പൊലീസിനെയോ ലാത്തിയെയോ ഭയപ്പെടേണ്ട’; മഹാറാലിയിൽ എല്ലാ വിദ്യാർഥി സംഘടനകളും പങ്കെടുക്കണമെന്ന് രാഹുൽ ഗാന്ധി

 ന്യൂഡൽഹി: പൊലീസിനെയോ ലാത്തിയെയോ ഭയപ്പെടാതെ തെരുവിലിറങ്ങണമെന്നും രാഷ്ട്രീയ ഭേദമന്യേ എല്ലാ വിദ്യാർഥി സംഘടനകളും ഇന്ത്യ മുന്നണിയുടെ മഹാറാലിയിൽ പങ്കെടുക്കണമെന്നും ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. വോട്ടവകാശവും ജനാധിപത്യവും സംരക്ഷിക്കുകയെന്ന ലക്ഷ്യത്തോടെ നവംബർ ഒന്നിന് ഡൽഹിയിലെ രാംലീല മൈതാനത്ത് നടക്കുന്ന മഹാറാലിയിൽ വിദ്യാർഥികളുടെ പങ്കാളിത്തം ഉറപ്പാക്കണമെന്നാണ് അദ്ദേഹം ആവശ്യപ്പെട്ടത്.

രാജ്യത്തെ ജനാധിപത്യ സംവിധാനവും ഭരണഘടനാ മൂല്യങ്ങളും സംരക്ഷിക്കാനുള്ള പോരാട്ടത്തിൽ വിദ്യാർഥികൾ സജീവമായി പങ്കുചേരണമെന്നാണ് രാഹുൽ ഗാന്ധിയുടെ ആഹ്വാനം. രാഷ്ട്രീയമായി വ്യത്യസ്ത നിലപാടുകൾ പുലർത്തുന്ന വിദ്യാർഥി സംഘടനകൾക്കും ഈ പോരാട്ടത്തിൽ പങ്കാളികളാകാമെന്നും വോട്ടവകാശത്തിന്റെ സംരക്ഷണം ഏതെങ്കിലും ഒരു രാഷ്ട്രീയ പാർട്ടിയുടെ മാത്രം വിഷയമല്ലെന്നും അദ്ദേഹം വ്യക്തമാക്കി.

വോട്ടർപട്ടികയുടെ പ്രത്യേക തീവ്ര പരിഷ്‌കരണമായ എസ്‌ഐആറുമായി ബന്ധപ്പെട്ട നടപടികൾക്കെതിരെയും തിരഞ്ഞെടുപ്പ് കമ്മിഷന്റെ പ്രവർത്തനങ്ങളിലെ സുതാര്യത ഉറപ്പാക്കണമെന്നും ആവശ്യപ്പെട്ടാണ് ഇന്ത്യ മുന്നണി പ്രതിഷേധം സംഘടിപ്പിക്കുന്നത്. വോട്ടർപട്ടികയിൽനിന്ന് അർഹരായവരുടെ പേരുകൾ നീക്കം ചെയ്യപ്പെടുന്നുവെന്ന പ്രതിപക്ഷത്തിന്റെ ആരോപണവും പ്രതിഷേധത്തിന് ആക്കം കൂട്ടുന്നു.

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യവും എസ്‌ഐആർ നടപടികൾക്കെതിരായ പ്രതിഷേധവും മഹാറാലിയിൽ പ്രധാന വിഷയങ്ങളാകും. ‘വോട്ട് ബച്ചാവോ, ദേശ് ബച്ചാവോ’ എന്ന മുദ്രാവാക്യമുയർത്തി രാജ്യവ്യാപകമായി നടത്തുന്ന പ്രചാരണത്തിന്റെ ഭാഗമായാണ് ഡൽഹിയിലെ പരിപാടി.

കോൺഗ്രസ് ഉൾപ്പെടെയുള്ള ഇന്ത്യ മുന്നണിയിലെ കക്ഷികൾ റാലിയിൽ പങ്കാളികളാകും. വിവിധ സംസ്ഥാനങ്ങളിൽനിന്ന് പ്രവർത്തകരെയും അനുഭാവികളെയും ഡൽഹിയിലെത്തിക്കാനാണ് സംഘാടകരുടെ നീക്കം. വിദ്യാർഥി സംഘടനകളുടെ പങ്കാളിത്തത്തോടെ പ്രതിഷേധം വിപുലമാക്കാനാണ് രാഹുൽ ഗാന്ധിയുടെ ആഹ്വാനത്തിലൂടെ ലക്ഷ്യമിടുന്നത്.

ജനാധിപത്യ സ്ഥാപനങ്ങളുടെ സ്വതന്ത്രമായ പ്രവർത്തനവും വോട്ടർമാരുടെ അവകാശങ്ങളും സംരക്ഷിക്കണമെന്ന ആവശ്യം ഉയർത്തുന്ന റാലി, കേന്ദ്ര സർക്കാരിനും തിരഞ്ഞെടുപ്പ് കമ്മിഷനുമെതിരായ പ്രതിപക്ഷത്തിന്റെ പ്രതിഷേധത്തിന്റെ അടുത്ത ഘട്ടമാകും.