ബേക്കൽ ഇന്റർനാഷണൽ ബീച്ച് ഫെസ്റ്റ് ഡിസംബർ 23 മുതൽ; സംഘാടകസമിതി രൂപീകരിച്ചു

ബേക്കൽ: കാസർകോടിന്റെ വിനോദസഞ്ചാര സാധ്യതകൾക്ക് കൂടുതൽ പ്രചാരം നൽകാനും സപ്തഭാഷാ സംഗമഭൂമിയുടെ സാംസ്കാരിക വൈവിധ്യം ദേശീയ-അന്തർദേശീയ തലങ്ങളിൽ ശ്രദ്ധേയമാക്കാനും ബേക്കൽ ഇന്റർനാഷണൽ ബീച്ച് ഫെസ്റ്റ് 2K26 സഹായകമാകുമെന്ന് കെ. നീലകണ്ഠൻ എം.എൽ.എ. പറഞ്ഞു. ഡിസംബർ 23 മുതൽ 31 വരെ ഒമ്പത് ദിവസങ്ങളിലായി ബേക്കൽ ബീച്ചിൽ നടക്കുന്ന ഫെസ്റ്റ് ജനപങ്കാളിത്തത്തോടെ വൻ വിജയമാക്കാൻ സംഘാടകസമിതി തീരുമാനിച്ചു.

ബേക്കൽ ബീച്ച് പാർക്കിൽ ചേർന്ന സംഘാടകസമിതി രൂപീകരണ യോഗത്തിൽ കെ. നീലകണ്ഠൻ എം.എൽ.എ. അധ്യക്ഷത വഹിച്ചു. കാസർകോടിന്റെ തനത് പാരമ്പര്യം, പ്രകൃതിഭംഗി, കലാരൂപങ്ങൾ, സാംസ്കാരിക വൈവിധ്യം എന്നിവ കോർത്തിണക്കി ജനകീയ ആഘോഷമായാണ് ഫെസ്റ്റ് സംഘടിപ്പിക്കുന്നത്.

കാസർകോടിന്റെ സാംസ്കാരിക വൈവിധ്യവും ഐക്യവും വിളിച്ചോതുന്ന മഹോത്സവമായി ബേക്കൽ ഇന്റർനാഷണൽ ബീച്ച് ഫെസ്റ്റ് മാറണമെന്ന് കല്ലട്ര മാഹിൻ ഹാജി എം.എൽ.എ. പറഞ്ഞു. ഫെസ്റ്റിലൂടെ ബേക്കലിനെ പ്രധാന വിനോദസഞ്ചാര കേന്ദ്രമായി കൂടുതൽ ഉയർത്തിക്കാട്ടുന്നതിനൊപ്പം പ്രാദേശിക ടൂറിസം മേഖലയ്ക്കും സാമ്പത്തിക പ്രവർത്തനങ്ങൾക്കും ഉണർവ് പകരാനാണ് ലക്ഷ്യമിടുന്നത്.

സംഘാടകസമിതി ഭാരവാഹികൾ

മന്ത്രിമാരായ പി.സി. വിഷ്ണുനാഥ്, കെ.എം. ഷാജി, രാജ്മോഹൻ ഉണ്ണിത്താൻ എം.പി., കല്ലട്ര മാഹിൻ ഹാജി എം.എൽ.എ., എ.കെ.എം. അഷ്റഫ് എം.എൽ.എ., ഗോവിന്ദൻ പള്ളിക്കാപ്പിൽ എം.എൽ.എ., സന്ദീപ് വാര്യർ എം.എൽ.എ. എന്നിവരെ മുഖ്യരക്ഷാധികാരികളായി തിരഞ്ഞെടുത്തു.

കെ. നീലകണ്ഠൻ എം.എൽ.എ. ചെയർമാനായും ജില്ലാ കളക്ടർ ധന്യ സുരേഷ് ജനറൽ കൺവീനറായും ഹക്കീം കുന്നിൽ ചീഫ് കോർഡിനേറ്ററായും ചുമതലയേറ്റു.

ജില്ലാ പഞ്ചായത്ത് വൈസ് പ്രസിഡന്റ് കെ.കെ. സോയ, ജില്ലാ പഞ്ചായത്ത് അംഗങ്ങളായ എം. സുകുമാരി, ടി.വി. രാധിക, വിവിധ തദ്ദേശസ്ഥാപനങ്ങളിലെ ജനപ്രതിനിധികൾ, ആർ.ഡി.ഒ. സുദീപ്, ജില്ലാ ഇൻഫർമേഷൻ ഓഫീസർ എം. മധുസൂദനൻ, ബി.ആർ.ഡി.സി. ജനറൽ മാനേജർ കെ.എം. രവീന്ദ്രൻ, മാനേജർ യു.എസ്. പ്രസാദ്, രാഷ്ട്രീയ പാർട്ടി പ്രതിനിധികൾ, സാമൂഹിക-സാംസ്കാരിക രംഗത്തെ പ്രമുഖർ തുടങ്ങിയവർ യോഗത്തിൽ പങ്കെടുത്തു.

കാസർകോടിന്റെ പാരമ്പര്യവും കലാ-സാംസ്കാരിക വൈവിധ്യവും പ്രകൃതിഭംഗിയും ഒരുമിക്കുന്ന ഫെസ്റ്റിലൂടെ ബേക്കലിന്റെ വിനോദസഞ്ചാര പ്രാധാന്യം കൂടുതൽ ഉയർത്താനും ജില്ലയുടെ സാംസ്കാരിക മുഖം വിശാലമായ വേദികളിൽ അവതരിപ്പിക്കാനുമാണ് സംഘാടകസമിതി ലക്ഷ്യമിടുന്നത്.