ഹോസ്റ്റലിലെ ലഹരി ഉപയോഗം അധ്യാപകരെ അറിയിച്ചതിന് 19കാരന് ക്രൂരമർദനം; വലത് വൃഷണം നീക്കം ചെയ്തു

ഹോസ്റ്റലിലെ ലഹരി ഉപയോഗം അധ്യാപകരെ അറിയിച്ചതിന് 19കാരന് ക്രൂരമർദനം; വലത് വൃഷണം നീക്കം ചെയ്തു

തൊടുപുഴ: ഹോസ്റ്റലിൽ ലഹരി ഉപയോഗിക്കുന്നത് അധ്യാപകരെ അറിയിച്ചതിന്റെ പേരിൽ 19കാരനായ വിദ്യാർഥിക്ക് സഹപാഠിയുടെ ക്രൂരമർദനം. ഇടുക്കി സ്വദേശിയായ വിദ്യാർഥിക്കാണ് ആക്രമണത്തിൽ ഗുരുതരമായി പരിക്കേറ്റത്. സ്വകാര്യഭാഗത്തേറ്റ ഗുരുതര പരിക്കിനെ തുടർന്ന് കോട്ടയം മെഡിക്കൽ കോളേജ് ആശുപത്രിയിൽ ശസ്ത്രക്രിയ നടത്തി വലത് വൃഷണം നീക്കം ചെയ്തു.

മൊബൈൽഫോൺ–ലാപ്‌ടോപ്പ് സർവീസ് കോഴ്‌സ് പഠിക്കുന്നതിനായി തൊടുപുഴയിലെത്തിയ വിദ്യാർഥിക്കാണ് ദുരനുഭവമുണ്ടായത്. ഹോസ്റ്റലിൽ സഹപാഠികൾ ലഹരി ഉപയോഗിക്കുന്ന വിവരം അധ്യാപകരെ അറിയിച്ചതാണ് ആക്രമണത്തിന് കാരണമെന്നാണ് പരാതിയിൽ പറയുന്നത്.

വിവരം അറിഞ്ഞതിനെ തുടർന്ന് സഹപാഠിയായ പ്രായപൂർത്തിയാകാത്ത വിദ്യാർഥി 19കാരനെ മർദിക്കുകയായിരുന്നു. മർദനത്തിനിടെ സ്വകാര്യഭാഗത്തും ഗുരുതരമായി പരിക്കേറ്റു. തുടർന്ന് ആരോഗ്യനില മോശമായതോടെ ആശുപത്രിയിൽ പ്രവേശിപ്പിച്ചു. പരിശോധനയിൽ വലത് വൃഷണത്തിന് ഗുരുതരമായ പരിക്കേറ്റതായി കണ്ടെത്തി. പിന്നീട് കോട്ടയം മെഡിക്കൽ കോളേജിൽ ശസ്ത്രക്രിയ നടത്തി വലത് വൃഷണം നീക്കം ചെയ്യേണ്ടിവന്നു.

സംഭവത്തിൽ തൊടുപുഴ പൊലീസ് പ്രായപൂർത്തിയാകാത്ത പ്രതിയെ കസ്റ്റഡിയിലെടുത്തിരുന്നു. തുടർന്ന് കോടതിയിൽ ഹാജരാക്കിയ പ്രതിക്ക് ജാമ്യം അനുവദിച്ചു.

ക്യാൻസർ ബാധിതനായ പിതാവിന്റെ ചികിത്സാച്ചെലവുകൾക്കിടയിലും വായ്പയെടുത്താണ് യുവാവ് പഠനത്തിനായി തൊടുപുഴയിലെത്തിയത്. കുടുംബത്തിന്റെ സാമ്പത്തിക ബുദ്ധിമുട്ടുകൾക്കിടയിൽ തൊഴിൽപരമായ ഒരു കോഴ്‌സ് പഠിച്ച് മുന്നോട്ട് പോകാനുള്ള ശ്രമത്തിലായിരുന്നു വിദ്യാർഥി. ഇതിനിടെയാണ് ഹോസ്റ്റലിലെ സംഭവത്തെ തുടർന്ന് ഗുരുതരമായ ആക്രമണത്തിന് ഇരയായത്.

സംഭവത്തിൽ ഹോസ്റ്റലിൽ ലഹരി ഉപയോഗിച്ചിരുന്നുവെന്ന ആരോപണം ഉൾപ്പെടെ പൊലീസ് പരിശോധിച്ചുവരികയാണ്. വിദ്യാർഥിയെ ആക്രമിക്കാനുണ്ടായ സാഹചര്യം, സംഭവത്തിന് പിന്നിൽ മറ്റാരുടെയെങ്കിലും ഇടപെടലുണ്ടോയെന്നത് തുടങ്ങിയ കാര്യങ്ങളും അന്വേഷണത്തിന്റെ ഭാഗമായി പരിശോധിക്കുന്നുണ്ട്.

സംഭവത്തിൽ വിദ്യാർഥിയുടെ കുടുംബം കടുത്ത ആശങ്കയിലാണ്. ഹോസ്റ്റലുകളിലെ ലഹരി ഉപയോഗവും വിദ്യാർഥികൾ തമ്മിലുള്ള അക്രമങ്ങളും തടയാൻ അധികൃതരും വിദ്യാഭ്യാസ സ്ഥാപനങ്ങളും ശക്തമായ നടപടി സ്വീകരിക്കണമെന്ന ആവശ്യവും ഉയരുന്നുണ്ട്.