എഫ്ഐആർ രജിസ്റ്റർ ചെയ്യാതെ ദില്ലി പൊലീസ്; 10 മണിക്കൂർ ധർണയ്ക്കൊടുവിൽ ജെബി മേത്തറെയും എൻഎസ്‌യുഐ പ്രവർത്തകരെയും കസ്റ്റഡിയിലെടുത്തു

ന്യൂഡൽഹി: ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരായ പ്രതിഷേധത്തിനിടെ ദില്ലി പൊലീസ് മർദിച്ചെന്ന പരാതിയിൽ എഫ്ഐആർ രജിസ്റ്റർ ചെയ്യണമെന്നാവശ്യപ്പെട്ട് പാർലമെന്റ് സ്ട്രീറ്റ് പൊലീസ് സ്റ്റേഷനു മുന്നിൽ രാത്രി മുഴുവൻ ധർണ നടത്തിയ എൻഎസ്‌യുഐ പ്രവർത്തകരെയും ജെബി മേത്തർ എംപിയെയും പൊലീസ് കസ്റ്റഡിയിലെടുത്തു. പത്ത് മണിക്കൂറോളം നീണ്ട പ്രതിഷേധത്തിനൊടുവിൽ വെള്ളിയാഴ്ച പുലർച്ചെ നാലരയോടെയാണ് പൊലീസ് നടപടി.

ഒക്ടോബർ 13ന് ഗ്യാനേഷ് കുമാറിന്റെ രാജി ആവശ്യപ്പെട്ട് ദില്ലിയിൽ നടത്തിയ പ്രതിഷേധത്തിനിടെ പൊലീസ് മർദനമേറ്റതായി പരാതിപ്പെട്ട ആതിര വിജയൻ, ഋതു അടക്കമുള്ള വിദ്യാർഥികളാണ് പൊലീസ് സ്റ്റേഷനു മുന്നിൽ കുത്തിയിരിപ്പ് സമരം നടത്തിയത്. സംഭവത്തിൽ ഇതുവരെ എഫ്ഐആർ രജിസ്റ്റർ ചെയ്യാത്തതിൽ പ്രതിഷേധിച്ചായിരുന്നു സമരം.

'എഫ്ഐആർ രജിസ്റ്റർ ചെയ്യാതെ പിന്നോട്ടില്ല'

ഒരു വരി എഴുതി എഫ്ഐആർ രജിസ്റ്റർ ചെയ്യേണ്ട പൊലീസ് വിദ്യാർഥികളെ കൈയേറ്റം ചെയ്യുകയാണെന്ന് ജെബി മേത്തർ എംപി പ്രതികരിച്ചു. ശാരീരികമായി അവശയായ ആതിരയെ പൊലീസ് വലിച്ചിഴച്ചെന്നും അവർ വിമർശിച്ചു.

കേരളത്തിൽ കേസെടുത്ത കാര്യം ചൂണ്ടിക്കാട്ടിയാണ് ദില്ലി പൊലീസ് എഫ്ഐആർ രജിസ്റ്റർ ചെയ്യാതിരിക്കുന്നതെന്ന് ആതിര ആരോപിച്ചു. നീതി ലഭിക്കുന്നതുവരെ സമരത്തിൽനിന്ന് പിന്മാറില്ലെന്നും എഫ്ഐആർ രജിസ്റ്റർ ചെയ്യാതെ പിന്നോട്ടില്ലെന്നും ആതിര വ്യക്തമാക്കി.

പിന്തുണയുമായി എത്തിയ യൂത്ത് കോൺഗ്രസ് ദേശീയ അധ്യക്ഷൻ ഉദയ്ഭാനു ചിബ് അടക്കമുള്ളവരെയും പൊലീസ് കസ്റ്റഡിയിലെടുത്ത് നീക്കി. പ്രവർത്തകർ ബാരിക്കേഡ് മറികടക്കാൻ ശ്രമിച്ചതോടെ സ്ഥലത്ത് സംഘർഷമുണ്ടായതായും റിപ്പോർട്ടുകളുണ്ട്. മഫ്തിയിലെത്തിയ പൊലീസ് പ്രവർത്തകരെ മർദിച്ചെന്ന പരാതിയും ഉയർന്നിട്ടുണ്ട്.

ആതിരയ്ക്ക് ആരോഗ്യപ്രശ്നങ്ങളെന്ന് പരാതി

ഒക്ടോബർ 13ലെ പ്രതിഷേധത്തിനിടെയുണ്ടായ പൊലീസ് നടപടിയിൽ സ്ത്രീയെന്ന പരിഗണന പോലും നൽകാതെയാണ് തന്നെ മർദിച്ചതെന്ന് ആതിര നേരത്തേ ആരോപിച്ചിരുന്നു. മർദനത്തെ തുടർന്നുണ്ടായ ശാരീരിക ബുദ്ധിമുട്ടുകൾ ഇപ്പോഴും മാറിയിട്ടില്ലെന്നും കണ്ണിൽ രക്തം കട്ടപിടിച്ചെന്നും കേൾവിക്ക് ബുദ്ധിമുട്ടുണ്ടെന്നും അടിവയറ്റിൽ വേദന തുടരുകയാണെന്നും ആതിര പറഞ്ഞിരുന്നു.

അതേസമയം, ആതിരയെ പൊലീസ് സ്റ്റേഷനിലെത്തിച്ചതിന് പോലും തെളിവില്ലെന്നാണ് ദില്ലി പൊലീസിന്റെ നിലപാടെന്ന് റിപ്പോർട്ടിൽ പറയുന്നു. ദില്ലി പൊലീസ് കേസെടുക്കാത്തപക്ഷം കോടതിയെ സമീപിക്കുമെന്നും ആതിര വ്യക്തമാക്കി.

കേരളത്തിൽ സീറോ എഫ്ഐആർ

അതിനിടെ, ദില്ലിയിലെ പ്രതിഷേധത്തിനിടെ തനിക്കെതിരെ നടന്ന പൊലീസ് അതിക്രമവുമായി ബന്ധപ്പെട്ട് ആതിര വിജയന്റെ പരാതിയിൽ കേരളത്തിൽ കേസെടുത്തു. ഡിജിപിക്ക് ലഭിച്ച പരാതി മ്യൂസിയം പൊലീസിന് കൈമാറിയതിനെ തുടർന്നാണ് സീറോ എഫ്ഐആർ രജിസ്റ്റർ ചെയ്തത്. പ്രതികളായി പ്രത്യേക വ്യക്തികളുടെ പേരുകൾ പരാതിയിൽ പരാമർശിച്ചിട്ടില്ലെന്നാണ് വിവരം.

ദില്ലിയിൽ പൊലീസ് നടപടിക്കെതിരെ കേസെടുക്കണമെന്നാവശ്യപ്പെട്ട് വിദ്യാർഥികൾ നടത്തിയ പ്രതിഷേധം പുലർച്ചെ കസ്റ്റഡിയോടെ അവസാനിച്ചെങ്കിലും, പരാതിയിൽ നിയമനടപടി വേണമെന്ന ആവശ്യത്തിൽ ഉറച്ചുനിൽക്കുകയാണ് എൻഎസ്‌യുഐ പ്രവർത്തകർ.