‘നമുക്ക് രണ്ടുപേർക്കും ഒരുമിച്ച് ഡിഗ്രി സർട്ടിഫിക്കറ്റുകൾ പുറത്തുവിടാം’; പ്രധാനമന്ത്രി മോദിയെ വെല്ലുവിളിച്ച് അഭിജീത് ദിപ്‌കെ

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ വിദ്യാഭ്യാസ യോഗ്യതയും ബിരുദ സർട്ടിഫിക്കറ്റുകളും സംബന്ധിച്ച വിവാദം വീണ്ടും ചർച്ചയാകുന്നു. മോദിയുടെ വിദ്യാഭ്യാസ രേഖകൾ പരസ്യപ്പെടുത്തണമെന്ന് ആവശ്യപ്പെട്ട് കോക്രോച്ച് ജനത പാർട്ടി (CJP) അധ്യക്ഷൻ അഭിജീത് ദിപ്‌കെ രംഗത്തെത്തി. തന്റെയും പ്രധാനമന്ത്രിയുടെയും ഡിഗ്രി സർട്ടിഫിക്കറ്റുകൾ ഒരുമിച്ച് പൊതുസമക്ഷം പ്രദർശിപ്പിക്കാമെന്നും അദ്ദേഹം വെല്ലുവിളിച്ചു. 

ജന്തർ മന്തർ പ്രക്ഷോഭത്തിന് പിന്നാലെ ദിപ്‌കെയുടെ വിദ്യാഭ്യാസ യോഗ്യതയെ ചോദ്യം ചെയ്ത് ചില ബിജെപി അനുഭാവികൾ സമൂഹമാധ്യമങ്ങളിൽ പ്രചാരണം നടത്തിയിരുന്നു. ഇതിന് മറുപടിയായാണ് ദിപ്‌കെ പ്രധാനമന്ത്രിയുടെ വിദ്യാഭ്യാസ രേഖകളുടെ സുതാര്യതയും ചോദ്യം ചെയ്തത്. 

പ്രധാനമന്ത്രിയെപ്പോലുള്ള ഉന്നത ഭരണഘടനാ പദവിയിലുള്ള വ്യക്തിയുടെ വിദ്യാഭ്യാസ യോഗ്യത സംബന്ധിച്ച വിവരങ്ങൾ ജനങ്ങൾക്ക് അറിയാനുള്ള അവകാശമുണ്ടെന്നാണ് ദിപ്‌കെയുടെ വാദം. സാധാരണ പൗരന്മാരുടെ സർട്ടിഫിക്കറ്റുകൾ പരിശോധനയ്ക്ക് വിധേയമാകുമ്പോൾ പ്രധാനമന്ത്രിയുടെ സർട്ടിഫിക്കറ്റ് മാത്രം രഹസ്യമായി സൂക്ഷിക്കുന്നതെന്തിനെന്നും അദ്ദേഹം ചോദിച്ചു.

ഡൽഹി സർവകലാശാലയിലും ഗുജറാത്ത് സർവകലാശാലയിലും മോദി നേടിയതായി പറയപ്പെടുന്ന ബിരുദങ്ങളെക്കുറിച്ച് നേരത്തെയും രാഷ്ട്രീയ വിവാദങ്ങൾ ഉയർന്നിരുന്നു. 2016ൽ അന്നത്തെ ബിജെപി അധ്യക്ഷൻ അമിത് ഷായും കേന്ദ്രമന്ത്രി അരുൺ ജെയ്റ്റ്‌ലിയും മോദിയുടെ ബി.എ., എം.എ. ബിരുദങ്ങളുടെ പകർപ്പുകൾ പുറത്തുവിട്ടിരുന്നു. 

അതേസമയം, ദിപ്‌കെ തന്റെ അമേരിക്കയിലെ വിദ്യാഭ്യാസത്തിന് ലഭിച്ച സ്കോളർഷിപ്പിന്റെയും വിദ്യാഭ്യാസ വായ്പയുടെയും രേഖകൾ പുറത്തുവിടാൻ തയ്യാറാണെന്നും, മോദി തന്റെ ബിരുദം പരസ്യമാക്കിയാൽ താനും സ്വന്തം രേഖകൾ പൊതുസമക്ഷം അവതരിപ്പിക്കുമെന്നും നേരത്തെ വ്യക്തമാക്കിയിരുന്നു.