വെനസ്വേല ഭൂചലനം : മരണസംഖ്യ 235 കടന്നു, ആയിരത്തിലേറെപ്പേരെ കാണാതായി.
അവശിഷ്ടങ്ങൾക്കിടയിൽ കുടുങ്ങിക്കിടക്കുന്നത് നിരവധി പേർ; ആശുപത്രികൾ ഉൾപ്പടെ നിരവധി കെട്ടിടങ്ങൾ തകർന്നു, രക്ഷാപ്രവർത്തനം യുദ്ധകാലാടിസ്ഥാനത്തിൽ.
Desk Mediagraamam 
വെനസ്വേലയിൽ കഴിഞ്ഞ ദിവസമുണ്ടായ അതിശക്തമായ ഇരട്ട ഭൂചലനത്തെത്തുടർന്ന് ദുരന്തത്തിന്റെ വ്യാപ്തി വർദ്ധിച്ചുകൊണ്ടിരിക്കുകയാണ്. ഒടുവിൽ പുറത്തുവരുന്ന റിപ്പോർട്ടുകൾ പ്രകാരം 235-ലധികം ആളുകൾ മരണപ്പെടുകയും, 4,300-ലേറെ പേർക്ക് പരിക്കേൽക്കുകയും ചെയ്തിട്ടുണ്ട്. തകർന്നുവീണ ബഹുനില കെട്ടിടങ്ങളുടെ അവശിഷ്ടങ്ങൾക്കിടയിൽ ആയിരത്തിലധികം ആളുകളെ കാണാതായതായാണ് വിവരം. തലസ്ഥാനമായ കാരക്കാസ്, കരീബിയൻ തീരപ്രദേശമായ ലാ ഗ്വെയ്റ എന്നിവിടങ്ങളിൽ നൂറിലധികം വൻകിട കെട്ടിടങ്ങൾ പൂർണ്ണമായും തകർന്നത് നാശനഷ്ടങ്ങളുടെ ആഘാതം ഇരട്ടിയാക്കി.
പ്രമുഖ ആശുപത്രികൾ ഉൾപ്പെടെ തകർന്നതിനാൽ പരിക്കേറ്റവർക്ക് അടിയന്തര വൈദ്യസഹായം എത്തിക്കുന്നത് കടുത്ത പ്രതിസന്ധിയിലായിരിക്കുകയാണ്. കെട്ടിടങ്ങളുടെ താഴത്തെ നിലകളിലും പാർക്കിങ് കേന്ദ്രങ്ങളിലും നിരവധി ആളുകൾ കുടുങ്ങിക്കിടക്കുന്നതിനാൽ മരണസംഖ്യ ഇനിയും ഉയർന്നേക്കാമെന്നാണ് ആശങ്ക. തകർന്ന കോൺക്രീറ്റ് പാളികൾ നീക്കം ചെയ്ത് രക്ഷാപ്രവർത്തനം വേഗത്തിലാക്കാൻ വലിയ നിർമാണ ഉപകരണങ്ങൾ വിട്ടുനൽകണമെന്ന് ഭരണകൂടം അഭ്യർത്ഥിച്ചിട്ടുണ്ട്. ഒരു നൂറ്റാണ്ടിനിടെ രാജ്യം കണ്ട ഏറ്റവും വലിയ ഈ പ്രകൃതിദുരന്തത്തിൽ യുദ്ധകാലാടിസ്ഥാനത്തിലാണ് നിലവിൽ രക്ഷാപ്രവർത്തനം പുരോഗമിക്കുന്നത്.
