നരേന്ദ്ര മോദി പ്രധാനമന്ത്രി പദം രാജിവച്ച് ഇൻഫ്ലുവൻസർ ആയിക്കോളൂ; അഭിജീത് ദിപ്കെ

ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമർശനവുമായി സിജെപി (CJP) നേതാവ് അഭിജീത് ദിപ്കെ. പ്രധാനമന്ത്രി ഔദ്യോഗിക ചുമതലകളേക്കാൾ സോഷ്യൽ മീഡിയയിലും പ്രചാരണ വീഡിയോകളിലും കൂടുതൽ ശ്രദ്ധ ചെലുത്തുകയാണെന്ന് ആരോപിച്ച ദിപ്കെ, "നരേന്ദ്ര മോദി പ്രധാനമന്ത്രി സ്ഥാനം രാജിവെച്ച് ഒരു ഇൻഫ്ലുവൻസർ ആയിക്കോളൂ" എന്ന് പരിഹസിച്ചു. 

പ്രധാനമന്ത്രിയുടെ ഇൻസ്റ്റഗ്രാമിലടക്കമുള്ള സാമൂഹിക മാധ്യമ പോസ്റ്റുകളെ കുറിച്ചുള്ള ചോദ്യത്തിന് മറുപടി പറയുന്നതിനിടെയാണ് ദിപ്കെയുടെ പ്രതികരണം. രാജ്യത്തെ തൊഴിലില്ലായ്മ, വിദ്യാഭ്യാസം, യുവജനങ്ങളുടെ പ്രശ്നങ്ങൾ തുടങ്ങിയ വിഷയങ്ങളിൽ സർക്കാർ കൂടുതൽ ശ്രദ്ധ ചെലുത്തണമെന്നും അദ്ദേഹം ആവശ്യപ്പെട്ടു. 

നീറ്റ് പരീക്ഷാ ക്രമക്കേടുമായി ബന്ധപ്പെട്ട് രാജ്യവ്യാപക പ്രതിഷേധങ്ങൾക്ക് നേതൃത്വം നൽകിയ സിജെപി അടുത്തിടെ കേന്ദ്ര സർക്കാരിനെതിരെ ശക്തമായ പ്രക്ഷോഭം സംഘടിപ്പിച്ചിരുന്നു. വിദ്യാഭ്യാസ മേഖലയിലെ പരിഷ്കാരങ്ങളും ഉത്തരവാദിത്തവും ആവശ്യപ്പെട്ടുള്ള പ്രക്ഷോഭത്തിന്റെ പശ്ചാത്തലത്തിലാണ് ദിപ്കെയുടെ പുതിയ വിമർശനവും ശ്രദ്ധ നേടുന്നത്.