തടവുകാർക്ക് ആർഭാടം വേണ്ട! മട്ടനും മീനും ഒഴിവാക്കാൻ ജയിൽ വകുപ്പ്

തിരുവനന്തപുരം: സംസ്ഥാനത്തെ ജയിലുകളിലെ തടവുകാർക്ക് നൽകുന്ന ഭക്ഷണക്രമത്തിൽ മാറ്റം വരുത്താൻ ജയിൽ വകുപ്പ് ശുപാർശ. തടവുകാരുടെ ഭക്ഷണത്തിൽ മട്ടനും മീനും ഉൾപ്പെടെയുള്ള വിഭവങ്ങൾ ഒഴിവാക്കുന്നതാണ് നിർദേശത്തിലെ പ്രധാന മാറ്റം. ഭക്ഷണച്ചെലവ് കുറയ്ക്കുന്നതിലൂടെ സർക്കാരിന് വലിയ സാമ്പത്തിക ലാഭമുണ്ടാക്കുകയാണ് ലക്ഷ്യം.

ശുപാർശ അംഗീകരിച്ചാൽ പ്രതിവർഷം ഏകദേശം 10 കോടി രൂപയുടെ ലാഭം സർക്കാരിന് ഉണ്ടാകുമെന്നാണ് കണക്കാക്കുന്നത്. നിലവിലെ ഭക്ഷണക്രമവും ചെലവും വിലയിരുത്തിയ ശേഷമാണ് ജയിൽ വകുപ്പ് പുതിയ നിർദേശം മുന്നോട്ടുവച്ചിരിക്കുന്നത്.

ഭക്ഷണത്തിന്റെ പോഷകമൂല്യം ഉറപ്പാക്കുന്നതിനൊപ്പം അനാവശ്യ ചെലവുകൾ ഒഴിവാക്കുന്നതിനാണ് ഭക്ഷണക്രമം പരിഷ്കരിക്കുന്നതെന്നാണ് വകുപ്പിന്റെ നിലപാട്. നിർദേശം അംഗീകരിച്ചാൽ സംസ്ഥാനത്തെ വിവിധ ജയിലുകളിൽ നിലവിലുള്ള ഭക്ഷണ മെനുവിലും മാറ്റമുണ്ടാകും.