“തമ്പ്രാക്കളുടെ ബാറുകൾക്ക് 50 മീറ്റർ, ഷാപ്പുകൾക്ക് 400 മീറ്റർ”; പിണറായി സർക്കാരിനെതിരെ ബിനോയ് വിശ്വം

കോട്ടയം: കഴിഞ്ഞ എൽ.ഡി.എഫ് സർക്കാരിന്റെയും അന്നത്തെ മുഖ്യമന്ത്രി പിണറായി വിജയന്റെയും നയങ്ങളെ രൂക്ഷമായി വിമർശിച്ച് സി.പി.ഐ സംസ്ഥാന സെക്രട്ടറി ബിനോയ് വിശ്വം. കള്ള് ചെത്ത് വ്യവസായത്തോടും പരമ്പരാഗത തൊഴിലാളികളോടും സർക്കാർ സ്വീകരിച്ച സമീപനം തെറ്റായിരുന്നുവെന്ന് അദ്ദേഹം കുറ്റപ്പെടുത്തി. ഷാപ്പുകളോടും ബാറുകളോടും സർക്കാർ രണ്ട് നീതിയാണ് സ്വീകരിച്ചതെന്നും ബിനോയ് വിശ്വം ആരോപിച്ചു. 

ഷാപ്പുകൾ പ്രവർത്തിക്കുന്നതിന് ആരാധനാലയങ്ങളിൽ നിന്നും വിദ്യാഭ്യാസ സ്ഥാപനങ്ങളിൽ നിന്നുമുള്ള ദൂരപരിധി 400 മീറ്ററിൽ നിന്ന് കുറയ്ക്കണമെന്ന ആവശ്യം സി.പി.ഐ എൽ.ഡി.എഫ് യോഗങ്ങളിൽ പലതവണ ഉന്നയിച്ചിരുന്നുവെന്നാണ് ബിനോയ് വിശ്വം പറഞ്ഞത്. എന്നാൽ ഇക്കാര്യത്തിൽ നടപടി ഉണ്ടായില്ലെന്നും അദ്ദേഹം ആരോപിച്ചു. അതേസമയം, ബാറുകൾക്ക് 50 മീറ്റർ ദൂരപരിധി അനുവദിച്ചുകൊണ്ട് സർക്കാർ കള്ള് ഷാപ്പുകളോടും ബാറുകളോടും വ്യത്യസ്ത സമീപനമാണ് സ്വീകരിച്ചതെന്നും അദ്ദേഹം വിമർശിച്ചു. നിലവിലെ കേരള അബ്കാരി ഷോപ്പ് ചട്ടങ്ങളിലും കള്ള് ഷാപ്പുകൾക്ക് വിദ്യാഭ്യാസ സ്ഥാപനങ്ങൾ, ആരാധനാലയങ്ങൾ തുടങ്ങിയവയിൽ നിന്ന് 400 മീറ്റർ ദൂരപരിധി വ്യവസ്ഥ നിലവിലുണ്ടെന്ന് കോടതി രേഖകളിലും കാണാം. 

എൽ.ഡി.എഫ് യോഗത്തിൽ വിഷയം ഉന്നയിച്ചപ്പോൾ പിണറായി വിജയൻ ആവശ്യം ശരിയാണെന്ന് സമ്മതിച്ചിരുന്നെങ്കിലും അഞ്ച് വർഷം അധികാരത്തിലിരുന്നിട്ടും കാര്യമായ നടപടി ഉണ്ടായില്ലെന്നാണ് ബിനോയ് വിശ്വത്തിന്റെ വിമർശനം. “ശരിയാക്കാമെന്ന് പറഞ്ഞാൽ പോരാ, ശരിയാക്കണം” എന്ന നിലപാടും അദ്ദേഹം വ്യക്തമാക്കി. കള്ള് വ്യവസായത്തെ സംരക്ഷിക്കുന്നതിൽ കഴിഞ്ഞ സർക്കാരിന് വീഴ്ച സംഭവിച്ചുവെന്നും അദ്ദേഹം പറഞ്ഞു. 

കഴിഞ്ഞ നിയമസഭാ തെരഞ്ഞെടുപ്പിൽ എൽ.ഡി.എഫിനുണ്ടായ തിരിച്ചടിയുടെ കാരണങ്ങളിൽ മുന്നണി നേതൃത്വം ആത്മപരിശോധന നടത്തണമെന്നും ബിനോയ് വിശ്വം ആവശ്യപ്പെട്ടു. സ്വന്തം പാർട്ടി പ്രവർത്തകരും അനുഭാവികളും പോലും വോട്ട് ചെയ്യാത്ത സാഹചര്യമുണ്ടായെങ്കിൽ അതിന്റെ കാരണം കണ്ടെത്തേണ്ടതുണ്ടെന്നാണ് അദ്ദേഹത്തിന്റെ അഭിപ്രായം. പാർട്ടി പ്രവർത്തകർ വോട്ട് ചെയ്യാതിരുന്നത് തെറ്റാണെങ്കിലും, “എന്തുകൊണ്ടാണ് അങ്ങനെ ചെയ്യേണ്ടിവന്നത്” എന്ന് നേതൃത്വം പരിശോധിക്കണമെന്നും അദ്ദേഹം പറഞ്ഞു.

വൈക്കം, തളിപ്പറമ്പ്, പയ്യന്നൂർ, അമ്പലപ്പുഴ തുടങ്ങിയ ഇടതുമുന്നണിയുടെ ശക്തികേന്ദ്രങ്ങളിൽ സംഭവിച്ച പരാജയവും ഗൗരവമായി പരിശോധിക്കണമെന്നാണ് ബിനോയ് വിശ്വം ആവശ്യപ്പെട്ടത്. ജനങ്ങൾ എന്തുകൊണ്ട് മുന്നണിയിൽ നിന്ന് അകന്നു എന്നത് തിരിച്ചറിയാതെ തിരിച്ചടിയുടെ കാരണങ്ങൾ മനസ്സിലാക്കാനാകില്ലെന്നും അദ്ദേഹം വ്യക്തമാക്കി.