ദർഭംഗ എംഎൽസി സീറ്റിൽ ബിജെപിക്ക് തിരിച്ചടി; സിറ്റിങ് സീറ്റിൽ ആർജെഡിക്ക് അട്ടിമറി വിജയം

ബിഹാർ നിയമനിർമാണ കൗൺസിലിലേക്ക് നടന്ന തിരഞ്ഞെടുപ്പിലാണ് ബിജെപിക്ക് അപ്രതീക്ഷിത തിരിച്ചടി നേരിട്ടത്. ദർഭംഗ ഗ്രാജ്വേറ്റ്സ് മണ്ഡലത്തിൽ ആർജെഡി സ്ഥാനാർഥി അനിൽ കുമാർ ഝാ വിജയിച്ചു. ബിജെപിയുടെ സിറ്റിങ് എംഎൽസിയും എൻഡിഎ സ്ഥാനാർഥിയുമായ സർവേഷ് കുമാറിനെയാണ് പരാജയപ്പെടുത്തിയത്.

25,406 വോട്ടുകൾ നേടിയ അനിൽ കുമാർ ഝാ 21,396 വോട്ടുകൾ നേടിയ സർവേഷ് കുമാറിനെ 4,010 വോട്ടുകളുടെ ഭൂരിപക്ഷത്തിലാണ് തോൽപ്പിച്ചത്. ഏകദേശം 60 മണിക്കൂർ നീണ്ട വോട്ടെണ്ണലിനൊടുവിലാണ് വിജയിയെ പ്രഖ്യാപിച്ചത്. 

വോട്ടെണ്ണലിന്റെ ആദ്യഘട്ടത്തിൽ പത്ത് റൗണ്ടുകളിലും ബിജെപി സ്ഥാനാർഥിക്കായിരുന്നു മുന്നേറ്റം. എന്നാൽ വിജയത്തിന് ആവശ്യമായ വോട്ട് ക്വാട്ട ഒരു സ്ഥാനാർഥിക്കും നേടാനാകാത്തതോടെ രണ്ടാം മുൻഗണനാ വോട്ടുകൾ എണ്ണുകയായിരുന്നു. മത്സരത്തിൽനിന്ന് പുറത്തായ സ്ഥാനാർഥികളുടെ ബാലറ്റുകളിലെ അടുത്ത മുൻഗണനാ വോട്ടുകൾ കൈമാറിയപ്പോൾ അനിൽ കുമാർ ഝാ മുന്നിലെത്തി. ഇതോടെയാണ് ബിജെപിയുടെ വിജയം അവസാനഘട്ടത്തിൽ കൈവിട്ടത്. 

ബിഹാറിലെ എട്ട് നിയമനിർമാണ കൗൺസിൽ സീറ്റുകളിലേക്കാണ് തിരഞ്ഞെടുപ്പ് നടന്നത്. ഇതിൽ ആർജെഡിയും ബിജെപിയും രണ്ട് സീറ്റുകൾ വീതം നേടി. ജെഡിയുവിനും ജൻസുരാജ് പാർട്ടിക്കും ഓരോ സീറ്റ് ലഭിച്ചപ്പോൾ രണ്ട് സീറ്റുകളിൽ സ്വതന്ത്ര സ്ഥാനാർഥികളും വിജയിച്ചു.