വിദ്യാർഥി പ്രക്ഷോഭം കൈവിട്ടപ്പോൾ ബി.ജെ.പി. നേതൃത്വം എവിടെ? സംഘടനയുടെ നിഷ്ക്രിയത ചർച്ചയാകുന്നു

ന്യൂഡൽഹി: വിദ്യാർഥി പ്രക്ഷോഭം ശക്തിപ്രാപിച്ച് സർക്കാരിന്റെയും പാർട്ടിയുടെയും പ്രതിച്ഛായയ്ക്ക് തിരിച്ചടിയായ സാഹചര്യത്തിൽ ബി.ജെ.പി. സംഘടനാ നേതൃത്വത്തിന്റെ നിഷ്ക്രിയതയെക്കുറിച്ച് പാർട്ടിക്കുള്ളിലും പുറത്തും ചോദ്യങ്ങൾ ഉയരുന്നു.കേന്ദ്രമന്ത്രി ധർമേന്ദ്ര പ്രധാൻ രാജിവെച്ചതോടെ എൻ.ഡി.എ. സർക്കാർ രാഷ്ട്രീയ പ്രതിസന്ധി നേരിട്ടപ്പോഴും സംഘടനാതലത്തിൽ ശക്തമായ ഇടപെടൽ ഉണ്ടായില്ലെന്നാണ് വിലയിരുത്തൽ.

ചോദ്യപ്പേപ്പർ ചോർച്ചയുമായി ബന്ധപ്പെട്ട വിഷയത്തിന് ജനങ്ങൾക്കിടയിൽ വലിയ രാഷ്ട്രീയ പ്രത്യാഘാതം സൃഷ്ടിക്കാനാകുമെന്ന് തിരിച്ചറിയുന്നതിലും അതിനെ പ്രതിരോധിക്കാൻ ആവശ്യമായ രാഷ്ട്രീയ തന്ത്രം ആവിഷ്‌കരിക്കുന്നതിലും പാർട്ടി നേതൃത്വം പരാജയപ്പെട്ടുവെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. താഴെത്തട്ടിലെ ജനവികാരം മനസ്സിലാക്കുന്നതിൽ നേതൃത്വത്തിന് വീഴ്ച പറ്റിയോയെന്ന ചോദ്യവും ഉയരുന്നുണ്ട്.

പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തരമന്ത്രി അമിത് ഷായുടെയും സ്വാധീനത്തിന് സമാനമായി സംഘടനയെ നയിക്കാൻ കഴിയുന്ന നേതാക്കളുടെ അഭാവം നിലവിലെ ബി.ജെ.പി നേതൃത്വത്തിന്റെ പ്രധാന പരിമിതിയാണെന്നും വിലയിരുത്തപ്പെടുന്നു. രാജ്യത്തെ മധ്യവർഗമാണ് ബി.ജെ.പി.യുടെ പ്രധാന പിന്തുണാ അടിത്തറ. വിദ്യാർഥി പ്രക്ഷോഭം ഈ വിഭാഗത്തിലും സ്വാധീനം ചെലുത്തിത്തുടങ്ങിയിട്ടും സർക്കാർ നടപടികളെ പിന്തുണയ്ക്കുന്ന പ്രസ്താവനകളിൽ മാത്രം നേതൃത്വം ഒതുങ്ങിയതായാണ് വിമർശനം.

അതേസമയം, സമരം കുറച്ചുകാലം കൂടി തുടരുന്നത് നിലവിലെ രാഷ്ട്രീയ സാഹചര്യത്തിൽ മറ്റ് വിവാദങ്ങളിൽനിന്ന് ശ്രദ്ധ തിരിക്കാനാകുമെന്ന വിലയിരുത്തലും പാർട്ടിയിലെ ഒരു വിഭാഗത്തിനുണ്ടെന്നാണ് റിപ്പോർട്ടുകൾ. ചോദ്യപ്പേപ്പർ ചോർച്ചയ്ക്ക് പിന്നാലെ പ്രതിപക്ഷം അയോധ്യ സംഭാവനാ വിവാദം ശക്തമായി ഉയർത്തുമെന്ന ആശങ്കയും ഭരണനേതൃത്വത്തിനുണ്ട്.

മുതിർന്ന നേതാക്കളുടെ മൗനം ചർച്ചയാകുന്നു

കേന്ദ്രമന്ത്രിസഭയിലെ മുതിർന്ന നേതാക്കളായ രാജ്‌നാഥ് സിങ്, ശിവരാജ് സിങ് ചൗഹാൻ, നിതിൻ ഗഡ്കരി എന്നിവർ സ്വന്തം വകുപ്പുകൾക്കപ്പുറം പൊതുവിഷയങ്ങളിൽ ഇടപെടുന്നതോ അഭിപ്രായം പ്രകടിപ്പിക്കുന്നതോ വളരെ കുറവാണെന്നാണ് വിലയിരുത്തൽ. പ്രധാന തീരുമാനങ്ങൾ മോദിയും അമിത് ഷായും കേന്ദ്രീകരിച്ചാണ് നടക്കുന്നതെന്ന ആക്ഷേപം പാർട്ടിക്കുള്ളിൽ നിലനിൽക്കുന്നുവെന്നും റിപ്പോർട്ടുകൾ സൂചിപ്പിക്കുന്നു.

ഉത്തർപ്രദേശ് മുഖ്യമന്ത്രി യോഗി ആദിത്യനാഥും വിവാദ വിഷയങ്ങളിൽ നിന്ന് അകലം പാലിക്കുന്ന സമീപനമാണ് സ്വീകരിക്കുന്നതെന്നും ചൂണ്ടിക്കാണിക്കപ്പെടുന്നു. പ്രതിസന്ധി ഘട്ടത്തിൽ പാർട്ടിയെ ഏകോപിപ്പിക്കുകയും ഭരണനേതൃത്വത്തിന് ആവശ്യമായ രാഷ്ട്രീയ നിർദേശങ്ങൾ നൽകുകയും ചെയ്യേണ്ടത് ദേശീയ അധ്യക്ഷൻ നിതിൻ നബിന്റെ ഉത്തരവാദിത്വമാണെങ്കിലും അതിന് തക്കതായ സജീവ ഇടപെടൽ ഇതുവരെ പ്രകടമായിട്ടില്ലെന്നാണ് വിമർശനം.

അതേസമയം, മുൻ ദേശീയ അധ്യക്ഷനും കേന്ദ്രമന്ത്രിയുമായ ജെ.പി. നഡ്ഡയാണ് നിലവിലെ പ്രതിസന്ധി പരിഹരിക്കാൻ കൂടുതൽ സജീവമായി ഇടപെട്ടതെന്നാണ് റിപ്പോർട്ടുകൾ. അമിത് ഷായുടെയും പിന്നീട് ജെ.പി. നഡ്ഡയുടെയും കാലത്ത് ഉണ്ടായിരുന്നതുപോലുള്ള ശക്തമായ സംഘടനാ നേതൃത്വം ഇപ്പോൾ പ്രകടമല്ലെന്നാണ് പാർട്ടിയിലെ മുതിർന്ന നേതാക്കൾ ഉൾപ്പെടെയുള്ളവരുടെ വിലയിരുത്തൽ.