‘വോട്ട് ബച്ചാവോ, ദേശ് ബച്ചാവോ’; ഡൽഹിയിൽ ഇന്ത്യ സഖ്യത്തിന്റെ പ്രതിഷേധ റാലി ഇന്ന്

ന്യൂഡൽഹി: വോട്ടവകാശം സംരക്ഷിക്കണമെന്ന മുദ്രാവാക്യമുയർത്തി ഇന്ത്യ സഖ്യത്തിന്റെ നേതൃത്വത്തിൽ ഇന്ന് ഡൽഹിയിലെ രാംലീല മൈതാനത്ത് വൻ പ്രതിഷേധ റാലി. 'വോട്ട് ബച്ചാവോ, ദേശ് ബച്ചാവോ' എന്ന പേരിൽ സംഘടിപ്പിക്കുന്ന പരിപാടിയിൽ 21 പ്രതിപക്ഷ പാർട്ടികളുടെ നേതാക്കളും പ്രവർത്തകരും പങ്കെടുക്കും. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി, വോട്ടർപട്ടികയുടെ പ്രത്യേക തീവ്ര പരിഷ്കരണമായ എസ്‌ഐആർ റദ്ദാക്കൽ, പേപ്പർ ബാലറ്റ് സംവിധാനം തിരികെ കൊണ്ടുവരൽ തുടങ്ങിയ ആവശ്യങ്ങളാണ് റാലിയിൽ ഉയർത്തുന്നത്.

മിന്റോ റോഡ്–കണോട്ട് പ്ലേസ് ജംഗ്ഷനിൽനിന്ന് ഉച്ചയ്ക്ക് 12 മണിക്ക് ആരംഭിക്കുന്ന 'ചലോ ദില്ലി' മാർച്ച് രാംലീല മൈതാനത്ത് സമാപിക്കും. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽനിന്ന് തുറന്ന ബസുകളിൽ പ്രതിപക്ഷ നേതാക്കൾ മാർച്ച് ആരംഭിക്കുന്ന സ്ഥലത്തെത്തും. തുടർന്ന് നടക്കുന്ന പൊതുസമ്മേളനത്തിൽ പ്രമുഖ നേതാക്കൾ സംസാരിക്കും.

വോട്ടർപട്ടികയുടെ പരിഷ്കരണത്തിന്റെ പേരിൽ അർഹരായ വോട്ടർമാരുടെ പേരുകൾ വ്യാപകമായി ഒഴിവാക്കപ്പെടുന്നുവെന്നാണ് പ്രതിപക്ഷത്തിന്റെ പ്രധാന ആരോപണം. തിരഞ്ഞെടുപ്പ് കമ്മിഷന്റെ നിഷ്പക്ഷതയും സ്വതന്ത്ര പ്രവർത്തനവും ചോദ്യം ചെയ്തുകൊണ്ടാണ് ഇന്ത്യ സഖ്യം പ്രക്ഷോഭം ശക്തമാക്കുന്നത്. വോട്ടവകാശം സംരക്ഷിക്കുന്നതിൽ തിരഞ്ഞെടുപ്പ് കമ്മിഷൻ പരാജയപ്പെട്ടുവെന്നും പ്രതിപക്ഷം ആരോപിക്കുന്നു.

റാലിക്ക് മുന്നോടിയായി ശനിയാഴ്ച കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിൽ പ്രതിപക്ഷ എംപിമാർ പ്രതീകാത്മക ഇംപീച്ച്‌മെന്റ് നടപടിയും സംഘടിപ്പിച്ചിരുന്നു. മുൻ ലോക്‌സഭാ സ്പീക്കർ മീരാ കുമാറിന്റെ അധ്യക്ഷതയിൽ നടന്ന പരിപാടിയിൽ ഗ്യാനേഷ് കുമാറിനെതിരെ പ്രമേയം അവതരിപ്പിച്ചു. ഏകദേശം 250 പ്രതിപക്ഷ എംപിമാർ പങ്കെടുത്ത പരിപാടി ഔദ്യോഗിക ഇംപീച്ച്‌മെന്റ് നടപടിയല്ല, മറിച്ച് പ്രതിഷേധത്തിന്റെ ഭാഗമായുള്ള പ്രതീകാത്മക പരിപാടിയായിരുന്നു.

റാലിയിൽ പങ്കെടുക്കാൻ വിദ്യാർഥികൾ, യുവാക്കൾ, തൊഴിലാളികൾ, സ്ത്രീകൾ, സാമൂഹിക സംഘടനകൾ എന്നിവരോടും ഇന്ത്യ സഖ്യം ആഹ്വാനം ചെയ്തിട്ടുണ്ട്. രാഹുൽ ഗാന്ധിയും കോൺഗ്രസ് സംഘടനാ ജനറൽ സെക്രട്ടറി കെ.സി. വേണുഗോപാലും രാജ്യത്തിന്റെ വിവിധ ഭാഗങ്ങളിൽനിന്നുള്ള ജനങ്ങളോട് പ്രതിഷേധത്തിൽ പങ്കുചേരാൻ അഭ്യർഥിച്ചിരുന്നു.

റാലിയുടെ പശ്ചാത്തലത്തിൽ ഡൽഹിയിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്. നാലായിരത്തിലധികം പൊലീസ് ഉദ്യോഗസ്ഥരെയും കേന്ദ്രസേനയെയും വിന്യസിച്ചിട്ടുണ്ട്. 200-ലധികം സിസിടിവി ക്യാമറകൾ, ഡ്രോണുകൾ, മറ്റ് നിരീക്ഷണ സംവിധാനങ്ങൾ എന്നിവയും ഉപയോഗിക്കും. ഡൽഹിയിലെ പ്രധാന റോഡുകളിൽ രാവിലെ 10 മുതൽ വൈകിട്ട് 5 വരെ ഗതാഗത നിയന്ത്രണങ്ങളും ഏർപ്പെടുത്തിയിട്ടുണ്ട്.

വോട്ടർപട്ടികയിലെ ക്രമക്കേടുകൾക്കെതിരായ പ്രക്ഷോഭം ദേശീയതലത്തിൽ ശക്തമാക്കുന്നതിന്റെ ഭാഗമായാണ് ഇന്ത്യ സഖ്യം ഡൽഹിയിൽ ശക്തിപ്രകടനത്തിന് ഒരുങ്ങുന്നത്.