പഴയ കേസ്, നിർണായക വിധി; തച്ചങ്കരി കുറ്റക്കാരനെന്ന് കോടതി

കോട്ടയം: സംസ്ഥാന പൊലീസ് ഉപമേധാവിയായിരിക്കെ വരവിൽക്കവിഞ്ഞ സ്വത്ത് സമ്പാദിച്ചെന്ന കേസിൽ മുൻ പൊലീസ് ഉദ്യോഗസ്ഥൻ ടോമിൻ ജെ. തച്ചങ്കരിക്ക് തിരിച്ചടി. കേസിൽ തച്ചങ്കരി കുറ്റക്കാരനാണെന്ന് കോട്ടയം വിജിലൻസ് കോടതി കണ്ടെത്തി. കേസിലെ നടപടികൾ പൂർത്തിയാക്കിയ ശേഷമാണ് കോടതി തച്ചങ്കരിക്കെതിരെ കുറ്റക്കാരനെന്ന കണ്ടെത്തൽ നടത്തിയത്. വിധി പ്രസ്താവിക്കുന്നതിന് മുമ്പായി എന്തെങ്കിലും പറയാനുണ്ടോയെന്ന് കോടതി ചോദിച്ചപ്പോൾ ആരോഗ്യപ്രശ്നങ്ങളുണ്ടെന്ന് തച്ചങ്കരി കോടതിയെ അറിയിച്ചു. ഔദ്യോഗിക പദവി വഹിച്ചിരുന്ന കാലയളവിൽ തച്ചങ്കരി അനധികൃതമായി സ്വത്ത് സമ്പാദിച്ചുവെന്നായിരുന്നു വിജിലൻസ് കണ്ടെത്തിയത്. ഇതുമായി ബന്ധപ്പെട്ട രേഖകളും തെളിവുകളും പരിശോധിച്ച ശേഷമാണ് കോട്ടയം വിജിലൻസ് കോടതി കേസിൽ വിധി പറഞ്ഞത്. കേസിൽ കുറ്റക്കാരനെന്ന കോടതി കണ്ടെത്തലോടെ തച്ചങ്കരിയുടെ ഔദ്യോഗിക ജീവിതവുമായി ബന്ധപ്പെട്ട വിവാദങ്ങളിൽ പുതിയ അധ്യായം കൂടിയാണ് തുറന്നിരിക്കുന്നത്.

 പരമാവധി ശിക്ഷ നൽകണമെന്നാണ്  പ്രോസിക്യൂഷൻ കോടതിയോട് ആവശ്യപ്പെട്ടിരിക്കുന്നത്.  ഉച്ചയ്ക്ക് രണ്ട് മണിയോടെ ആയിരിക്കും ശിക്ഷ വിധിക്കുക. പരമാവധി ഏഴു വർഷം വരെ തടവ് ശിക്ഷ ലഭിക്കാനാണ് സാധ്യത. 2003 മുതൽ 2007 വരെയുള്ള ഔദ്യോഗിക കാലയളവിൽ വരവിനെക്കാൾ 64.70 ലക്ഷം രൂപയുടെ അധിക സ്വത്ത് സമ്പാദിച്ചെന്ന കേസിലാണ് ടോമിൻ ജെ. തച്ചങ്കരിക്കെതിരെ വിജിലൻസ് അന്വേഷണം നടത്തിയത്. പരിശോധനയിൽ കണ്ടെത്തിയ സ്വത്തിനും ചെലവുകൾക്കും ആനുപാതികമായ നിയമാനുസൃത വരുമാനം തെളിയിക്കാൻ കഴിഞ്ഞില്ലെന്നാണ് അന്വേഷണ സംഘത്തിന്റെ കണ്ടെത്തൽ. ആകെ വരുമാനത്തേക്കാൾ 135.80 ശതമാനം അധിക സ്വത്ത് ഉണ്ടായിരുന്നുവെന്നും വിജിലൻസ് ചൂണ്ടിക്കാട്ടി. 2013-ൽ കുറ്റപത്രം സമർപ്പിച്ച കേസിന്റെ വിചാരണ ഹൈക്കോടതി നിർദേശത്തെ തുടർന്ന് കോട്ടയം വിജിലൻസ് കോടതി പൂർത്തിയാക്കുകയായിരുന്നു. കേസന്വേഷണത്തിനിടെ തച്ചങ്കരി ഡി.ഐ.ജിയായി സ്ഥാനക്കയറ്റം നേടിയിരുന്നു.

കേസിൽ നിന്ന് ഒഴിവാക്കണമെന്നാവശ്യപ്പെട്ട് തച്ചങ്കരി നൽകിയ ഹർജി കോടതി നേരത്തെ നിരസിച്ചിരുന്നു. കുടുംബവിഹിതമായും ഇഷ്ടദാനമായും ലഭിച്ച സ്വത്തുക്കളാണ് കേസിലെ പരാമർശങ്ങൾക്ക് കാരണമെന്നായിരുന്നു അദ്ദേഹത്തിന്റെ വാദം. എന്നാൽ കുറ്റപത്രം നിലനിൽക്കുമെന്ന് വ്യക്തമാക്കിയ കോടതി ഹർജി തള്ളി. സമയബന്ധിതമായി വിധി പറയാൻ ഹൈക്കോടതി നിർദേശം നൽകിയതിനെ തുടർന്ന് വിചാരണ നടപടികൾ വേഗത്തിലാക്കി. ഇതിനിടെ ഔദ്യോഗിക പദവിയിലിരിക്കെ ഉപയോഗിച്ചിരുന്ന മൂന്ന് നക്ഷത്ര ചിഹ്നമുള്ള ബോർഡ് ഘടിപ്പിച്ച സ്വകാര്യ വാഹനത്തിൽ തച്ചങ്കരി കോടതിയിലെത്തിയതും വിവാദമായിരുന്നു.