കർണാടകയിൽ ഓപ്പറേഷൻ താമരയ്ക്ക് വീണ്ടും നീക്കമോ? 25 എംഎൽഎമാരെക്കുറിച്ച് ബിജെപി അവകാശവാദം; തിരിച്ചടിച്ച് ഡി.കെ. ശിവകുമാർ

കർണാടക രാഷ്ട്രീയ ചരിത്രത്തിൽ എതിർപക്ഷത്തെ സർക്കാരുകളെ അട്ടിമറിക്കാൻ ലക്ഷ്യമിട്ട് നടത്തിയ നീക്കങ്ങളും അവയെ പ്രതിരോധിക്കുന്നതിൽ കോൺഗ്രസ്-ജെഡിഎസ് സഖ്യവും ഭരണകക്ഷികളും കൈക്കൊണ്ട തന്ത്രങ്ങളും എക്കാലത്തും വലിയ ചർച്ചാവിഷയമായിട്ടുണ്ട്. കർണാടക രാഷ്ട്രീയത്തിലെ 'ഓപ്പറേഷൻ താമര' എന്ന പ്രയോഗവും സർക്കാരുകളെ അട്ടിമറിക്കാനുള്ള രാഷ്ട്രീയ നീക്കങ്ങൾ പരാജയപ്പെട്ടതിന്റെ പ്രധാന കാരണങ്ങളും ഇന്നും ഇന്ത്യൻ രാഷ്ട്രീയത്തിൽ പാഠപുസ്തകമാണ്.കർണാടകയിൽ കേവലഭൂരിപക്ഷം ലഭിക്കാത്തതോ അല്ലെങ്കിൽ സഖ്യകക്ഷികൾ തമ്മിലുള്ള ഭിന്നതകളോ മുതലെടുത്ത് എതിർപക്ഷത്തെ എം.എൽ.എമാരെ രാജിവെപ്പിച്ചോ അല്ലാതെയോ ഭരണകൂടങ്ങളെ അട്ടിമറിക്കുന്ന തന്ത്രത്തിനാണ് രാഷ്ട്രീയ എതിരാളികൾ 'ഓപ്പറേഷൻ താമര' എന്ന് പേരിട്ടത്. 2008-ലും തുടർന്ന് 2019-ലുമെല്ലാം കർണാടക രാഷ്ട്രീയത്തിൽ ഈ പ്രയോഗം വ്യാപകമായി കേൾക്കാൻ ഇടവന്നതാണ്. നിയമസഭയിലെ പ്രതിരോധവും സുപ്രധാന നീക്കങ്ങളും എന്നും ബിജെപിക്ക് കർണാടകയിൽ ചെറിയ മേൽക്കൈ നൽകിയിട്ടുണ്ട്.

ഭരണപക്ഷത്തെ അസ്ഥിരപ്പെടുത്താൻ ശ്രമങ്ങൾ നടക്കുമ്പോൾ തന്നെ ഭരണകക്ഷികൾ അതീവ ജാഗ്രത പുലർത്താറുണ്ട്. എം.എൽ.എമാരെ റിസോർട്ടുകളിലേക്കോ സുരക്ഷിത കേന്ദ്രങ്ങളിലേക്കോ മാറ്റി സംരക്ഷിക്കുന്ന തന്ത്രങ്ങൾ കർണാടകയിൽ പലതവണ പരീക്ഷിക്കപ്പെട്ടിട്ടുണ്ട്. ഇത് എതിർപക്ഷത്തിന് എം.എൽ.എമാരെ നേരിട്ട് ബന്ധപ്പെടാനുള്ള അവസരം പരിമിതപ്പെടുത്തിയ ഘടകമാണ്. എം.എൽ.എമാരെ ചാക്കിട്ടുപിടിക്കുന്നതിനെതിരെ നിയമപരമായി കർശന നടപടികൾ വരുന്നത് അട്ടിമറി നീക്കങ്ങൾക്ക് വലിയ തിരിച്ചടിയായിരുന്നു. കോടതികളുടെ ഇടപെടലുകളും നിയമപരമായ അവ്യക്തതകളും ഇത്തരം രാഷ്ട്രീയ കുതിരക്കച്ചവടങ്ങൾക്ക് തടയിട്ടു. കർണാടകയിൽ ഇനി നിയമസഭാ തിരഞ്ഞെടുപ്പിന് രണ്ട് വർഷം മാത്രമാണ് ബാക്കി നിൽക്കുന്നത്. ഇതിനിടയിൽ കൈയിൽനിന്ന് വഴുതിവീണ കർണാടക തിരികെ പിടിക്കാനുള്ള തന്ത്രങ്ങൾ ബിജെപി തുടങ്ങിക്കഴിഞ്ഞിരിക്കുകയാണ്. 25 സിറ്റിങ് എം.എൽ.എമാരെ വിലയ്ക്കു വാങ്ങിയെന്നും നിയമസഭാ തിരഞ്ഞെടുപ്പ് പ്രഖ്യാപിക്കുന്ന വേളയിൽ ഈ എം.എൽ.എമാർ ബിജെപിക്ക് കൈകൊടുക്കുമെന്നും അവകാശവാദവുമായി നേതാക്കൾ രംഗത്തെത്തിയിരിക്കുകയാണ്.ബിജെപി സംസ്ഥാന അധ്യക്ഷൻ ബി.വൈ. വിജയേന്ദ്രയാണ് ഇക്കാര്യം ചൂണ്ടിക്കാട്ടി കർണാടക രാഷ്ട്രീയത്തിൽ വെടിപൊട്ടിച്ചിരിക്കുന്നത്. എന്നാൽ ആ നീക്കത്തിന് ചെക്ക് വച്ച മുഖ്യമന്ത്രി ഡി.കെ. ശിവകുമാർ പരിഹാസത്തോടെയാണ് ബിജെപി അധ്യക്ഷനെതിരെ തിരിച്ചടിച്ചത്. ഒട്ടും സമയം കളയാതെ ആ നേതാക്കളെ സ്വന്തം പാർട്ടിയിലേക്ക് സ്വീകരിക്കാൻ വിജയേന്ദ്ര തയ്യാറാകണമെന്ന് മുഖ്യമന്ത്രി ഡി.കെ. ശിവകുമാർ പറഞ്ഞു.

ഭരണകക്ഷിയിലെ മന്ത്രിമാരെ ബിജെപി ചാക്കിട്ടുപിടിക്കാൻ ശ്രമിക്കുന്നുണ്ടോ എന്ന മാധ്യമപ്രവർത്തകരുടെ ചോദ്യത്തിന് മറുപടി പറയുമ്പോഴാണ് വിജയേന്ദ്ര 25 എം.എൽ.എമാരുടെ കാര്യം ചൂണ്ടിക്കാട്ടിയത്. ബിജെപി നേതാവിന്റെ അവകാശവാദങ്ങളെ തള്ളിക്കളഞ്ഞ ഡി.കെ. ശിവകുമാർ, വൈകാതെ ആ നേതാക്കളെ പാർട്ടിയിൽ എത്രയും വേഗം എടുക്കാൻ ആവശ്യപ്പെട്ടു.'ആദ്യം ആ നേതാക്കളെ അദ്ദേഹത്തിന്റെ പാർട്ടിയിലേക്ക് ചേർക്കാൻ പറയൂ, ഒട്ടും വൈകിപ്പിക്കേണ്ട' എന്നാണ് ശിവകുമാർ പരിഹസിച്ചത്. രാജ്യസഭാ തിരഞ്ഞെടുപ്പിൽ കുമാരസ്വാമിക്കും വിജയേന്ദ്രയ്ക്കും സ്വന്തം പാർട്ടിയിൽ നിന്ന് ആരാണ് ക്രോസ് വോട്ട് ചെയ്തതെന്ന് കണ്ടെത്താൻ പോലും കഴിഞ്ഞിട്ടില്ല. അവരുടെ നേതാക്കൾ കോൺഗ്രസിനാണ് വോട്ട് ചെയ്തത്. ഇനി ഇതിൽ കൂടുതൽ എന്താണ് വേണ്ടത്? അതുകൊണ്ട് വിജയേന്ദ്ര സമയം കളയാതെ നേതാക്കളെ പാർട്ടിയിലേക്ക് എടുക്കട്ടെയെന്നാണ് ശിവകുമാർ കൂട്ടിച്ചേർത്തത്.കർണാടകയിൽ കോൺഗ്രസ് ഭരണത്തിൽ വലിയ ആഭ്യന്തര തർക്കങ്ങൾ നിലനിൽക്കുന്നുണ്ടെന്നും മുഖ്യമന്ത്രി ഡി.കെ. ശിവകുമാറിലുള്ള വിശ്വാസം കോൺഗ്രസ് നേതാക്കൾക്ക് നഷ്ടപ്പെട്ടുവെന്നും ബിജെപി സംസ്ഥാന അധ്യക്ഷൻ പലകുറി ആവർത്തിച്ചിരുന്നു. ഇതിന് പിന്നാലെ മന്ത്രിസഭയിലുള്ളവരെ കുടുക്കാൻ സ്റ്റിങ് ഓപ്പറേഷൻ കെണികൾ ഒരുങ്ങുന്നുണ്ടെന്നും സൂക്ഷിച്ച് പ്രവർത്തിക്കണമെന്നും ഡി.കെ. ശിവകുമാർ കഴിഞ്ഞ ദിവസം ഭരണകക്ഷി എം.എൽ.എമാർക്ക് മുന്നറിയിപ്പ് നൽകിയിരുന്നു.

തനിക്കും തന്റെ മന്ത്രിസഭയ്ക്കുമെതിരെ ഗൂഢാലോചന നടത്തുന്നവരെ അറിയാമെന്നും കർണാടക കോൺഗ്രസിലെ ചില ചതിയന്മാരെക്കുറിച്ച് ചൂണ്ടിക്കാട്ടിയും ഡി.കെ. പറയുമ്പോൾ ബിജെപിയുടെ അവകാശവാദങ്ങളെ മറ്റൊരു തരത്തിൽ ഡി.കെ. അംഗീകരിക്കുന്നുണ്ടെന്നാണ് വിവരം.
കോൺഗ്രസ് നേതാവ് ഡി.കെ. ശിവകുമാറിനെപ്പോലുള്ള പ്രമുഖ നേതാക്കൾ അട്ടിമറി ശ്രമങ്ങളെ ശക്തമായ ഭാഷയിൽ പ്രതിരോധിക്കുകയും കൃത്യമായ സമയത്ത് വിവരങ്ങൾ ജനങ്ങൾക്ക് മുന്നിൽ തുറന്നുകാട്ടുകയും ചെയ്തിട്ടുണ്ട്. സ്റ്റിങ് ഓപ്പറേഷൻ ശ്രമങ്ങളെയും ഭരണപക്ഷം തുടക്കത്തിലേ തിരിച്ചറിഞ്ഞ് പ്രതിരോധിക്കാൻ സാധിച്ചത് കോൺഗ്രസിന് നേട്ടമാണ്.ജനങ്ങൾ തിരഞ്ഞെടുത്ത ഒരു സർക്കാരിനെ ജനാധിപത്യവിരുദ്ധ മാർഗങ്ങളിലൂടെ അട്ടിമറിക്കാൻ ശ്രമിക്കുന്നത് പൊതുജനമധ്യത്തിൽ വലിയ തിരിച്ചടിയുണ്ടാക്കുമെന്ന് രാഷ്ട്രീയ പാർട്ടികൾ തിരിച്ചറിയുന്നുണ്ട്. ഇത്തരം നീക്കങ്ങൾ ജനങ്ങളിൽ ഉണ്ടാക്കുന്ന അതൃപ്തിയും പ്രതിഷേധവും തിരഞ്ഞെടുപ്പുകളിൽ തിരിച്ചടിയാകുമെന്ന ഭയവും കുതിരക്കച്ചവട ശ്രമങ്ങൾക്ക് വേഗത കുറയ്ക്കുന്ന ഘടകമാണ്.