പ്രായപൂർത്തിയാകാത്ത പെൺകുട്ടിയുടെ വീട്ടിൽ അതിക്രമിച്ച് കയറി; യുവാവിനെതിരെ പോക്സോ കേസ്, മോചിപ്പിക്കാൻ എത്തിയ സംഘവും പ്രതികൾ
താമരശ്ശേരിയിൽ അർധരാത്രി നാടകീയ സംഭവം; മുറിയിൽ പൂട്ടിയ യുവാവിനെ സുഹൃത്തുക്കൾ വീട് ആക്രമിച്ച് രക്ഷപ്പെടുത്തി, ഏഴുപേർക്കെതിരെ കേസ്
Desk Mediagraamam 
കോഴിക്കോട്: താമരശ്ശേരിയിൽ പ്രായപൂർത്തിയാകാത്ത പെൺകുട്ടിയുടെ വീട്ടിൽ അതിക്രമിച്ച് കയറിയ യുവാവിനെതിരെ പോക്സോ നിയമപ്രകാരം പൊലീസ് കേസെടുത്തു. അടിവാരം സ്വദേശിയായ മിഷ്ബാഹുൽ ആണ് കേസിലെ പ്രതി.
ഞായറാഴ്ച അർധരാത്രിയോടെയാണ് യുവാവ് പെൺകുട്ടിയുടെ മുറിയിലേക്ക് കടന്നത്. സംഭവം അറിഞ്ഞ വീട്ടുകാർ മുറി പുറത്തുനിന്ന് പൂട്ടി പൊലീസിനെ വിവരം അറിയിക്കുകയായിരുന്നു.
ഇതിനിടെ വിവരമറിഞ്ഞെത്തിയ മിഷ്ബാഹുലിന്റെ സുഹൃത്തുക്കൾ സംഘം ചേർന്ന് വീട് ആക്രമിച്ച് ഇയാളെ മോചിപ്പിച്ചതായാണ് പൊലീസ് പറയുന്നത്. വീടിനും വീട്ടിലുള്ളവർക്കും നേരെ ആക്രമണം നടത്തിയ ശേഷമാണ് സംഘം യുവാവിനൊപ്പം മടങ്ങിയത്.
സംഭവവുമായി ബന്ധപ്പെട്ട് മിഷ്ബാഹുലിനെതിരെ പോക്സോ നിയമപ്രകാരവും, ആക്രമണത്തിൽ പങ്കെടുത്ത മറ്റ് ആറ് സുഹൃത്തുക്കൾക്കെതിരെ വീടുകയറി ആക്രമണം ഉൾപ്പെടെയുള്ള വകുപ്പുകൾ ചുമത്തിയും പൊലീസ് കേസെടുത്തിട്ടുണ്ട്.
പ്രാഥമിക അന്വേഷണത്തിൽ, ഇൻസ്റ്റഗ്രാം വഴി യുവാവ് പെൺകുട്ടിയുമായി അടുപ്പം സ്ഥാപിക്കാൻ ശ്രമിച്ചിരുന്നതായും ഇരുവരും പരസ്പരം സന്ദേശങ്ങൾ കൈമാറിയിരുന്നതായും പൊലീസിന് സൂചന ലഭിച്ചിട്ടുണ്ട്. സംഭവത്തിന് തൊട്ടുമുമ്പും ഇരുവരും ചാറ്റ് നടത്തിയിരുന്നതായി കണ്ടെത്തിയിട്ടുണ്ട്. എന്നാൽ അർധരാത്രിയിൽ യുവാവ് വീട്ടിലെത്താൻ കാരണമായ സാഹചര്യം എന്താണെന്നത് ഉൾപ്പെടെ എല്ലാ വശങ്ങളും പൊലീസ് വിശദമായി അന്വേഷിച്ചുവരികയാണ്.
