ഫർഹാന്റെ വിയോഗം വിശ്വസിക്കാനാകാതെ ഉബൈദ്; “അവന്റെ ഉമ്മയ്ക്കും ഉപ്പയ്ക്കും ഒരു മകനെപ്പോലെ ഞാനുണ്ടാകും”

കൊച്ചി: സുഹൃത്തും ക്യാമറാമാനുമായ ഫർഹാന്റെ അപ്രതീക്ഷിത വിയോഗത്തിൽ ഹൃദയഭേദക കുറിപ്പ് പങ്കുവെച്ച് വ്ലോഗർ ഉബൈദ്. കഴിഞ്ഞ ദിവസം എറണാകുളം കടവന്ത്രയിലെ ഗ്രൗണ്ട് ഗാലറി പാർക്കിലാണ് ഫർഹാനെ മരിച്ച നിലയിൽ കണ്ടെത്തിയത്. ഊഞ്ഞാലിന്റെ ചങ്ങല കഴുത്തിൽ കുരുങ്ങിയ നിലയിലായിരുന്നു മൃതദേഹം.

തനിക്കൊപ്പം നിഴൽപോലെ എല്ലാ യാത്രകളിലും കൂടെയുണ്ടായിരുന്ന സുഹൃത്തായിരുന്നു ഫർഹാനെന്നും അവന്റെ വിയോഗം ഇപ്പോഴും വിശ്വസിക്കാനാകുന്നില്ലെന്നും ഉബൈദ് സമൂഹമാധ്യമത്തിൽ പങ്കുവെച്ച കുറിപ്പിൽ പറയുന്നു.

ഇൻസ്റ്റഗ്രാമിൽ ലഭിച്ച ഒരു സന്ദേശത്തിലൂടെയാണ് ഫർഹാനെ പരിചയപ്പെട്ടത്. പിന്നീട് ഒന്നര വർഷത്തോളം തന്റെ ക്യാമറാമാനായി കൂടെയുണ്ടായിരുന്നു. വെറുമൊരു ക്യാമറാമാൻ എന്നതിലുപരി നല്ലൊരു സുഹൃത്തായിരുന്നു ഫർഹാനെന്നും ഉബൈദ് ഓർക്കുന്നു.

സ്വന്തമായി ഒരു ബിസിനസ് ആരംഭിക്കണമെന്ന വലിയ ആഗ്രഹം ഫർഹാനുണ്ടായിരുന്നു. അതിനായുള്ള ശ്രമങ്ങളിലായിരുന്നു കഴിഞ്ഞ കുറച്ചുനാളുകളായി. ഏകദേശം രണ്ടു മാസമായി ഫർഹാൻ തന്റെ കൂടെയുണ്ടായിരുന്നില്ലെന്നും വീട്ടിലെ ആശുപത്രി സംബന്ധമായ തിരക്കുകൾ കാരണം താനും തിരക്കിലായിരുന്നുവെന്നും ഉബൈദ് കുറിച്ചു.

പെൺസുഹൃത്തിനൊപ്പമായിരുന്നുവെന്നാണ് വിവരം. ഇരുവരും തമ്മിൽ അവിടെവെച്ച് തർക്കമുണ്ടായെന്നും പിന്നാലെ ഫർഹാൻ ഊഞ്ഞാലിന്റെ ചങ്ങല കഴുത്തിൽ കുരുക്കുകയായിരുന്നുവെന്നുമാണ് പൊലീസിന്റെ പ്രാഥമിക നിഗമനം. സംഭവത്തിൽ കൂടുതൽ സത്യങ്ങൾ പുറത്തുവരേണ്ടതുണ്ടെന്നും പൊലീസിൽനിന്ന് ലഭിച്ച പ്രാഥമിക വിവരങ്ങൾ മാത്രമാണ് തനിക്ക് അറിയാവുന്നതെന്നും ഉബൈദ് വ്യക്തമാക്കി.

ഏറ്റവും കൂടുതൽ വേദനിപ്പിക്കുന്നത് ഫർഹാൻ മാതാപിതാക്കളുടെ ഏക മകനായിരുന്നുവെന്ന കാര്യമാണെന്നും ഉബൈദ് പറയുന്നു. ഫർഹാന്റെ കുടുംബത്തോടൊപ്പം സത്യം പുറത്തുവരുന്നതുവരെ താനുണ്ടാകുമെന്നും ജീവിതകാലം മുഴുവൻ അവന്റെ ഉമ്മയ്ക്കും ഉപ്പയ്ക്കും ഒരു മകനെപ്പോലെ കൂടെയുണ്ടാകുമെന്നും ഉബൈദ് വാക്കുനൽകി.

“ഫർഹാൻ, നീ എനിക്ക് ആരായിരുന്നുവെന്ന് ഒരുപക്ഷേ നിനക്ക് പോലും അറിയില്ലായിരുന്നിരിക്കാം. നീ തന്ന സൗഹൃദവും സ്നേഹവും ഒരിക്കലും മറക്കില്ല” എന്ന ഉബൈദിന്റെ വാക്കുകൾ സമൂഹമാധ്യമങ്ങളിൽ ശ്രദ്ധ നേടുകയാണ്.