ഡോക്ടർ പരാതിക്കാരനായ കേസിൽ നിർണായക തെളിവുകൾ; ഫോണിൽ 12 സ്ത്രീകളുമായുള്ള ലൈംഗിക ദൃശ്യങ്ങൾ

കൊച്ചി: യുവനടിയെയും സംഘത്തെയും പ്രതികളാക്കി ഡോക്ടർ ജോൺസൺ വർഗീസ് നൽകിയ മർദനക്കേസിൽ നിർണായക തെളിവുകൾ പൊലീസിന് ലഭിച്ചതായി റിപ്പോർട്ട്. ഡോക്ടറുടെ മൊബൈൽ ഫോണിൽ 12 സ്ത്രീകളുമായുള്ള ലൈംഗിക ബന്ധത്തിന്റെ ദൃശ്യങ്ങൾ സൂക്ഷിച്ചിരുന്നതായി അന്വേഷണത്തിൽ കണ്ടെത്തി. കൂടുതൽ സ്ത്രീകൾ പരാതിയുമായി എത്തിയാൽ ഡോക്ടർക്കെതിരെ പുതിയ കേസുകൾ രജിസ്റ്റർ ചെയ്യാനാണ് പൊലീസിന്റെ നീക്കം.

യുവനടിയുടെ ബന്ധുവിനെ പീഡിപ്പിച്ചെന്ന കേസിൽ പ്രതിയായതോടെയാണ് ജോൺസൺ വർഗീസ് ഉൾപ്പെട്ട സംഭവങ്ങൾ പുതിയ വഴിത്തിരിവിലെത്തിയത്. ഡോക്ടറെ ഫ്ലാറ്റിലേക്ക് വിളിച്ചുവരുത്തി മർദിച്ചെന്നായിരുന്നു ആദ്യം പുറത്തുവന്ന പരാതി. ഇതിന്റെ അടിസ്ഥാനത്തിൽ യുവനടി ഉൾപ്പെടെ 12 പേർക്കെതിരെ കേസെടുത്തിരുന്നു. ഇതിൽ ഒമ്പത് പേരെ കൂടി പിടികൂടാനുണ്ട്.

എന്നാൽ ഡോക്ടർക്കെതിരെ യുവനടിയുടെ ബന്ധു ലൈംഗിക പീഡന പരാതി നൽകിയതോടെ കേസിന്റെ സ്വഭാവം മാറി. പരാതിക്ക് പിന്നാലെ ഡോക്ടറെ ജോലി ചെയ്തിരുന്ന സ്വകാര്യ ആശുപത്രിയിൽനിന്ന് പുറത്താക്കിയിരുന്നു. നിലവിൽ ഇയാൾ ഒളിവിലാണ്.

ഡോക്ടറുടെ ഫോണിലുള്ള ബന്ധുവിന്റെ സ്വകാര്യ ദൃശ്യങ്ങൾ ഡിലീറ്റ് ചെയ്യിക്കാനാണ് ഇയാളെ ഫ്ലാറ്റിലേക്ക് വിളിച്ചുവരുത്തിയതെന്നാണ് നടിയും സംഘവും പൊലീസിന് നൽകിയ മൊഴി. ഡോക്ടറുടെ കൈവശമുണ്ടായിരുന്ന സ്മാർട്ട്ഫോണുകൾ നടിയും സംഘവും കൈവശപ്പെടുത്തിയതായും ഇവ നടിയുടെ സംഘത്തിലുള്ള ജിം ട്രെയിനറുടെ പക്കലാണെന്നുമാണ് വിവരം. ജിം ട്രെയിനറും ഒളിവിലാണ്.

അതേസമയം, ഡോക്ടറെ മർദിച്ച കേസിൽ യുവനടി ഉൾപ്പെടെയുള്ള പ്രതികളുടെ ജാമ്യാപേക്ഷ എറണാകുളം സെഷൻസ് കോടതി പരിഗണിക്കും. അന്വേഷണം പ്രാരംഭഘട്ടത്തിലാണെന്നും പ്രതികളെ കസ്റ്റഡിയിൽ ചോദ്യം ചെയ്യേണ്ടതുണ്ടെന്നും ചൂണ്ടിക്കാട്ടി പൊലീസ് ജാമ്യാപേക്ഷയെ എതിർത്തിട്ടുണ്ട്.

ഡോക്ടറുടെ ഫോണിൽ കണ്ടെത്തിയ ദൃശ്യങ്ങളുടെ പശ്ചാത്തലത്തിൽ കൂടുതൽ സ്ത്രീകൾ പരാതിയുമായി രംഗത്തെത്തുമോയെന്നാണ് പൊലീസ് പരിശോധിക്കുന്നത്. ഒളിവിലുള്ള ഡോക്ടറെ കണ്ടെത്താൻ ലുക്ക് ഔട്ട് സർക്കുലർ പുറപ്പെടുവിക്കാനുള്ള നടപടികളും പുരോഗമിക്കുകയാണ്.