കേന്ദ്രത്തിന്റെ ‘വന്ദേമാതരം’ തിട്ടൂരം തള്ളി കർണാടക; ‘സംസ്ഥാനങ്ങളെ നിയന്ത്രിക്കാമെന്ന് കരുതേണ്ട’

ബെംഗളൂരു: സംസ്ഥാനങ്ങളിലെ ഔദ്യോഗിക പരിപാടികളിൽ ദേശീയ ഗീതമായ ‘വന്ദേമാതരം’ പൂർണമായി ആലപിക്കണമെന്ന കേന്ദ്രസർക്കാരിന്റെ നിർദേശത്തിന് കർണാടകയുടെ മറുപടി. കേന്ദ്രത്തിന്റെ നിർദേശം അതേപടി നടപ്പാക്കേണ്ടതില്ലെന്ന് വ്യക്തമാക്കി സംസ്ഥാന സർക്കാർ പുതിയ ഉത്തരവിറക്കി. കർണാടകയിലെ ഔദ്യോഗിക ചടങ്ങുകളിൽ വന്ദേമാതരത്തിന്റെ ആദ്യ രണ്ട് ഖണ്ഡികകൾ മാത്രം ആലപിച്ചാൽ മതിയെന്നാണ് ഉത്തരവ്.

സംസ്ഥാനങ്ങളുടെ ഭരണപരമായ കാര്യങ്ങളിൽ കേന്ദ്രം നിർദേശങ്ങൾ അടിച്ചേൽപ്പിക്കുന്ന പ്രവണതയ്‌ക്കെതിരായ രാഷ്ട്രീയ സന്ദേശം കൂടിയാണ് കർണാടകയുടെ തീരുമാനം. ദേശീയതയുടെ പേരിൽ സംസ്ഥാനങ്ങളുടെ ഭരണപരമായ സ്വാതന്ത്ര്യത്തിലേക്ക് കേന്ദ്രം കടന്നുകയറുന്നുവെന്ന വിമർശനം ശക്തമാകുന്നതിനിടെയാണ് കർണാടക നിലപാട് വ്യക്തമാക്കിയിരിക്കുന്നത്.

ഓരോ സംസ്ഥാനത്തിന്റെയും ഭരണപരമായ സാഹചര്യങ്ങളും ഔദ്യോഗിക ചടങ്ങുകളുടെ രീതികളും വ്യത്യസ്തമായിരിക്കെ, ഡൽഹിയിൽ നിന്ന് ഏകപക്ഷീയമായി നിർദേശങ്ങൾ നൽകുന്നത് രാജ്യത്തിന്റെ ഫെഡറൽ ഘടനയോടുള്ള അവഗണനയാണെന്ന വിമർശനവും ഉയരുന്നു. ദേശീയഗാനത്തെയും ദേശീയ ഗീതത്തെയും ആദരിക്കുന്നതിൽ തർക്കമില്ലെങ്കിലും, അതിന്റെ പേരിൽ സംസ്ഥാന സർക്കാരുകളുടെ അധികാരപരിധിയിൽ ഇടപെടാനുള്ള കേന്ദ്ര നീക്കം ചോദ്യം ചെയ്യപ്പെടേണ്ടതാണെന്ന നിലപാടാണ് കർണാടക സ്വീകരിച്ചിരിക്കുന്നത്.

കേന്ദ്രത്തിന്റെ എല്ലാ നിർദേശങ്ങൾക്കും കണ്ണടച്ച് അനുസരിക്കുന്ന സംസ്ഥാനമല്ല കർണാടകയെന്ന രാഷ്ട്രീയ സന്ദേശവും ഇതിലൂടെ പുറത്തുവരുന്നു. കേന്ദ്ര-സംസ്ഥാന ബന്ധത്തിൽ അധികാര കേന്ദ്രീകരണത്തിനെതിരെ സംസ്ഥാനങ്ങളുടെ ശബ്ദം ശക്തമാകുന്നതിന്റെ മറ്റൊരു ഉദാഹരണമായാണ് കർണാടകയുടെ നീക്കം വിലയിരുത്തപ്പെടുന്നത്.