പെൺകുഞ്ഞ് ജനിച്ചതിലെ അമർഷം; രണ്ടാഴ്ച പ്രായമായ സ്വന്തം കുഞ്ഞിനെ വെള്ളക്കെട്ടിൽ എറിഞ്ഞ് കൊന്ന പിതാവ് അറസ്റ്റിൽ.

ബംഗളൂരു: കർണാടകയിലെ ചിക്കബല്ലാപ്പൂരിൽ രണ്ടാഴ്ച പോലും പ്രായമാകാത്ത സ്വന്തം പെൺകുഞ്ഞിനെ വീട്ടിലെ ഭൂഗർഭ ജലസംഭരണിയിലേക്ക് (വാട്ടർ സംപ്) എറിഞ്ഞ് കൊലപ്പെടുത്തിയ കേസിൽ പിതാവായ 28-കാരൻ എം. ഇമ്രാനെ പൊലീസ് അറസ്റ്റ് ചെയ്തു. ലിംഗവിവേചന മനോഭാവം മൂലമാണ് ഈ ക്രൂരകൃത്യം നടന്നതെന്നാണ് പ്രാഥമിക അന്വേഷണത്തിൽ വ്യക്തമായതെന്ന് പൊലീസ് അറിയിച്ചു.

ഇമ്രാനും ഭാര്യ മുസ്കാനും രണ്ട് ആഴ്ച മുൻപാണ് രണ്ടാമത്തെ കുഞ്ഞിന് ജന്മം നൽകിയത്. ആദ്യത്തേതും പെൺകുഞ്ഞായതിനാൽ ഇത്തവണ ആൺകുഞ്ഞ് ജനിക്കുമെന്ന പ്രതീക്ഷയിലായിരുന്ന ഇമ്രാൻ, വീണ്ടും പെൺകുഞ്ഞ് പിറന്നതിൽ കടുത്ത നിരാശയും അമർഷവും പ്രകടിപ്പിച്ചിരുന്നുവെന്നാണ് അന്വേഷണത്തിൽ കണ്ടെത്തിയത്.

വ്യാഴാഴ്ച പുലർച്ചെ വീട്ടിലുള്ളവർ ഉറങ്ങിക്കിടക്കുന്നതിനിടെ അമ്മയുടെ അരികിൽ കിടന്നിരുന്ന കുഞ്ഞിനെ ഇയാൾ എടുത്ത് വീട്ടിലെ വാട്ടർ സംപിലേക്ക് എറിഞ്ഞതായാണ് പൊലീസ് പറയുന്നത്. രാവിലെ കുഞ്ഞിനെ കാണാതായതോടെ കുടുംബാംഗങ്ങൾ വ്യാപകമായി തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് സംശയം തോന്നി സംപിലെ വെള്ളം വറ്റിച്ചുനോക്കിയപ്പോഴാണ് കുഞ്ഞിന്റെ മൃതദേഹം കണ്ടെത്തിയത്.

സംഭവവിവരമറിഞ്ഞ് സ്ഥലത്തെത്തിയ ചിക്കബല്ലാപ്പൂർ ടൗൺ പൊലീസ് മൃതദേഹം പോസ്റ്റ്മോർട്ടത്തിനായി മാറ്റി. ചോദ്യം ചെയ്യലിൽ സംശയം തോന്നിയതിനെ തുടർന്ന് പിതാവിനെ കസ്റ്റഡിയിലെടുത്ത പൊലീസ് പിന്നീട് കൊലപാതകക്കുറ്റം ചുമത്തി അറസ്റ്റ് ചെയ്തു.

സംഭവത്തിന് പിന്നിൽ മറ്റ് കുടുംബപ്രശ്നങ്ങളോ ലിംഗവിവേചനപരമായ സമ്മർദ്ദങ്ങളോ ഉണ്ടായിരുന്നോയെന്ന് ഉൾപ്പെടെ എല്ലാ വശങ്ങളും പൊലീസ് വിശദമായി അന്വേഷിച്ചുവരികയാണ്.