പിണറായിയുടെ ആരോപണം തിരിച്ചടിയായി; കണക്കുകൾ നിരത്തി വി.ഡി. സതീശന്റെ മറുപടി

വാർത്താ സമ്മേളനങ്ങളിൽ ന്യായീകരണങ്ങളുടെ മാലപ്പടക്കം പൊട്ടിച്ചാലും, ഏതെല്ലാം തരത്തിലുള്ള തെളിവുകൾ നിരത്തിയാലും കഴിഞ്ഞ പത്തു വർഷക്കാലത്തെ ഭരണത്തിൽ വരുത്തിവെച്ച വീഴ്ചകൾക്ക് അത്ര പെട്ടെന്നൊന്നും പരിഹാരം കാണാൻ മുൻ മുഖ്യമന്ത്രി പിണറായി വിജയന് കഴിയില്ലെന്നതാണ് യാഥാർത്ഥ്യം. നിയമത്തിന്റെ വഴിയിൽ തെറ്റുകൾ അംഗീകരിക്കുകയും അധികാരത്തിന്റെ വലിപ്പച്ചെറുപ്പങ്ങൾ മാറ്റിനിർത്തി ഒതുങ്ങേണ്ടിടത്ത് ഒതുങ്ങുകയും ചെയ്യുക മാത്രമാണ് ഇനി അദ്ദേഹത്തിന് മുന്നിലുള്ള ഏക മാർഗ്ഗം. അത്രത്തോളം രാഷ്ട്രീയ തിരിച്ചടികളും ജനങ്ങൾക്കിടയിൽ തലകുനിക്കേണ്ടി വന്ന സാഹചര്യങ്ങളുമാണ് മുൻ മുഖ്യമന്ത്രിയെ തേടിയെത്തിയിരിക്കുന്നത്. എന്നാൽ, സ്വന്തം ഭരണകാലത്തെ ഇത്തരം വീഴ്ചകളും ധൂർത്തുകളും മറച്ചുപിടിച്ച്, നിലവിലെ യു.ഡി.എഫ് സർക്കാരിൽ എന്തൊക്കെ പോരായ്മകളുണ്ടെന്ന് അടിയന്തിരമായി പരതുന്ന ഒരു പ്രതിപക്ഷ നേതാവായി അദ്ദേഹം സ്വയം മാറാൻ ശ്രമിക്കുകയാണ്. ഇത്രയൊക്കെ തിരിച്ചടികൾ നേരിട്ടിട്ടും പഴയ 'മൂക്കത്തെ ശുണ്ഠി'ക്ക് യാതൊരു മാറ്റവുമില്ലാതെ മാധ്യമപ്രവർത്തകരോട് കടിച്ചുചാടുന്ന അതേ ശൈലി തന്നെയാണ് ഇപ്പോഴും പ്രതിപക്ഷ സ്ഥാനത്തിരുന്നും അദ്ദേഹം തുടരുന്നത്.

ഇത്തരത്തിൽ പ്രതിപക്ഷ നേതാവെന്ന നിലയിൽ ജന ശ്രദ്ധ തിരിക്കാനുള്ള ശ്രമത്തിന്റെ ഭാഗമായാണ്, പേഴ്സണൽ സ്റ്റാഫ് നിയമന വിഷയം ഉയർത്തിക്കാട്ടി യു.ഡി.എഫ് സർക്കാരിനെതിരെ പിണറായി വിജയൻ രംഗത്തുവന്നത്. മുൻ ഭരണകാലത്ത് തങ്ങൾ അഞ്ഞൂറിൽ താഴെ ആളുകളെ മാത്രമേ നിയമിച്ചിട്ടുള്ളൂ എന്നും, നിലവിലെ യു.ഡി.എഫ് സർക്കാർ പേഴ്സണൽ സ്റ്റാഫ് നിയമനത്തിൽ വലിയ പരിധി ലംഘനവും ധൂർത്തുമാണ് നടത്തുന്നതെന്നുമുള്ള വലിയ ആരോപണങ്ങളാണ് അദ്ദേഹം ഉയർത്താൻ നോക്കിയത്. എന്നാൽ ഈ വിഷയം ഉയർത്തിക്കാട്ടി രാഷ്ട്രീയമായി മുതലെടുപ്പ് നടത്താമെന്ന അദ്ദേഹത്തിന്റെ കണക്കുകൂട്ടലുകൾ ഒറ്റ രാത്രി കൊണ്ട് പിഴയ്ക്കുന്ന കാഴ്ചയ്ക്കാണ് കേരളം സാക്ഷ്യം വഹിച്ചത്. 2021 മുതൽ 2026 വരെയുള്ള അഞ്ചു വർഷത്തിനിടെ മുൻ മുഖ്യമന്ത്രിയും മന്ത്രിമാരും ചേർന്ന് 787 പേഴ്സണൽ സ്റ്റാഫുകളെ നിയമിച്ചെന്ന ആരോപണത്തിൽ താൻ ഉറച്ചുനിൽക്കുന്നു എന്ന് വ്യക്തമാക്കിയ മുഖ്യമന്ത്രി വി.ഡി. സതീശൻ, പ്രതിപക്ഷ നേതാവ് ആവശ്യപ്പെട്ടാൽ ഇവരുടെ പേര് മാത്രമല്ല, വിലാസം ഉൾപ്പെടെയുള്ള എല്ലാ വിശദാംശങ്ങളും നൽകാൻ തയ്യാറാണെന്ന് കൃത്യമായി സഭയ്ക്കും ജനങ്ങൾക്കും മുന്നിൽ വെല്ലുവിളിച്ചു.

ഇതിന് പുറമേ, കഴിഞ്ഞ സർക്കാരിന്റെ കാലത്ത് മുഖ്യമന്ത്രിയുടെ സോഷ്യൽ മീഡിയ ഹാൻഡ്‌ലുകൾ പരിപാലിക്കാൻ മാത്രം 12 പേരെ പ്രത്യേകം നിയമിച്ചിരുന്നുവെന്ന ഞെട്ടിക്കുന്ന വിവരവും സതീശൻ പുറത്തുവിട്ടു. പ്രതിമാസം 22,290 രൂപ മുതൽ 75,000 രൂപ വരെയുള്ള ശമ്പള സ്കെയിലിൽ നിയമനം നൽകുകയും, പോരാത്തതിന് 2025-ൽ ഇവരുടെ ശമ്പളം വീണ്ടും വർദ്ധിപ്പിച്ച് ഉത്തരവിറക്കുകയും ചെയ്ത സർക്കാരാണ് പിണറായിയുടേത്. സോഷ്യൽ മീഡിയ പരിപാലനത്തിന് മാത്രം ഒരു മാസം 7 ലക്ഷത്തിലധികവും വർഷത്തിൽ 84 ലക്ഷത്തിലധികവും രൂപ പൊടിച്ചവരാണ് ഇപ്പോൾ യു.ഡി.എഫ് സർക്കാരിനെ അധിക്ഷേപിക്കാൻ ഇറങ്ങിയിരിക്കുന്നതെന്ന് വ്യക്തമായ കണക്കുകൾ നിരത്തി വി.ഡി. സതീശൻ തുറന്നടിച്ചതോടെ പിണറായി വിജയൻ തീർത്തും പ്രതിരോധത്തിലായി.

അനുവദിക്കപ്പെട്ട പരിധിക്കുള്ളിൽ മാത്രം ആളുകളെ നിയമിച്ച് ഭരണച്ചെലവുകൾ ചുരുക്കുകയും സുതാര്യത ഉറപ്പാക്കുകയും ചെയ്യുന്ന ഒരു സർക്കാരാണ് നിലവിലുള്ളതെന്ന് വി.ഡി. സതീശൻ കണക്കുകൾ സഹിതം തെളിയിച്ചതോടെ, ആരോപണം ഉന്നയിച്ച പ്രതിപക്ഷ നേതാവിന്റെ മുന പൂർണ്ണമായും ഒടിയുകയാണ് ചെയ്തത്. സ്വന്തം കാലത്തെ ഇത്തരം വലിയ ധൂർത്തുകളും രാഷ്ട്രീയ നിയമനങ്ങളും ജനങ്ങൾ പെട്ടെന്ന് മറന്നുപോകുമെന്ന തെറ്റായ വിചാരത്തിൽ പുതിയ സർക്കാരിനെതിരെ തിരിയാൻ നോക്കിയ മുൻ കപ്പിത്താന്, സ്വന്തം തട്ടകത്തിൽ വെച്ചുതന്നെ വി.ഡി. സതീശൻ നൽകിയ ഈ കൃത്യമായ തിരിച്ചടി വലിയൊരു രാഷ്ട്രീയ പ്രഹരമായി മാറിയിരിക്കുകയാണ്. വരും ദിവസങ്ങളിലും വസ്തുതാവിരുദ്ധമായ ഇല്ലാത്ത കണക്കുകളുമായി മുന്നോട്ടുപോയാൽ ഭരണപക്ഷത്തിന്റെ കൃത്യമായ രേഖകൾക്ക് മുന്നിൽ പ്രതിപക്ഷ നേതാവായ പിണറായി വിജയന് വീണ്ടും വാ അടച്ചുനിൽക്കേണ്ടി വരുമെന്ന മുന്നറിയിപ്പ് കൂടിയാണ് ഈ സംഭവം നൽകുന്നത്.