ദേശീയപാതയോരത്തെ കെട്ടിടങ്ങളുടെ ദൂരപരിധി കണക്കെടുപ്പ്; സുപ്രീംകോടതി ഉത്തരവിന് പിന്നാലെ നടപടി

ആലപ്പുഴ: ദേശീയപാതയോരത്ത് നിർമാണത്തിലിരിക്കുന്ന കെട്ടിടങ്ങളുടെ കണക്കെടുപ്പ് തദ്ദേശ സ്വയംഭരണ വകുപ്പ് ആരംഭിച്ചു. ദേശീയപാതയുടെ ഇരുവശത്തും നിശ്ചിത അകലം ഒഴിച്ചിടണമെന്ന സുപ്രീംകോടതിയുടെ ഇടക്കാല ഉത്തരവിന്റെ പശ്ചാത്തലത്തിലാണ് നടപടി. നിർമാണാനുമതി ലഭിച്ചെങ്കിലും പണി പൂർത്തിയാകാത്ത കെട്ടിടങ്ങളുടെ വിവരങ്ങളാണ് പ്രധാനമായും ശേഖരിക്കുന്നത്. ഉത്തരവ് കർശനമായി നടപ്പാക്കിയാൽ ഇത്തരം കെട്ടിടങ്ങൾക്ക് പൂർത്തീകരണ സർട്ടിഫിക്കറ്റും കെട്ടിട നമ്പറും ലഭിക്കുന്നതിൽ തടസ്സമുണ്ടാകാൻ സാധ്യതയുണ്ട്. 

സുപ്രീംകോടതി ഇടക്കാല ഉത്തരവ് പ്രകാരം ദേശീയപാതയുടെ മധ്യഭാഗത്തുനിന്ന് 40 മീറ്ററിനുള്ളിൽ വീടുകളും 75 മീറ്റർ പരിധിയിൽ വാണിജ്യ സ്ഥാപനങ്ങളും നിർമിക്കുന്നതിന് നിയന്ത്രണമുണ്ട്. കേരളത്തിൽ ദേശീയപാത 66 വികസിപ്പിക്കുന്നത് 45 മീറ്റർ വീതിയിലാണ്. നിലവിലുള്ള കെട്ടിടങ്ങളെ ഉത്തരവ് ബാധിക്കില്ല. എന്നാൽ അവയിൽ തുടർനിർമാണം നടത്തുന്നതിന് ദേശീയപാത അതോറിറ്റിയുടെയും പൊതുമരാമത്ത് വകുപ്പിന്റെയും പ്രത്യേക അനുമതി ആവശ്യമായി വന്നേക്കും. കേരളത്തിന്റെ പ്രത്യേക സാഹചര്യം പരിഗണിച്ച് ഉത്തരവിൽ ഇളവ് തേടാനാണ് സംസ്ഥാന സർക്കാരിന്റെ നീക്കം. ഉത്തരവ് കേരളത്തിൽ നടപ്പാക്കുന്നതിൽ ഇളവ് ആവശ്യപ്പെട്ട് സുപ്രീംകോടതിയിൽ അപ്പീൽ നൽകുമെന്നും സർക്കാർ വ്യക്തമാക്കിയിട്ടുണ്ട്.