ബഹിരാകാശത്ത് നിന്ന് ഭൂമിയും ചന്ദ്രനും; വിസ്മയക്കാഴ്ച പങ്കുവെച്ച് അനിൽ മേനോൻ
ഡ്രാഗൺ പേടകത്തിന്റെ ജനാലയിലൂടെ പകർത്തിയ ടൈംലാപ്സ്; 45-ാം സെക്കൻഡിൽ ഓറിയോൺ നക്ഷത്രസമൂഹവും ദൃശ്യമായി
Desk Mediagraamam 
വാഷിങ്ടൺ: ബഹിരാകാശത്ത് നിന്ന് ഭൂമിയുടെയും ചന്ദ്രന്റെയും അതിമനോഹരമായ ദൃശ്യങ്ങൾ പങ്കുവെച്ച് ഇന്ത്യൻ വംശജനായ നാസ ബഹിരാകാശ സഞ്ചാരി അനിൽ മേനോൻ. ഡ്രാഗൺ ബഹിരാകാശ പേടകത്തിന്റെ ജനാലയിലൂടെ പകർത്തിയ ടൈംലാപ്സ് വീഡിയോയാണ് അദ്ദേഹം സമൂഹമാധ്യമങ്ങളിൽ പങ്കുവെച്ചത്.
ഇരുണ്ട ബഹിരാകാശത്തിന്റെ പശ്ചാത്തലത്തിൽ ഭൂമിയും ചന്ദ്രനും ഒരുമിച്ച് ദൃശ്യമാകുന്നതാണ് വീഡിയോയുടെ പ്രധാന ആകർഷണം. ഭൂമിയുടെ നീലനിറവും സമീപത്തായി പ്രകാശിക്കുന്ന ചന്ദ്രനും ചേർന്ന കാഴ്ച അതീവ മനോഹരമാണ്.
‘Moonlight Sonata’ എന്നാണ് അനിൽ മേനോൻ ഈ ദൃശ്യത്തിന് വിശേഷണം നൽകിയത്. ടൈംലാപ്സിന്റെ ഏകദേശം 45-ാം സെക്കൻഡിൽ ഓറിയോൺ നക്ഷത്രസമൂഹം ഉദിച്ചുവരുന്നതും കാണാം. ദൃശ്യങ്ങളുടെ വേഗത മാറ്റിയാണ് ടൈംലാപ്സ് തയ്യാറാക്കിയതെന്നും അദ്ദേഹം വ്യക്തമാക്കി.
ചിത്രീകരണത്തിനായി 15 മില്ലിമീറ്റർ ലെൻസ് ഉപയോഗിച്ചെന്നും അപർച്ചർ പ്രയോറിറ്റി മോഡും ഓട്ടോ ISOയും ക്രമീകരിച്ചാണ് ദൃശ്യങ്ങൾ പകർത്തിയതെന്നും മേനോൻ വ്യക്തമാക്കി.
ബഹിരാകാശത്തുനിന്നുള്ള അപൂർവ കാഴ്ചകൾ തുടർച്ചയായി പങ്കുവെക്കുന്ന അനിൽ മേനോന്റെ പുതിയ വീഡിയോയും സമൂഹമാധ്യമങ്ങളിൽ ശ്രദ്ധനേടുകയാണ്. ഭൂമിയും ചന്ദ്രനും ഒരേ ഫ്രെയിമിൽ, ബഹിരാകാശത്തിന്റെ ഇരുട്ടിൽ തിളങ്ങുന്ന കാഴ്ചയാണ് നിരവധി പേരെ ആകർഷിച്ചത്.
