കടക്ക് പുറത്തെന്ന് പറഞ്ഞ് പ്രതിഷേധക്കാരെ ആട്ടിയിട്ടില്ല’; പിണറായിക്ക് മറുപടിയുമായി റോജി എം. ജോൺ

കൊച്ചി: മഹാരാജാസ് കോളേജിലെ എസ്.എഫ്.ഐ പ്രതിഷേധവുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയന്റെ വിമർശനങ്ങൾക്ക് പരിഹാസരൂപേണ മറുപടിയുമായി ഉന്നതവിദ്യാഭ്യാസ മന്ത്രി റോജി എം. ജോൺ. പ്രതിഷേധക്കാരെ ‘കടക്ക് പുറത്ത്’ എന്നോ ‘വീട്ടിൽ പോയി ചോദിക്കാനോ’ പറഞ്ഞ് ആട്ടിയോടിക്കാത്തതാണ് തന്റെ ഭാഗത്തുനിന്നുണ്ടായ തെറ്റെന്ന് മന്ത്രി പരിഹസിച്ചു.

‘അല്ലയോ പ്രതിപക്ഷ നേതാവേ… എന്റെ ഭാഗത്തും തെറ്റുണ്ട്. അങ്ങ് പറഞ്ഞത് പോലെ കടക്ക് പുറത്തെന്നോ, വീട്ടിൽ പോയി ചോദിക്കാനോ പറഞ്ഞ് പ്രതിഷേധക്കാരെ ആട്ടിവിട്ട് അങ്ങയെപ്പോലെ ഉന്നതമായ ജനാധിപത്യബോധം ഞാനും കാണിക്കണമായിരുന്നു’ എന്നാണ് റോജി എം. ജോൺ ഫെയ്‌സ്ബുക്ക് പോസ്റ്റിൽ കുറിച്ചത്.

ചെടിച്ചട്ടിയോ ഹെൽമറ്റോ നൽകി ആളുകളെക്കൊണ്ട് ‘രക്ഷാപ്രവർത്തനം’ നടത്തിക്കുകയോ കറുത്ത ബാനർ, മാസ്ക്, വസ്ത്രം എന്നിവയ്ക്ക് വിലക്കേർപ്പെടുത്തുകയോ ചെയ്യണമായിരുന്നുവെന്നും പിണറായി വിജയന്റെ മുൻകാല നിലപാടുകളെ പരാമർശിച്ച് മന്ത്രി പരിഹസിച്ചു.

‘അങ്ങയുടെ സഹപ്രവർത്തകരെപ്പോലെ മുദ്രാവാക്യം വിളി കേട്ടാൽ കഴുത്തുളുക്കുന്ന പ്രശ്നം എനിക്കില്ല. എനിക്ക് ജനാധിപത്യത്തിന്റെ ഭാഷയേ വശമുള്ളൂ. അതെന്റെ കുറവാണെങ്കിൽ അതങ്ങനെ തന്നെ തുടരട്ടെ’ എന്നും റോജി എം. ജോൺ കുറിച്ചു.

മഹാരാജാസ് കോളേജിലെ ബിരുദദാന ചടങ്ങിനിടെ എസ്.എഫ്.ഐ പ്രവർത്തകർ മന്ത്രിക്കെതിരെ പ്രതിഷേധിച്ചിരുന്നു. പ്രതിഷേധത്തിനിടെ വിദ്യാർഥികളെ പ്രതിചേർത്ത് പൊലീസ് നടപടി സ്വീകരിച്ചതും എസ്.എഫ്.ഐ പ്രവർത്തക നഫീസത്തുൽ മിസ്രിയക്കെതിരായ സൈബർ ആക്രമണവും ചൂണ്ടിക്കാട്ടി പിണറായി വിജയൻ മന്ത്രിക്കെതിരെ വിമർശനം ഉന്നയിച്ചിരുന്നു. ഇതിന് പിന്നാലെയാണ് റോജി എം. ജോണിന്റെ മറുപടി.

പ്രതിഷേധത്തെ ജനാധിപത്യവിരുദ്ധമെന്ന് വിശേഷിപ്പിച്ച മന്ത്രിക്കെതിരെ പിണറായി വിജയൻ നടത്തിയ വിമർശനങ്ങളും മന്ത്രിയുടെ പരിഹാസമടങ്ങിയ മറുപടിയും കേരള രാഷ്ട്രീയത്തിൽ പുതിയ വാക്പോരിന് വഴിവെച്ചിരിക്കുകയാണ്.