ഒരു ചെറിയ അബദ്ധം... ലക്ഷങ്ങളുടെ നഷ്ടം! പെട്രോൾ കാറിൽ ഡീസലോ, ഡീസൽ കാറിൽ പെട്രോളോ നിറച്ചാൽ എന്തുപറ്റും?

വാഹനം ഓടിക്കുന്നവരിൽ പലർക്കും ജീവിതത്തിൽ ഒരിക്കലെങ്കിലും സംഭവിക്കാവുന്ന ഒരു അബദ്ധമാണ് തെറ്റായ ഇന്ധനം നിറയ്ക്കുന്നത്. "ഒരു ഫുൾ ടാങ്ക്" എന്ന് പറഞ്ഞ് ഫോൺ വിളിയിൽ മുഴുകിയിരിക്കുമ്പോഴോ, പരിചയമില്ലാത്ത വാഹനം ഉപയോഗിക്കുമ്പോഴോ, പമ്പ് ജീവനക്കാരന്റെ തെറ്റിദ്ധാരണ മൂലമോ ഈ പിഴവ് സംഭവിക്കാം. ചെറിയൊരു അശ്രദ്ധയാണെങ്കിലും, അതിന്റെ പ്രത്യാഘാതം എൻജിനിലേക്കും ഒടുവിൽ പോക്കറ്റിലേക്കും എത്തും.

പുതിയ തലമുറ വാഹനങ്ങളിൽ ഇന്ധന സംവിധാനങ്ങൾ വളരെ കൃത്യതയോടെയാണ് രൂപകൽപ്പന ചെയ്തിരിക്കുന്നത്. അതുകൊണ്ടുതന്നെ തെറ്റായ ഇന്ധനം കുറച്ച് അളവിൽ പോലും എൻജിന്റെ പ്രവർത്തനത്തെ ബാധിച്ചേക്കാം. പലരും തെറ്റ് മനസ്സിലാകുന്നത് വാഹനം സ്റ്റാർട്ട് ചെയ്ത ശേഷമാണ്. അതോടെ പ്രശ്നം ടാങ്കിൽ ഒതുങ്ങാതെ ഫ്യുവൽ പമ്പിലേക്കും ഇൻജക്ടറുകളിലേക്കും എൻജിനിലേക്കും വ്യാപിക്കും.

പെട്രോളും ഡീസലും: പ്രധാന വ്യത്യാസം

ഒരേ പമ്പിൽ ലഭിക്കുന്ന രണ്ട് ഇന്ധനങ്ങളാണെങ്കിലും പ്രവർത്തനരീതി പൂർണമായും വ്യത്യസ്തമാണ്.

പെട്രോൾ എൻജിൻ സ്പാർക്ക് പ്ലഗിന്റെ സഹായത്തോടെയാണ് ഇന്ധനം കത്തിക്കുന്നത്. വേഗത്തിൽ കത്തുന്ന സ്വഭാവമുള്ള ഇന്ധനമാണ് പെട്രോൾ.

ഡീസൽ എൻജിൻ ഉയർന്ന കംപ്രഷൻ ഉപയോഗിച്ചാണ് ഇന്ധനം സ്വയം കത്തിക്കുന്നത്. കൂടാതെ ഡീസൽ ഇന്ധനം തന്നെ ഫ്യുവൽ പമ്പിനും ഇൻജക്ടറുകൾക്കും ലൂബ്രിക്കേഷനും നൽകുന്നു.

ഈ വ്യത്യാസമാണ് തെറ്റായ ഇന്ധനം ഗുരുതര പ്രശ്നമാകാനുള്ള പ്രധാന കാരണം.

പെട്രോൾ കാറിൽ ഡീസൽ നിറച്ചാൽ...

ഡീസൽ കട്ടിയേറിയ ഇന്ധനമാണ്. ഇത് പെട്രോൾ പോലെ എളുപ്പത്തിൽ കത്തില്ല. അതിനാൽ എൻജിനിൽ ഇന്ധനം എത്തിയാലും പൂർണമായ ദഹനം നടക്കില്ല.

ഇതിന്റെ ഫലമായി,

• എൻജിൻ സ്റ്റാർട്ട് ആകാതെ വരാം.
• സ്റ്റാർട്ട് ആയാലും വിറയൽ അനുഭവപ്പെടാം.
• ആക്സിലറേഷൻ കുറയും.
• മിസ്ഫയർ ഉണ്ടാകും.
• എക്സോസ്റ്റിൽ നിന്ന് കറുത്ത പുക വരാം.
• കുറച്ച് ദൂരം ഓടിയ ശേഷം വാഹനം നിന്നുപോകാനും സാധ്യതയുണ്ട്.

ഡീസലിലെ കനത്ത ഘടകങ്ങൾ സ്പാർക്ക് പ്ലഗിലും ഇൻജക്ടറുകളിലും അടിഞ്ഞുകൂടുന്നത് പിന്നീട് വൃത്തിയാക്കലോ മാറ്റിസ്ഥാപിക്കലോ ആവശ്യമായി വരും.

മിക്ക പെട്രോൾ കാറുകളുടെയും ഫില്ലർ നെക്ക് ചെറിയതാണ്. ഡീസൽ പമ്പിന്റെ നോസിൽ അതിലേക്ക് സാധാരണ കയറില്ല. അതിനാൽ ഈ അബദ്ധം സംഭവിക്കാനുള്ള സാധ്യത താരതമ്യേന കുറവാണ്.

ഡീസൽ കാറിൽ പെട്രോൾ നിറച്ചാൽ അപകടം എന്തുകൊണ്ട് കൂടുതലാണ്?

ഡീസൽ എൻജിനിലെ ഹൈ-പ്രഷർ ഫ്യുവൽ പമ്പും ഇൻജക്ടറുകളും പ്രവർത്തിക്കാൻ ഡീസലിന്റെ എണ്ണമയം ആവശ്യമാണ്. എന്നാൽ പെട്രോൾക്ക് ആ ഗുണമില്ല. പെട്രോൾ കലരുമ്പോൾ ലൂബ്രിക്കേഷൻ നഷ്ടപ്പെടുകയും മെറ്റൽ ഭാഗങ്ങൾ പരസ്പരം ഉരസുകയും ചെയ്യും.

ഇതിലൂടെ,

• ഹൈ-പ്രഷർ ഫ്യുവൽ പമ്പ് തകരാം.
• ഇൻജക്ടറുകൾ കേടാകാം.
• മെറ്റൽ കണങ്ങൾ ഫ്യുവൽ സിസ്റ്റത്തിലുടനീളം പടരാം.
• ഫ്യുവൽ റെയിൽ, പമ്പ്, ഇൻജക്ടർ എന്നിവ മാറ്റേണ്ട സാഹചര്യം ഉണ്ടാകാം.

ആധുനിക കോമൺ-റെയിൽ ഡീസൽ എൻജിനുകളിൽ ഈ കേടുപാടുകൾ കൂടുതൽ ഗുരുതരമായിരിക്കും.

എത്ര അളവിൽ കലർന്നാൽ പ്രശ്നമാകും?

ടാങ്ക് നിറയെ തെറ്റായ ഇന്ധനം വേണമെന്നില്ല.

• ഏതാനും ലിറ്റർ പോലും ആധുനിക ഡീസൽ വാഹനങ്ങളെ ബാധിച്ചേക്കാം.
• പഴയ മെക്കാനിക്കൽ ഡീസൽ എൻജിനുകൾക്ക് ചെറിയ അളവിൽ പ്രശ്നം കുറവായിരിക്കാമെങ്കിലും സുരക്ഷിതമെന്ന് പറയാനാവില്ല.
• തെറ്റായ ഇന്ധനം കലർന്നതായി സംശയമുണ്ടെങ്കിൽ വാഹനം ഓടിക്കാതിരിക്കുന്നതാണ് ഏറ്റവും നല്ലത്.

തെറ്റ് മനസ്സിലായ ഉടൻ എന്ത് ചെയ്യണം?

വാഹനം സ്റ്റാർട്ട് ചെയ്യരുത്.

പലരും "ഒന്ന് മുന്നോട്ട് എടുത്തിട്ട് മാറ്റാം" എന്ന് കരുതി സ്റ്റാർട്ട് ചെയ്യാറുണ്ട്. അതാണ് ഏറ്റവും വലിയ തെറ്റ്. ഇഗ്നിഷൻ ഓൺ ചെയ്യുമ്പോൾ തന്നെ പല വാഹനങ്ങളിലും ഫ്യുവൽ പമ്പ് പ്രവർത്തിച്ച് തെറ്റായ ഇന്ധനം സിസ്റ്റത്തിലേക്ക് എത്തും.

അതുകൊണ്ട്,

• എൻജിൻ സ്റ്റാർട്ട് ചെയ്യരുത്.
• ഇഗ്നിഷൻ പലതവണ ഓൺ-ഓഫ് ചെയ്യരുത്.
• വാഹനം തള്ളി മാറ്റുക.
• ടോവിങ് സൗകര്യം ഉപയോഗിക്കുക.
• അംഗീകൃത സർവീസ് സെന്ററിലോ വിശ്വസനീയമായ വർക്ക്‌ഷോപ്പിലോ എത്തിക്കുക.
• ടാങ്ക് ഡ്രെയിൻ ചെയ്ത് ഫ്യുവൽ ലൈൻ പരിശോധിച്ചതിന് ശേഷമേ വാഹനം വീണ്ടും ഉപയോഗിക്കാവൂ.

ചെലവ് എത്ര വരാം?

സ്റ്റാർട്ട് ചെയ്യുന്നതിന് മുമ്പ് തെറ്റ് കണ്ടെത്തിയാൽ ടാങ്ക് വൃത്തിയാക്കുന്നതും ഫിൽട്ടർ മാറ്റുന്നതുമാത്രം മതിയാകുന്ന സാഹചര്യം പലപ്പോഴും ഉണ്ടാകും.

സ്റ്റാർട്ട് ചെയ്താൽ,

• ഫ്യുവൽ പമ്പ്
• ഇൻജക്ടറുകൾ
• ഫിൽട്ടറുകൾ
• ഫ്യുവൽ റെയിൽ
• ചിലപ്പോൾ എൻജിനിലെ മറ്റ് ഭാഗങ്ങളും മാറ്റേണ്ടി വരാം. അതോടെ അറ്റകുറ്റപ്പണി ചെലവ് പതിനായിരങ്ങളിൽ നിന്ന് ലക്ഷങ്ങൾ വരെ എത്താൻ സാധ്യതയുണ്ട്.

അബദ്ധം ഒഴിവാക്കാൻ...

• വാഹനം ഏത് ഇന്ധനമാണെന്ന് ഉറപ്പാക്കി കൃത്യമായ വിവരം ആദ്യമേ പമ്പിൽ പറയുക.
• ഫോൺ സംസാരിച്ചുകൊണ്ട് ഇന്ധനം നിറയ്ക്കുന്നത് ഒഴിവാക്കുക.
• ഫ്യൂവൽ ക്യാപ്പിൽ ഇന്ധനമേതെന്ന്​ വ്യക്​തമാക്കുന്ന സ്റ്റിക്കർ പതിപ്പിക്കുക.