മെസ്സി പെനാൽറ്റി പാഴാക്കിയതിനെ തുടർന്നുണ്ടായ തർക്കം; ബംഗ്ലാദേശിൽ ബ്രസീൽ ആരാധകനായ ഓട്ടോഡ്രൈവർ കൊല്ലപ്പെട്ടു.

കുമില്ല: ഫിഫ ലോകകപ്പ് മത്സരത്തിനിടെ ലയണൽ മെസ്സി പെനാൽറ്റി പാഴാക്കിയതിനെ തുടർന്ന് അർജന്റീന-ബ്രസീൽ ആരാധകർ തമ്മിലുണ്ടായ വാക്കുതർക്കം കൊലപാതകത്തിൽ കലാശിച്ചു. ബംഗ്ലാദേശിലെ കുമില്ലയിൽ നടന്ന സംഭവത്തിൽ 35-കാരനായ ഓട്ടോഡ്രൈവർ മുഹമ്മദ് ഷരീഫുൽ ഇസ്ലാം കൊല്ലപ്പെട്ടു.

അർജന്റീന–ഈജിപ്ത് മത്സരം ചായക്കടയിൽ കണ്ടുകൊണ്ടിരിക്കെയാണ് സംഭവം. മെസ്സി പെനാൽറ്റി നഷ്ടപ്പെടുത്തിയതിന് പിന്നാലെ ആരാധകർ തമ്മിൽ വാക്കേറ്റമുണ്ടാവുകയും പിന്നീട് അത് കയ്യാങ്കളിയിലേക്ക് മാറുകയും ചെയ്തു. ആക്രമണത്തിനിടെ ഷരീഫുലിന് തലയിൽ ഗുരുതരമായി പരിക്കേറ്റു. നാട്ടുകാർ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

സംഭവത്തിൽ രണ്ട് പ്രാദേശിക യുവാക്കളെ പ്രതികളായി തിരിച്ചറിഞ്ഞതായി പോലീസ് അറിയിച്ചു. ഇവരെ പിടികൂടാനുള്ള ശ്രമം തുടരുകയാണെന്നും കേസിൽ അന്വേഷണം പുരോഗമിക്കുകയാണെന്നും മാധ്യമങ്ങൾ റിപ്പോർട്ട് ചെയ്യുന്നു.