'ലാലേട്ടന്റെ മകൾ' വെറുതെയല്ല; ആദ്യ സിനിമയിൽ തന്നെ വിസ്മയ ഞെട്ടിച്ചു
Desk Mediagraamam 
പ്രേക്ഷകർ ആകാംക്ഷയോടെ കാത്തിരുന്ന മോഹൻലാലിന്റെ മകൾ വിസ്മയ മോഹൻലാലിന്റെ അരങ്ങേറ്റ ചിത്രം **"തുടക്കം"** തിയേറ്ററുകളിൽ പ്രദർശനം തുടരുകയാണ്. സംവിധായകൻ ജൂഡ് ആന്റണിയാണ് ചിത്രം സംവിധാനം ചെയ്തിരിക്കുന്നത്. ആദ്യ ചിത്രത്തിലൂടെ തന്നെ "ലാലേട്ടന്റെ മകൾ തന്നെയെന്ന്" പ്രേക്ഷകരെ കൊണ്ട് പറയിപ്പിക്കുന്ന പ്രകടനമാണ് വിസ്മയ കാഴ്ചവെച്ചിരിക്കുന്നത്. ഒരു ഫാമിലി എന്റർടെയ്നറായാണ് ചിത്രം ഒരുക്കിയിരിക്കുന്നത്. വലിയ പ്രതീക്ഷകളോടെയാണ് ഒരു വിഭാഗം പ്രേക്ഷകർ ചിത്രം കാണാൻ എത്തിയത്. അതേസമയം, പ്രതീക്ഷകളില്ലാതെ എത്തിയവരെയും ചിത്രം തൃപ്തിപ്പെടുത്തുന്നുവെന്ന തരത്തിലുള്ള പ്രതികരണങ്ങളാണ് പുറത്തുവരുന്നത്. ചിത്രത്തിൽ മീനു എന്ന കഥാപാത്രത്തെയാണ് വിസ്മയ അവതരിപ്പിക്കുന്നത്. വൈകാരിക ആഴവും മികച്ച കയ്യടക്കവും പ്രകടമാക്കുന്ന അഭിനയംകൊണ്ട് മീനുവെന്ന കഥാപാത്രത്തെ വിസ്മയ ശ്രദ്ധേയമാക്കിയിട്ടുണ്ട്.
വിസ്മയയ്ക്കൊപ്പം ചിത്രത്തിന്റെ നിർമാതാവായ ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയുടെ പ്രകടനവും ചിത്രത്തിന്റെ മറ്റൊരു പ്രധാന ആകർഷണമാണ്. നീണ്ട സംഭാഷണങ്ങളുടെ പിന്തുണയില്ലാതെയും ശരീരഭാഷയും സൂക്ഷ്മമായ ഭാവപ്രകടനങ്ങളും മാത്രം ഉപയോഗിച്ച് സ്ക്രീനിൽ ഭീതിയുടെ സാന്നിധ്യം സൃഷ്ടിക്കാൻ അദ്ദേഹത്തിന് കഴിഞ്ഞിട്ടുണ്ട്. ഇവർക്ക് പുറമെ സായ് കുമാർ, മനോജ് കെ. ജയൻ, കെ. ബി. ഗണേഷ് കുമാർ, ചിപ്പി എന്നിവർ പ്രധാന കഥാപാത്രങ്ങളായി എത്തുന്നുണ്ട്. യാനിക് ബെന്നും സ്റ്റണ്ട് സിൽവയും ചേർന്നൊരുക്കിയ ആക്ഷൻ രംഗങ്ങൾ ചിത്രത്തിന്റെ ത്രില്ലിംഗ് സ്വഭാവത്തെ കൂടുതൽ ശക്തമാക്കുന്നു. ജോമോൻ ടി. ജോണിന്റെയും അഖിൽ ജോർജിന്റെയും ദൃശ്യഭംഗിയാർന്ന ചായാഗ്രഹണം, ജെക്സ് ബിജോയിയുടെ തീവ്രത നിറഞ്ഞ പശ്ചാത്തല സംഗീതം, ചമൻ ചാക്കോയുടെ കൃത്യതയാർന്ന എഡിറ്റിംഗ് എന്നിവ ചേർന്ന് ചിത്രത്തെ കൂടുതൽ മികവുറ്റ സിനിമാനുഭവമാക്കി മാറ്റുന്നു.
