11കാരിയെ ലൈംഗികമായി പീഡിപ്പിച്ചെന്ന കേസ്; മുൻ മദ്രസ അധ്യാപകൻ അറസ്റ്റിൽ

തിരുവനന്തപുരം: പരീക്ഷയിൽ തോൽപ്പിക്കുമെന്ന് ഭീഷണിപ്പെടുത്തി പതിനൊന്നുകാരിയായ വിദ്യാർത്ഥിനിയെ മദ്രസയിൽ വെച്ച് നിരന്തരം ലൈംഗികമായി പീഡിപ്പിച്ചെന്ന കേസിൽ മുൻ അധ്യാപകൻ അറസ്റ്റിൽ. വിഴിഞ്ഞം പുല്ലൂർക്കോണം സ്വദേശിയായ എ.ആർ. സെയ്ദ് മുഹമ്മദ് (58) ആണ് പൊഴിയൂർ പൊലീസിന്റെ പിടിയിലായത്.

2022–23 കാലയളവിൽ മദ്രസയിൽ അധ്യാപകനായി സേവനമനുഷ്ഠിക്കുന്നതിനിടെയാണ് സംഭവമെന്നാണ് പൊലീസ് പറയുന്നത്. പരീക്ഷയിൽ തോൽപ്പിക്കുമെന്ന ഭീഷണി മുഴക്കിയും അധ്യാപകന്റെ സ്വാധീനം ഉപയോഗിച്ചും കുട്ടിയെ ഭയപ്പെടുത്തി പീഡിപ്പിച്ചെന്നാണ് പരാതി. ഭയം കാരണം കുട്ടി വിവരം പുറത്തുപറയാതെ കഴിയുകയായിരുന്നു.

പിന്നീട് കുട്ടിയുടെ പെരുമാറ്റത്തിൽ അസ്വാഭാവികത ശ്രദ്ധയിൽപ്പെട്ടതിനെ തുടർന്ന് നടത്തിയ കൗൺസിലിംഗിലാണ് സംഭവത്തെക്കുറിച്ചുള്ള വിവരം പുറത്തുവന്നത്. തുടർന്ന് ലഭിച്ച പരാതിയിൽ പൊലീസ് അന്വേഷണം ആരംഭിച്ചു. നെയ്യാറ്റിൻകര ഡിവൈ.എസ്.പി. സ്റ്റുവർട്ട് കീലർ, പൂവാർ സി.ഐയുടെ ചുമതലയുള്ള കണ്ണൻ, പൊഴിയൂർ സി.ഐ. എം.എസ്. അഖിൽ എന്നിവരുടെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.

കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.