എം.ബി.ബി.എസ്, ബി.ഡി.എസ് ആദ്യഘട്ട അലോട്ട്‌മെന്റ് പ്രസിദ്ധീകരിച്ചു: ജനറൽ വിഭാഗത്തിൽ അവസാന റാങ്ക് 720

തിരുവനന്തപുരം: സംസ്ഥാനത്തെ എം.ബി.ബി.എസ്, ബി.ഡി.എസ് കോഴ്‌സുകളിലെ സംസ്ഥാന ക്വാട്ട സീറ്റുകളിലേക്കുള്ള ഒന്നാംഘട്ട അലോട്ട്‌മെന്റ് എൻട്രൻസ് കമ്മീഷണർ പ്രസിദ്ധീകരിച്ചു. പ്രവേശന പരീക്ഷാ കമ്മീഷണറുടെ ഔദ്യോഗിക വെബ്‌സൈറ്റായ cee.kerala.gov.in-ൽ അലോട്ട്‌മെന്റ് വിവരങ്ങൾ ലഭ്യമാണ്.

ഇത്തവണയും സ്റ്റേറ്റ് മെരിറ്റിൽ ഉയർന്ന റാങ്ക് നേടിയ ഭൂരിഭാഗം വിദ്യാർഥികളും പ്രവേശനത്തിനായി തിരഞ്ഞെടുത്തത് കോഴിക്കോട് ഗവ. മെഡിക്കൽ കോളേജാണ്. കോഴിക്കോട് മെഡിക്കൽ കോളേജിൽ ജനറൽ സീറ്റുകളിൽ 144-ാം റാങ്ക് വരെയും ഈഴവ വിഭാഗത്തിൽ 305-ാം റാങ്ക് വരെയുമുള്ള വിദ്യാർഥികൾക്കാണ് ആദ്യ അലോട്ട്‌മെന്റിൽ പ്രവേശനം ലഭിച്ചത്. തിരുവനന്തപുരം, തൃശൂർ മെഡിക്കൽ കോളേജുകളാണ് തൊട്ടുപിന്നിൽ.

ഗവൺമെന്റ് മെഡിക്കൽ കോളേജുകളിൽ സ്റ്റേറ്റ് മെരിറ്റ് വിഭാഗത്തിൽ പ്രവേശനം ലഭിച്ച അവസാന റാങ്ക് 720 ആണ്. 10,564 ആണ് ഈ വിദ്യാർഥിയുടെ നീറ്റ് റാങ്ക്. സ്വാശ്രയ മെഡിക്കൽ കോളേജുകളിൽ സ്റ്റേറ്റ് മെരിറ്റിലെ അവസാന റാങ്ക് 9708 ആണ്.

ബി.ഡി.എസ് കോഴ്‌സുകളിൽ ഗവൺമെന്റിൽ 3151-ഉം സ്വാശ്രയത്തിൽ 21,259-ഉം ആണ് സ്റ്റേറ്റ് മെരിറ്റിലെ അവസാന റാങ്ക്. ഈഴവ വിഭാഗത്തിൽ ഗവൺമെന്റിൽ 4238-ഉം സ്വാശ്രയത്തിൽ 23,834-ഉം ആണ് അവസാന റാങ്ക്.

ഗവ. മെഡിക്കൽ കോളേജുകളിലെ അവസാന റാങ്കുകൾ (സ്റ്റേറ്റ് മെരിറ്റ്)

കോഴിക്കോട് - 144, തിരുവനന്തപുരം - 290, തൃശൂർ - 457, കോട്ടയം - 485, ആലപ്പുഴ - 625, പാരിപ്പള്ളി - 716, കണ്ണൂർ - 717, എറണാകുളം - 720, മഞ്ചേരി - 721.

വിവിധ വിഭാഗങ്ങളിലെ അവസാന റാങ്ക് പരിധി (ഗവൺമെന്റ് / സ്വാശ്രയം ക്രമത്തിൽ)

സ്റ്റേറ്റ് മെരിറ്റ്: 720 / 9708, സാമ്പത്തിക പിന്നാക്കം (EWS): 2590 / 18633, ഈഴവ: 1623 / 10062, മുസ്ലീം: 956 / 12401, എൽ.സി/ആംഗ്ലോ ഇന്ത്യൻ: 2807 / 1151, മറ്റു പിന്നാക്ക ഹിന്ദു (OBH): 1588 / 9848, ധീവര: 5512 / 10490, വിശ്വകർമ്മ: 2012 / 12701, മറ്റു പിന്നാക്ക ക്രൈസ്തവ (BX): 3193 / 10749, കുശവ: 8179 / 11818, കുഡുംബി: 15472 / 19629, പട്ടികജാതി (SC): 11314 / 14689, പട്ടികവർഗം (ST): 17263.

പ്രവേശനം സെപ്തംബർ 5 വരെ

അലോട്ട്‌മെന്റ് ലഭിച്ച വിദ്യാർഥികൾ സെപ്തംബർ അഞ്ചിന് വൈകിട്ട് 4 മണിക്ക് മുൻപായി അതത് കോളേജുകളിൽ നേരിട്ടെത്തി പ്രവേശനം നേടണം. നിർദ്ദിഷ്ട സമയത്തിനുള്ളിൽ പ്രവേശനം നേടാത്തവരുടെ അലോട്ട്‌മെന്റ് റദ്ദാകും. ഇവരെ തുടർന്നുള്ള അലോട്ട്‌മെന്റുകളിൽ പരിഗണിക്കുന്നതല്ല.

അലോട്ട്‌മെന്റ് ലഭിച്ചവർ കാൻഡിഡേറ്റ് പോർട്ടലിൽ പ്രവേശിച്ച് അലോട്ട്‌മെന്റ് മെമ്മോയും ഡേറ്റ ഷീറ്റും ഡൗൺലോഡ് ചെയ്ത് പ്രിന്റൗട്ടെടുക്കണം. ഇവയും പ്രോസ്‌പെക്റ്റസിൽ നിർദേശിച്ചിട്ടുള്ള മറ്റ് അസൽ രേഖകളും കോളേജിൽ സമർപ്പിക്കേണ്ടതാണ്.

ഗവൺമെന്റ് മെഡിക്കൽ/ഡെന്റൽ കോളേജുകളിൽ അലോട്ട്‌മെന്റ് ലഭിച്ചവർ ഫീസ് എൻട്രൻസ് കമ്മീഷണറുടെ പേരിൽ ഓൺലൈനായി അടയ്ക്കണം. സ്വാശ്രയ കോളേജുകളിൽ പ്രവേശനം ലഭിച്ചവർ ഫീസ് അതത് കോളേജുകളിലാണ് അടയ്‌ക്കേണ്ടത്. രണ്ടാംഘട്ട അലോട്ട്‌മെന്റിന്റെ ഷെഡ്യൂളും ഓപ്ഷൻ പുനഃക്രമീകരണത്തിനുള്ള തീയതികളും പിന്നീട് പ്രസിദ്ധീകരിക്കും. ഹെൽപ്പ് ലൈൻ നമ്പറുകൾ: 0471-2332120, 2338487.