പഴയ കോച്ചുകൾ മാറി, പക്ഷെ നടുവേദന മാറില്ല! ജനശതാബ്ദിയിലെ പുതിയ 'കല്ല്' സീറ്റുകൾക്കെതിരെ അമർഷം പുകയുന്നു

പുതിയ എൽ.എച്ച്.ബി കോച്ചുകൾ അനുവദിച്ചതോടെ ജനശതാബ്ദി എക്സ്പ്രസിലെ യാത്ര കൂടുതൽ സുഖകരമാകുമെന്ന് കരുതിയ യാത്രക്കാർക്ക് നിരാശ. തിരുവനന്തപുരം– കണ്ണൂർ, തിരുവനന്തപുരം– കോഴിക്കോട് ജനശതാബ്ദി ട്രെയിനുകളിലെ പുതിയ സ്റ്റെയിൻലെസ് സ്റ്റീൽ കോച്ചുകളിലെ സീറ്റുകൾ സംബന്ധിച്ച് വ്യാപക പരാതി ഉയർന്നിട്ടും ഡിസൈനിൽ മാറ്റം വരുത്താൻ റെയിൽവേ തയ്യാറാകുന്നില്ല.

പഴയ ഐ.സി.എഫ്  കോച്ചുകൾ മാറ്റി പകരം ജർമൻ സാങ്കേതികവിദ്യയിൽ നിർമിച്ച പുതിയ എൽ.എച്ച്.ബി കോച്ചുകൾ അനുവദിച്ചപ്പോൾ തുരുമ്പെടുത്ത പഴയ ട്രെയിനുകളിൽ നിന്ന് മുക്തി ലഭിച്ചതിൽ യാത്രക്കാർ സന്തോഷിച്ചിരുന്നു. എന്നാൽ യാത്ര ചെയ്തപ്പോഴാണ് പഴയ സീറ്റുകളായിരുന്നു കൂടുതൽ ഭേദമെന്ന് തിരിച്ചറിഞ്ഞത്.

പുതിയ കോച്ചുകളിലെ സീറ്റുകൾക്ക് ഒട്ടും ചരിവോ ആവശ്യത്തിന് മൃദുത്വമോ  ഇല്ലെന്നതാണ് പ്രധാന പ്രശ്നം. പഴയ കോച്ചുകളിൽ ഉണ്ടായിരുന്ന പുഷ്ബാക്ക് സംവിധാനം പെട്ടെന്ന് കേടുവരുമെന്ന കാരണം ചൂണ്ടിക്കാട്ടിയാണ് റെയിൽവേ ഒഴിവാക്കിയത്. എന്നാൽ ഈ സീറ്റുകളിലിരുന്ന് തലസ്ഥാനത്തുനിന്ന് കോഴിക്കോട് വരെയോ കണ്ണൂർ വരെയോ നീളുന്ന ദീർഘദൂര യാത്രകൾ ചെയ്യുന്നത് കടുത്ത നടുവേദനയ്ക്കും ശാരീരിക ബുദ്ധിമുട്ടുകൾക്കും ഇടയാക്കുന്നുവെന്ന് യാത്രക്കാർ ചൂണ്ടിക്കാണിക്കുന്നു. പുഷ്ബാക്ക് സൗകര്യം ഇല്ലെങ്കിലും സീറ്റുകൾക്ക് ചെറിയൊരു Fixed Recline നൽകിയാൽ യാത്ര കൂടുതൽ ആശ്വാസകരമാകും.

സീറ്റുകൾക്ക് പുറമേ, പുതിയ കോച്ചുകളിലെ ശുചിമുറികളുടെ നിർമാണത്തിലും അപാകതകളുണ്ട്. വെള്ളം ഒഴുകിപ്പോകാനുള്ള കൃത്യമായ ചരിവ് തറയിൽ നൽകാത്തതിനാൽ പല കോച്ചുകളിലെയും ശുചിമുറികളിൽ വെള്ളം കെട്ടിനിൽക്കുന്ന സ്ഥിതിയാണുള്ളത്.

ലക്നൗവിലെ റിസർച്ച് ഡിസൈൻസ് ആൻഡ് സ്റ്റാൻഡേർഡ്സ് ഓർഗനൈസേഷനാണ് (RDSO) റെയിൽവേ കോച്ചുകളുടെ ഡിസൈനുകൾക്ക് അംഗീകാരം നൽകുന്നത്. ഇത്തരം സ്ഥാപനങ്ങളിലെ വിദഗ്ധരും റെയിൽവേ ഉന്നത ഉദ്യോഗസ്ഥരും സാധാരണ കോച്ചുകളിൽ യാത്ര ചെയ്യാത്തതിനാലാണ് യാത്രക്കാരുടെ ഈ പ്രായോഗിക ബുദ്ധിമുട്ടുകൾ മേലധികാരികളുടെ ശ്രദ്ധയിൽപ്പെടാത്തതെന്നും വിമർശനമുണ്ട്.

യാത്രക്കാർ ആഗ്രഹിക്കുന്ന ഇരിപ്പിടങ്ങൾ എങ്ങനെ?

സൗകര്യപ്രദമായ ചരിവ്: പിന്നിലേക്ക് ചായ്ക്കാൻ സാധിച്ചില്ലെങ്കിലും ദീർഘദൂര യാത്രകളിൽ നടുവിന് ആശ്വാസം നൽകുന്ന രീതിയിലുള്ള സ്ഥിരമായ ചരിവ്.

മെച്ചപ്പെട്ട മൃദുത്വം: മണിക്കൂറുകളോളം ഇരിക്കുമ്പോൾ കാഠിന്യം അനുഭവപ്പെടാത്ത രീതിയിലുള്ള മികച്ച കുഷ്യനിങ്.

കൃത്യമായ കാൽ അകലം: മുൻപിലെ ഇരിപ്പിടവുമായി തട്ടാത്ത രീതിയിലും കാൽമുട്ടുകൾക്ക് ആശ്വാസം നൽകുന്ന തരത്തിലുമുള്ള അകലം.

മടക്കിവെക്കാവുന്ന ടേബിൾ: കൈവശമുള്ള സാധനങ്ങൾ വെക്കാനും ഭക്ഷണം കഴിക്കാനും തടസ്സമില്ലാത്ത, ദൃഢതയുള്ള മടക്കുമേശകൾ.

ചാർജിങ് പോയിന്റുകൾ: ഓരോ ഇരിപ്പിടത്തിനടുത്തും എളുപ്പത്തിൽ ഉപയോഗിക്കാവുന്ന തരത്തിലുള്ള മൊബൈൽ ചാർജിങ് സൗകര്യങ്ങൾ.