തിരുവനന്തപുരം: ഇ20 പെട്രോളിനെക്കുറിച്ചുള്ള ചർച്ചയ്ക്കിടെ ബി.ജെ.പി നേതാവ് നടത്തിയ വാദം സോഷ്യൽ മീഡിയയിൽ വിവാദമാകുന്നു. ന്യൂസ് 24-ലെ ‘തമ്മിൽ തമ്മിൽ’ പരിപാടിയിൽ ബി.ജെ.പി നേതാവ് അഡ്വ. എസ്. ജയസൂര്യൻ നടത്തിയ അവകാശവാദത്തിനെതിരെ യൂട്യൂബർ രാകേഷ് നാരായണൻ രേഖകൾ പുറത്തുവിട്ടതാണ് ചർച്ചയായത്.

പരിപാടിക്കിടെ താൻ വർഷങ്ങളായി ഉപയോഗിക്കുന്ന വാഹനത്തിൽ ഇ20 പെട്രോൾ അടിക്കുന്നുണ്ടെന്നും ഇതുവരെ വാഹനത്തിന് യാതൊരു പ്രശ്നവും ഉണ്ടായിട്ടില്ലെന്നും ജയസൂര്യൻ പറഞ്ഞിരുന്നു. തന്റെ വാഹനം ഇന്നോവയാണെന്നും അദ്ദേഹം സൂചിപ്പിച്ചിരുന്നു.

എന്നാൽ ഈ വാദത്തെ ചോദ്യം ചെയ്താണ് രാകേഷ് നാരായണൻ രംഗത്തെത്തിയത്. ജയസൂര്യൻ ഉപയോഗിക്കുന്നതായി ചർച്ചയിൽ പരാമർശിച്ച ഇന്നോവ 2.5 ലിറ്റർ ഡീസൽ മോഡലാണെന്ന രേഖകളും ചിത്രങ്ങളും അദ്ദേഹം ഫേസ്ബുക്ക് പോസ്റ്റിലൂടെ പുറത്തുവിട്ടു.

“വണ്ടി ഡീസൽ അല്ലേയെന്ന് ചോദിച്ചപ്പോൾ ഉരുണ്ടുകളിക്കുകയും പെട്രോളാണെന്ന് സ്ഥാപിക്കാൻ ശ്രമിക്കുകയും ചെയ്തു,” എന്നാണ് രാകേഷ് നാരായണന്റെ ആരോപണം.

ഇന്നോവയ്ക്ക് പെട്രോൾ പതിപ്പ് ഉണ്ടായിരുന്നുവെന്നും എന്നാൽ അത് 1998 സി.സി. മോഡലായിരുന്നുവെന്നും അദ്ദേഹം ചൂണ്ടിക്കാട്ടി. പുറത്തുവിട്ട ചിത്രത്തിലുള്ള വാഹനം 2.5 ഡീസൽ മോഡലാണെന്നും അദ്ദേഹം അവകാശപ്പെട്ടു.

ഇ20 പെട്രോളിനെ അനുകൂലിച്ച് വാദിക്കുന്നതിനിടെ വസ്തുതകൾ വളച്ചൊടിക്കപ്പെടുന്നുണ്ടെന്നാണ് രാകേഷ് നാരായണന്റെ ആരോപണം. ഇ20 ഇന്ധനവുമായി ബന്ധപ്പെട്ട ആശങ്കകളും അതിനെച്ചൊല്ലിയുള്ള രാഷ്ട്രീയ വാദപ്രതിവാദങ്ങളും രാജ്യത്ത് ശക്തമായി തുടരുന്നതിനിടെയാണ് പുതിയ വിവാദവും ഉയരുന്നത്.

പ്രധാന ആശങ്കകൾ

1. പഴയ വാഹനങ്ങൾക്ക് ഇ20 പെട്രോൾ അനുയോജ്യമാകണമെന്നില്ല.
2. പെട്രോളിനെ അപേക്ഷിച്ച് ഇ20 ഉപയോഗിക്കുമ്പോൾ ചില വാഹനങ്ങളിൽ മൈലേജ് കുറയാൻ സാധ്യതയുണ്ട്.
3. ദീർഘകാല ഉപയോഗത്തിൽ പഴയ വാഹനങ്ങളിലെ ചില എൻജിൻ, ഇന്ധന സംവിധാന ഭാഗങ്ങളിൽ തേയ്മാനം കൂടുമെന്ന ആശങ്കയുണ്ട്.
4. എഥനോൾ ഈർപ്പം ആഗിരണം ചെയ്യുന്നതിനാൽ ചില സാഹചര്യങ്ങളിൽ ഇന്ധന സംവിധാനത്തിൽ തുരുമ്പ് ഉണ്ടാകാനുള്ള സാധ്യതയെക്കുറിച്ച് ആശങ്ക ഉയരുന്നുണ്ട്.
5. പഴയ വാഹനങ്ങളിലെ സീൽ, ഹോസ്, ഗാസ്കറ്റ് തുടങ്ങിയ ഭാഗങ്ങൾ ഇ20-നോട് പൂർണമായി പൊരുത്തപ്പെടണമെന്നില്ല.
6. ഇ20 ഉപയോഗിക്കാൻ അനുയോജ്യമല്ലാത്ത പഴയ വാഹനങ്ങളിൽ ഭാവിയിൽ അറ്റകുറ്റപ്പണി ചെലവ് കൂടാനും വാഹനത്തിന്റെ പുനർവിൽപ്പന മൂല്യത്തെ ബാധിക്കാനും സാധ്യതയുണ്ട്.

disclaimer: ഇ20 ഉപയോഗിച്ചാൽ എല്ലാ വാഹനങ്ങൾക്കും ഈ പ്രശ്നങ്ങൾ ഉണ്ടാകുമെന്ന് അർഥമില്ല. വാഹനത്തിന്റെ മോഡൽ, നിർമ്മാണ വർഷം, ഇ20 ഉപയോഗിക്കാൻ വാഹനനിർമാതാവ് നൽകിയ അനുമതി എന്നിവ അനുസരിച്ച്​ മാറ്റങ്ങളുണ്ടാകാം. എങ്കിൽപ്പോലും വാഹനങ്ങൾ ഉപയോഗിക്കുന്നവരുടെ ആശങ്കക്ക്​ കൃത്യമായ പരിഹാരം അകലെയാണ്​ എന്നതാണ്​ യാഥാർഥ്യം.