രാജീവ് ഗാന്ധിയുടെ മൃതദേഹത്തിന്റെ ചിത്രം ഇന്നുവരെ കണ്ടിട്ടില്ല; ആദ്യ കുഞ്ഞിന്റെ മരണവേദനയും തുറന്നുപറഞ്ഞ് സോണിയ ഗാന്ധി

ന്യൂഡൽഹി: മുൻ പ്രധാനമന്ത്രി രാജീവ് ഗാന്ധിയുടെ വധത്തിനു പിന്നാലെ മാധ്യമങ്ങളിൽ പ്രസിദ്ധീകരിച്ച അദ്ദേഹത്തിന്റെ ഛിന്നഭിന്നമായ ഭൗതികശരീരത്തിന്റെ ചിത്രം ഇന്നുവരെ കണ്ടിട്ടില്ലെന്ന് സോണിയ ഗാന്ധി. രാജീവ് ഗാന്ധിയുടെ മരണവുമായി ബന്ധപ്പെട്ട അതീവ വേദനാജനകമായ ഓർമകളും ആദ്യ കുഞ്ഞിന്റെ മരണത്തെക്കുറിച്ചുള്ള വ്യക്തിപരമായ അനുഭവങ്ങളും 'ബിലോങ്ങിങ്: എ ജേണി ഓഫ് ലവ്' (Belonging: A Journey of Love) എന്ന പുസ്തകത്തിലൂടെയാണ് സോണിയ വെളിപ്പെടുത്തുന്നത്.

രാജീവ് ഗാന്ധി കൊല്ലപ്പെട്ടതിനു പിന്നാലെ സ്ഫോടനത്തിൽ തകർന്ന അദ്ദേഹത്തിന്റെ ശരീരത്തിന്റെ ചിത്രം മാധ്യമങ്ങളിൽ വ്യാപകമായി പ്രസിദ്ധീകരിച്ചിരുന്നു. എന്നാൽ, ആ ചിത്രം താൻ കാണാതിരിക്കാൻ മക്കളായ രാഹുൽ ഗാന്ധിയും പ്രിയങ്ക ഗാന്ധിയും പ്രത്യേകം ശ്രദ്ധിച്ചിരുന്നുവെന്ന് സോണിയ പറയുന്നു.

പരിശോധിച്ച് ഉറപ്പുവരുത്താതെ ഒരു പത്രമോ മാസികയോ പോലും അമ്മയുടെ കൈകളിൽ നേരിട്ട് എത്തിക്കരുതെന്ന് ഇരുവരും ജീവനക്കാർക്ക് നിർദേശം നൽകിയിരുന്നു. രാജീവിന്റെ ശരീരത്തിന് സ്ഫോടനത്തിനുശേഷം എന്തു സംഭവിച്ചുവെന്നതിന്റെ ചിത്രം മുപ്പതിലേറെ വർഷങ്ങൾ പിന്നിട്ടിട്ടും താൻ കണ്ടിട്ടില്ലെന്നും സോണിയ പുസ്തകത്തിൽ കുറിക്കുന്നു.

ആദ്യ കുഞ്ഞിന്റെ മരണം; തുറന്നുപറഞ്ഞ് സോണിയ

രാഹുൽ ഗാന്ധിയുടെ ജനനത്തിനു മുൻപ് തങ്ങൾക്കുണ്ടായ ആദ്യ കുഞ്ഞ് ജനിച്ച് ഒരു ദിവസത്തിനകം മരിച്ചുപോയതിന്റെ വേദനയും സോണിയ ആദ്യമായി പൊതുവേദിയിൽ പങ്കുവെക്കുകയാണ്.

1968 സെപ്റ്റംബറിലാണ് താൻ ഗർഭിണിയാണെന്ന വിവരം കുടുംബം അറിഞ്ഞത്. ഗാന്ധി കുടുംബത്തിൽ വലിയ സന്തോഷം നിറച്ച വാർത്തയായിരുന്നു അത്. എന്നാൽ, പ്രസവത്തീയതിക്ക് രണ്ടുമാസം മുൻപുതന്നെ സോണിയ ഒരു ആൺകുഞ്ഞിന് ജന്മം നൽകി. ജനിച്ച് പിറ്റേന്ന് രാവിലെ കുഞ്ഞ് മരിച്ചു.

കുഞ്ഞിന്റെ സംസ്കാരവുമായി ബന്ധപ്പെട്ട് നേരിട്ട പ്രതിസന്ധികളും സോണിയ പുസ്തകത്തിൽ വിവരിക്കുന്നുണ്ട്. ഹിന്ദു ആചാരപ്രകാരം നവജാതശിശുക്കളുടെ മൃതദേഹം സാധാരണയായി ദഹിപ്പിക്കാതെ നദിയിൽ ഒഴുക്കുന്ന രീതിയെക്കുറിച്ച് സോണിയയ്ക്ക് ആശങ്കയുണ്ടായിരുന്നു.

ഡൽഹിയിലെ ഓഖ ബാരേജിൽ ഒരിക്കൽ നദിയിലൂടെ ഒഴുകിയെത്തിയ മൃതദേഹം തെരുവുനായ്ക്കൾ കരയിലേക്ക് വലിച്ചിഴയ്ക്കാൻ ശ്രമിക്കുന്നത് കണ്ട അനുഭവം സോണിയയെ വല്ലാതെ ഭയപ്പെടുത്തിയിരുന്നു. അതിനാൽ സ്വന്തം കുഞ്ഞിന്റെ മൃതദേഹം നദിയിൽ ഒഴുക്കാൻ ഒരു കാരണവശാലും അനുവദിക്കില്ലെന്ന് അവർ ഉറച്ച നിലപാടെടുത്തു.

രാഷ്ട്രീയ വിവാദങ്ങൾക്ക് വഴിവെക്കുമെന്ന ആശങ്കയിൽ ക്രിസ്ത്യൻ സെമിത്തേരിയിലോ സമീപത്തെ പാഴ്സി സെമിത്തേരിയിലോ സംസ്കരിക്കാനും കഴിഞ്ഞില്ല. ഒടുവിൽ മെഹ്റോളിയിലെ ഫിറോസ് ഗാന്ധിയുടെ ഫാംഹൗസിൽ കുഞ്ഞിനെ സംസ്കരിക്കുകയായിരുന്നു.

രാജീവ് ഗാന്ധിയുടെ വധത്തിന്റെ ആഘാതത്തിനൊപ്പം ജീവിതത്തിലെ മറ്റൊരു വലിയ നഷ്ടവും തുറന്നുപറയുന്ന സോണിയയുടെ വെളിപ്പെടുത്തലുകൾ പുസ്തകത്തെ വ്യക്തിപരമായ ഓർമകളുടെ അപൂർവ രേഖയാക്കി മാറ്റുകയാണ്.