മോഹൻ ഭാഗവതിന് വിസ റദ്ദാക്കണം, ആർ.എസ്.എസിനെതിരെ ഉപരോധം വേണം; ട്രംപ് ഭരണകൂടത്തോട് യു.എസ് സമിതി

വാഷിംഗ്ടൺ/ന്യൂഡൽഹി: ആർ.എസ്.എസ് മേധാവി മോഹൻ ഭാഗവതിന് അനുവദിച്ച വിസ റദ്ദാക്കണമെന്നും സംഘടനയ്ക്കും ഇതിന്റെ ഭാരവാഹികൾക്കും എതിരെ ഉപരോധം ഏർപ്പെടുത്തണമെന്നും അമേരിക്കൻ ഭരണകൂടത്തോട് ആഹ്വാനം ചെയ്ത് യു.എസ് കമ്മീഷൻ ഓൺ ഇന്റർനാഷണൽ റിലീജിയസ് ഫ്രീഡം (USCIRF). മതസ്വാതന്ത്ര്യത്തിനെതിരെ നിലകൊള്ളുന്ന ആർ.എസ്.എസ് പ്രവർത്തകർക്കും നിർദ്ദേശങ്ങൾ നടപ്പാക്കുന്ന ഇന്ത്യൻ ഉദ്യോഗസ്ഥർക്കും എതിരെ ശക്തമായ നടപടി വേണമെന്ന് സമിതി ചെയർമാൻ ആസിഫ് മഹ്‌മൂദ് പ്രസ്താവനയിലൂടെ ആവശ്യപ്പെട്ടു.

ശനിയാഴ്ച ന്യൂയോർക്ക് സിറ്റിയിൽ സംഘടിപ്പിക്കുന്ന ചടങ്ങിൽ പങ്കെടുക്കാൻ മോഹൻ ഭാഗവത് അമേരിക്കയിൽ സന്ദർശനം നടത്താനിരിക്കെയാണ് യു.എസ് സമിതിയുടെ നിർണായക നിലപാട്. യു.എസിലെ വിവിധ സാംസ്കാരിക കൂട്ടായ്മകളുടെ പരിപാടികളിൽ പങ്കെടുക്കാൻ എത്തുന്ന ഭാഗവതിന് ഔദ്യോഗിക സ്വീകരണങ്ങളോ യു.എസ് ഉദ്യോഗസ്ഥരുമായുള്ള കൂടിക്കാഴ്ചകളോ അനുവദിക്കരുതെന്നും കമ്മീഷൻ വാദിക്കുന്നു.

ഇന്ത്യയിലെ ക്രിസ്ത്യൻ, മുസ്ലിം വിഭാഗങ്ങൾ ഉൾപ്പെടെയുള്ള ന്യൂനപക്ഷങ്ങൾക്കും അവരുടെ ആരാധനാലയങ്ങൾക്കും നേരെ നടക്കുന്ന അതിക്രമങ്ങളിൽ ആർ.എസ്.എസിന്റെ പോഷക സംഘടനകൾക്ക് പങ്കുണ്ടെന്നാണ് യു.എസ്.സി.ഐ.ആർ.എഫ് ആരോപിക്കുന്നത്. മുൻകാല റിപ്പോർട്ടുകളിലും ഇന്ത്യയെ ‘പ്രത്യേക ശ്രദ്ധ അർഹിക്കുന്ന രാജ്യങ്ങളുടെ’ (CPC) പട്ടികയിൽ ഉൾപ്പെടുത്തണമെന്ന് സമിതി ആവശ്യപ്പെട്ടിരുന്നു.

അന്താരാഷ്ട്ര തലത്തിൽ തങ്ങൾക്കെതിരെയുള്ള തെറ്റിദ്ധാരണകൾ തിരുത്താനും ആഗോള പ്രതിച്ഛായ മെച്ചപ്പെടുത്താനുമായി ആർ.എസ്.എസ് വിദേശ പര്യടനങ്ങൾ സംഘടിപ്പിക്കുമെന്ന് കഴിഞ്ഞ മേയിൽ വ്യക്തമാക്കിയിരുന്നു. തങ്ങൾ ന്യൂനപക്ഷാക്രമണങ്ങളിൽ പങ്കാളികളായ ഒരു അർദ്ധസൈനിക വിഭാഗമല്ലെന്നും, മറിച്ച് ഹിന്ദുക്കളെ ഒന്നിപ്പിക്കാൻ ലക്ഷ്യമിടുന്ന സാംസ്കാരിക-നാഗരിക പ്രസ്ഥാനം മാത്രമാണെന്ന് തെളിയിക്കുകയായിരുന്നു ഇതിന്റെ ലക്ഷ്യം. ഇതിന്റെ ഭാഗമായി ജനറൽ സെക്രട്ടറി ദത്താത്രേയ ഹൊസബളെയടക്കമുള്ള പ്രമുഖർ യു.എസ്, ജർമ്മനി, യുകെ എന്നീ രാജ്യങ്ങളിൽ സന്ദർശനം നടത്തിവരുന്നതിനിടെയാണ് അന്താരാഷ്ട്ര മനുഷ്യാവകാശ ഗ്രൂപ്പുകളിൽ നിന്ന് വീണ്ടും എതിർപ്പ് ഉയരുന്നത്.

എന്നാൽ, യു.എസ് സമിതിയുടെ പ്രസ്താവനയെയും വാദങ്ങളെയും ഇന്ത്യയുടെ വിദേശകാര്യ മന്ത്രാലയം പൂർണ്ണമായും തള്ളി. ഇന്ത്യയോട് നിഷ്പക്ഷമല്ലാത്തതും പക്ഷപാതപരവുമായ സമീപനമാണ് സമിതി സ്വീകരിക്കുന്നതെന്ന് വിദേശകാര്യ മന്ത്രാലയം വ്യക്തമാക്കി. അന്താരാഷ്ട്ര തലത്തിൽ മതസ്വാതന്ത്ര്യം നിരീക്ഷിച്ച് നയപരമായ ശുപാർശകൾ സമർപ്പിക്കുന്ന ഉഭയകക്ഷി സമിതിയാണെങ്കിലും, യു.എസ്.സി.ഐ.ആർ.എഫിന്റെ നിർദ്ദേശങ്ങൾ നടപ്പാക്കാൻ അമേരിക്കൻ ഭരണകൂടത്തിന് ഔദ്യോഗിക ബാധ്യതയില്ല.

ഇന്ത്യയിൽ വർദ്ധിച്ചുവരുന്ന വിദ്വേഷ പ്രസംഗങ്ങൾ, മതത്തെ അടിസ്ഥാനമാക്കിയുള്ള പൗരത്വ നിയമം, മുസ്ലീം ഉടമസ്ഥതയിലുള്ള സ്വത്തുക്കൾ പൊളിച്ചുനീക്കൽ, കാശ്മീരിന്റെ പ്രത്യേക പദവി എടുത്തുകളഞ്ഞത്, മതംമാറ്റ നിരോധന നിയമങ്ങൾ എന്നിവ ചൂണ്ടിക്കാട്ടിയാണ് മനുഷ്യാവകാശ ഗ്രൂപ്പുകൾ വിമർശനം ഉന്നയിക്കുന്നത്. എന്നാൽ ഇത്തരം ആരോപണങ്ങളെല്ലാം ആർ.എസ്.എസും കേന്ദ്ര സർക്കാരും നിഷേധിച്ചു. തങ്ങൾ യാതൊരുവിധ വിവേചനവും കാണിക്കുന്നില്ലെന്നും ഭക്ഷ്യ സബ്സിഡിയും വൈദ്യുതീകരണവും ഉൾപ്പെടെയുള്ള വികസന പദ്ധതികൾ രാജ്യത്തെ എല്ലാ വിഭാഗം ജനങ്ങൾക്കും ഒരുപോലെ ലഭ്യമാകുന്നുണ്ടെന്നും സർക്കാർ ആവർത്തിച്ചു.

എന്താണ് യു.എസ്.സി.ഐ.ആർ.എഫ്?

• സമിതിയുടെ സ്വഭാവം: 1998-ലെ ഇന്റർനാഷണൽ റിലീജിയസ് ഫ്രീഡം ആക്ട് പ്രകാരം രൂപീകൃതമായ, സ്വതന്ത്രവും ഉഭയകക്ഷി പങ്കാളിത്തമുള്ളതുമായ ഒരു യു.എസ് സർക്കാർ ഉപദേശക സമിതിയാണിത്.

• പ്രവർത്തനം: ലോകമെമ്പാടുമുള്ള മതസ്വാതന്ത്ര്യ ലംഘനങ്ങൾ നിരീക്ഷിക്കുകയും വിവരങ്ങൾ ശേഖരിച്ച് യു.എസ് പ്രസിഡന്റ്, സ്റ്റേറ്റ് സെക്രട്ടറി, കോൺഗ്രസ് എന്നിവർക്ക് നയപരമായ ശുപാർശകൾ സമർപ്പിക്കുകയും ചെയ്യുക എന്നതാണ് പ്രധാന ജോലി.

• നിയമപരമായ പ്രാബല്യം: ഇവരുടെ ശുപാർശകൾ ഉപദേശങ്ങൾ മാത്രമാണ്. ഇത് അംഗീകരിക്കാനോ ഉപരോധം ഏർപ്പെടുത്താനോ യു.എസ് സ്റ്റേറ്റ് ഡിപ്പാർട്ട്മെന്റിന് നിയമപരമായ നിർബന്ധമില്ല.

• ഇന്ത്യയുടെ നിലപാട്: ഇന്ത്യയിലെ ആഭ്യന്തര കാര്യങ്ങളിൽ കടന്നുകയറുന്നതും വസ്തുതാവിരുദ്ധവുമായ റിപ്പോർട്ടുകളാണ് ഇവർ തയ്യാറാക്കുന്നതെന്ന നിലപാടിൽ, ഇത്തരം വിദേശ സമിതികൾക്ക് പഠനം നടത്താനുള്ള വിസകൾ ഇന്ത്യ അനുവദിക്കാറില്ല.