുറത്തായതിനൊപ്പം ഇത്തവണത്തെ ലോകകപ്പിലെ ഏഷ്യൻ ടീമുകളുടെ സാന്നിധ്യവും അവസാനിച്ചു.  

ആദ്യ പകുതിയിൽ ഞെട്ടിച്ച് ജപ്പാൻ

മുൻ ലോക ചാമ്പ്യൻമാരായ ബ്രസീലിനെ ഞെട്ടിച്ചുകൊണ്ട് ജപ്പാനാണ് ആദ്യം വല കുലുക്കിയത്. മത്സരത്തിന്റെ 29-ാം മിനിറ്റിൽ മധ്യനിര താരം കൈഷു സാനോയാണ് ജപ്പാന് ലീഡ് സമ്മാനിച്ചത്. ബ്രസീൽ പ്രതിരോധ താരം ഡാനിലോ വരുത്തിയ പിഴവിൽ നിന്നായിരുന്നു സാനോയുടെ ലോങ് റേഞ്ചർ ഗോൾ. 

തിരിച്ചടിച്ച് കാസെമിറോ, രക്ഷകനായി മാർട്ടിനെല്ലി

രണ്ടാം പകുതിയിൽ കോച്ച് കാർലോ ആൻസലോട്ടിയുടെ തന്ത്രങ്ങൾ ബ്രസീലിനെ കളിയിലേക്ക് തിരികെ കൊണ്ടുവന്നു. 56-ാം മിനിറ്റിൽ മിഡ്ഫീൽഡർ കാസെമിറോ ഹെഡ്ഡറിലൂടെ ബ്രസീലിന് സമനില സമ്മാനിച്ചു. സൂപ്പർ താരം നെയ്മറിനെ രണ്ടാം പകുതി തീരാറായിട്ടും കളത്തിലിറക്കിയതുമില്ല.

മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയിരിക്കെ, 95-ാം മിനിറ്റിലാണ് ബ്രസീലിന്റെ വിജയഗോൾ പിറന്നത്. ബ്രൂണോ ഗുയ്മറെസിന്റെ പാസിൽ നിന്ന് പകരക്കാരനായി ഇറങ്ങിയ ഗബ്രിയേൽ മാർട്ടിനെല്ലി തൊടുത്ത ക്ലിനിക്കൽ ഷോട്ട് ജപ്പാൻ വല തുളച്ചതോടെ ബ്രസീൽ പ്രീ-ക്വാർട്ടർ ബർത്ത് ഉറപ്പിച്ചു. ഐവറി കോസ്റ്റ്- നോർവേ വിജയികളെയാകും ബ്രസീൽ ഇനി നേരിടുക.