ബി.എസ്.എൻ.എൽ 5ജിയിലേക്ക്; 25,000 ടവറുകൾ സ്ഥാപിക്കാൻ നീക്കം

ന്യൂഡൽഹി: രാജ്യത്ത് 5ജി സേവനങ്ങൾ വ്യാപിപ്പിക്കുന്നതിനുള്ള തയ്യാറെടുപ്പുകളുമായി പൊതുമേഖലാ ടെലികോം കമ്പനിയായ ബി.എസ്.എൻ.എൽ. നിലവിലെ 4ജി ശൃംഖല കൂടുതൽ വിപുലീകരിക്കുന്നതിനൊപ്പം അടുത്ത തലമുറ മൊബൈൽ സേവനങ്ങളിലേക്ക് കടക്കാനാണ് കമ്പനിയുടെ നീക്കം. ഇതിന്റെ ഭാഗമായി 25,000 മൊബൈൽ ടവറുകൾ സ്ഥാപിക്കുന്നതിനുള്ള ഓർഡർ നൽകിയിട്ടുണ്ട്. സാമ്പത്തിക സാഹചര്യം വിലയിരുത്തി 25,000 മുതൽ 50,000 വരെ ടവറുകൾ കൂടി സ്ഥാപിക്കുന്നതും പരിഗണനയിലാണെന്ന് കേന്ദ്ര ടെലികോം സഹമന്ത്രി പെമ്മസാനി ചന്ദ്രശേഖർ വ്യക്തമാക്കി.

ഇന്ത്യ മൊബൈൽ കോൺഗ്രസ് 2026ന്റെ ഭാഗമായി സംസാരിക്കവെ, ബി.എസ്.എൻ.എല്ലിന്റെ നിലവിലെ 4ജി ശൃംഖല പ്രതീക്ഷിച്ച ഫലം നൽകുന്നുണ്ടെന്നും വരും മാസങ്ങളിൽ കൂടുതൽ പ്രദേശങ്ങളിലേക്ക് സേവനം വ്യാപിപ്പിക്കുമെന്നും കമ്പനി പ്രിൻസിപ്പൽ ജനറൽ മാനേജർ വിവേക് ദുവ പറഞ്ഞു. തദ്ദേശീയമായി വികസിപ്പിച്ച ടെലികോം സാങ്കേതികവിദ്യയുടെ കരുത്തിൽ 5ജി സേവനങ്ങൾ വികസിപ്പിക്കാനാണ് കമ്പനി ലക്ഷ്യമിടുന്നത്.

അടുത്ത ഒരു വർഷത്തിനുള്ളിൽ നെറ്റ്‌വർക്ക് ശേഷി ഗണ്യമായി വർധിപ്പിക്കുകയാണ് പുതിയ ടവറുകൾ സ്ഥാപിക്കുന്നതിലൂടെ ലക്ഷ്യമിടുന്നത്. കൂടുതൽ പ്രദേശങ്ങളിൽ മെച്ചപ്പെട്ട കണക്റ്റിവിറ്റിയും സേവനങ്ങളും ലഭ്യമാക്കാൻ ഇതിലൂടെ സാധിക്കുമെന്നാണ് പ്രതീക്ഷ.

ഉപഭോക്തൃ സേവനം മെച്ചപ്പെടുത്തുന്നതിനായി ‘വാണി’ എന്ന എ.ഐ അധിഷ്ഠിത ചാറ്റ്ബോട്ടും ബി.എസ്.എൻ.എൽ അവതരിപ്പിച്ചിട്ടുണ്ട്. പ്രാദേശിക ഭാഷകളിൽ ആശയവിനിമയം നടത്തി നെറ്റ്‌വർക്ക് പ്രശ്നങ്ങൾ തിരിച്ചറിയാനും ആവശ്യമായ പരാതികൾ രജിസ്റ്റർ ചെയ്യാനും ഈ സംവിധാനത്തിലൂടെ സാധിക്കും.

ഉപഭോക്താക്കളുടെ ഡാറ്റാ സുരക്ഷ വർധിപ്പിക്കുന്നതിനായി സൈബർ സുരക്ഷാ സ്ഥാപനമായ സാപ്താങുമായി സഹകരിച്ച് ഡാറ്റ ഫിൽട്ടറിങ് സംവിധാനവും നടപ്പാക്കുന്നുണ്ട്. അപകടകരമായ ഡാറ്റാ ട്രാഫിക് ഉപഭോക്താക്കളുടെ ഫോണുകളിലേക്ക് എത്തുന്നതിന് മുമ്പ് നെറ്റ്‌വർക്ക് തലത്തിൽ തിരിച്ചറിയുകയും തടയുകയുമാണ് ലക്ഷ്യം.

സർക്കാർ ഏജൻസികൾക്കും ബാങ്കുകൾ, വൈദ്യുതി-ജല വിതരണ സ്ഥാപനങ്ങൾ തുടങ്ങിയ സേവനദാതാക്കൾക്കും ഉപഭോക്താക്കളുമായി ഒരൊറ്റ സംവിധാനത്തിലൂടെ ആശയവിനിമയം നടത്താൻ സഹായിക്കുന്ന ‘ഭാരത് സന്ദേശ്’ എന്ന ഡിജിറ്റൽ പ്ലാറ്റ്‌ഫോമും ബി.എസ്.എൻ.എൽ അവതരിപ്പിച്ചു.

രാജ്യത്ത് തദ്ദേശീയ ടെലികോം സാങ്കേതികവിദ്യ ശക്തിപ്പെടുത്തുന്നതിനും ഡിജിറ്റൽ സേവനങ്ങൾ കൂടുതൽ ജനങ്ങളിലേക്ക് എത്തിക്കുന്നതിനുമുള്ള ശ്രമങ്ങളുടെ ഭാഗമായാണ് ഈ നീക്കങ്ങൾ. 4ജി ശൃംഖലയുടെ വിപുലീകരണവും 5ജി സേവനങ്ങളുടെ വികസനവും പൂർത്തിയാകുന്നതോടെ ബി.എസ്.എൻ.എല്ലിന്റെ സേവനശേഷിയിൽ വലിയ മാറ്റമുണ്ടാകുമെന്നാണ് പ്രതീക്ഷ.