ബാറുകളിൽ മദ്യം നൽകുംമുമ്പ് ആധാർ പരിശോധിക്കണം; 23 വയസ്സ് നിർബന്ധം, കർശന നിർദേശവുമായി മന്ത്രി എം. ലിജു

തിരുവനന്തപുരം: സംസ്ഥാനത്തെ ബാറുകളിൽ മദ്യം വിളമ്പുന്നതിന് മുമ്പ് ഉപഭോക്താക്കളുടെ ആധാർ കാർഡ് പരിശോധിച്ച് പ്രായം ഉറപ്പുവരുത്തണമെന്ന് എക്സൈസ് മന്ത്രി എം. ലിജുവിന്റെ കർശന നിർദേശം. 23 വയസ്സ് പൂർത്തിയാകാത്തവർക്ക് മദ്യം നൽകാൻ പാടില്ലെന്നും പ്രായപരിധി കർശനമായി പാലിക്കണമെന്നും മന്ത്രി വ്യക്തമാക്കി.

ബാറുകളിൽ മദ്യപിക്കാനെത്തുന്നവരുടെ ആധാർ കാർഡ് പരിശോധിക്കേണ്ടത് അതത് ബാർ ലൈസൻസികളുടെ ഉത്തരവാദിത്തമാണ്. പ്രായം ഉറപ്പുവരുത്തിയ ശേഷമേ മദ്യം നൽകാവൂ. നിയമം പാലിക്കുന്നതിൽ വീഴ്ച വരുത്തുന്നവർക്കെതിരെ കർശന നടപടി സ്വീകരിക്കുമെന്ന സൂചനയും മന്ത്രി നൽകി.

നെടുമ്പാശ്ശേരി മിനി കൂപ്പർ വാഹനാപകടത്തിന്റെ പശ്ചാത്തലത്തിലാണ് പ്രായപരിധി പാലിക്കേണ്ടതിന്റെ ആവശ്യകത മന്ത്രി വീണ്ടും ചൂണ്ടിക്കാട്ടിയത്. പ്രായപൂർത്തിയാകാത്തവർക്ക് മദ്യം ലഭിക്കുന്ന സാഹചര്യം അപകടകരമാണെന്നും നിയമം കർശനമായി നടപ്പാക്കേണ്ടതുണ്ടെന്നും അദ്ദേഹം വ്യക്തമാക്കി.

അതേസമയം, സംസ്ഥാനത്തിന്റെ പുതിയ എക്സൈസ് നയം നവംബറിൽ നിലവിൽ വരുമെന്നും മന്ത്രി അറിയിച്ചു. ഇക്കാര്യം ഹൈക്കോടതിയിലും സർക്കാർ അറിയിച്ചിട്ടുണ്ട്. മുൻ എൽഡിഎഫ് സർക്കാരിന്റെ മദ്യനയത്തിൽ നിന്ന് വ്യത്യസ്തമായിരിക്കും യുഡിഎഫ് സർക്കാരിന്റെ മദ്യനയമെന്നും എം. ലിജു വ്യക്തമാക്കി.

മദ്യവിൽപ്പനയിലും ബാറുകളുടെ പ്രവർത്തനത്തിലും നിയന്ത്രണങ്ങൾ ശക്തമാക്കുന്നതിനൊപ്പം ലഹരിവിരുദ്ധ പ്രവർത്തനങ്ങൾക്കും പുതിയ നയത്തിൽ പ്രാധാന്യം ലഭിക്കുമെന്നാണ് സൂചന.