ആർഎസ്എസിന് പൂട്ടിടാൻ കർണാടക? പൊതുസ്ഥലങ്ങളുടെ ഉപയോഗം നിയന്ത്രിക്കുന്ന ബില്ലിന് മന്ത്രിസഭയുടെ അംഗീകാരം

ബെംഗളൂരു: സർക്കാർ ഭൂമി, കെട്ടിടങ്ങൾ, മൈതാനങ്ങൾ, പാർക്കുകൾ, റോഡുകൾ തുടങ്ങി പൊതുസ്വത്തുക്കൾ പരിപാടികൾക്കും സമ്മേളനങ്ങൾക്കും ഉപയോഗിക്കുന്നതിന് മുൻകൂർ അനുമതി നിർബന്ധമാക്കുന്ന കർണാടക Regulation of Use of Government Premises and Public Property Bill, 2026-ന് സംസ്ഥാന മന്ത്രിസഭ അംഗീകാരം നൽകി. ഓഗസ്റ്റ് 13ന് ചേർന്ന മന്ത്രിസഭാ യോഗത്തിലാണ് ബില്ലിന് അനുമതി നൽകിയത്. നിയമസഭയുടെ നിലവിലെ സമ്മേളനത്തിൽ ബിൽ അവതരിപ്പിച്ച് ചർച്ചയ്ക്കും പാസാക്കുന്നതിനുമായി മുന്നോട്ടുകൊണ്ടുപോകാനാണ് സർക്കാർ നീക്കം.

സ്വകാര്യ വ്യക്തികൾ, സംഘടനകൾ, അസോസിയേഷനുകൾ, സൊസൈറ്റികൾ, ക്ലബ്ബുകൾ തുടങ്ങിയവർ സർക്കാർ ഉടമസ്ഥതയിലുള്ള സ്ഥലങ്ങൾ ഏതെങ്കിലും പരിപാടിക്കായി ഉപയോഗിക്കുമ്പോൾ നിശ്ചിത നടപടിക്രമങ്ങൾ പാലിച്ച് മുൻകൂർ അനുമതി നേടണമെന്നാണ് ബില്ലിലെ പ്രധാന വ്യവസ്ഥ. സർക്കാർ ഭൂമി, കെട്ടിടങ്ങൾ, റോഡുകൾ, പാർക്കുകൾ, കളിസ്ഥലങ്ങൾ, ജലാശയങ്ങൾ എന്നിവ ഉൾപ്പെടെയുള്ള പൊതുസ്വത്തുകളാണ് നിയമത്തിന്റെ പരിധിയിൽ വരുന്നത്.

അനുമതിയില്ലാതെ പൊതുസ്വത്ത് ഉപയോഗിക്കുന്നത് നിയമലംഘനമായി കണക്കാക്കും. ആദ്യത്തെ കുറ്റത്തിന് മൂന്ന് വർഷം വരെ തടവോ അഞ്ച് ലക്ഷം രൂപ വരെ പിഴയോ, അല്ലെങ്കിൽ രണ്ടും ലഭിക്കാവുന്നതാണ്. കുറ്റം ആവർത്തിച്ചാൽ അഞ്ച് വർഷം വരെ തടവും പത്ത് ലക്ഷം രൂപ വരെ പിഴയും വ്യവസ്ഥ ചെയ്യുന്നു. ശിക്ഷയ്ക്ക് ശേഷവും അനധികൃത ഉപയോഗം തുടരുകയാണെങ്കിൽ പ്രതിദിനം 5,000 രൂപ വരെ അധിക പിഴ ഈടാക്കാനും നിർദേശമുണ്ട്.

ബിൽ ആർഎസ്എസിനെ ലക്ഷ്യമിട്ടുള്ളതാണെന്ന ആരോപണമാണ് ബിജെപി ഉയർത്തുന്നത്. പൊതുസ്ഥലങ്ങളിൽ ആർഎസ്എസ് നടത്തുന്ന പരിപാടികൾക്കും നിയന്ത്രണം വരുത്തുകയാണ് സർക്കാരിന്റെ ലക്ഷ്യമെന്നാണ് ബിജെപി ആരോപണം. അടുത്തിടെ ആർഎസ്എസ് റൂട്ട് മാർച്ചുകൾക്ക് അനുമതി നൽകുന്നതുമായി ബന്ധപ്പെട്ട് കർണാടകയിൽ ഉണ്ടായ തർക്കത്തിനിടെയാണ് പുതിയ നിയമനിർമാണ നീക്കം എന്നതും രാഷ്ട്രീയ ചർച്ചയ്ക്ക് കാരണമായിട്ടുണ്ട്.

എന്നാൽ ബിൽ ഏതെങ്കിലും പ്രത്യേക സംഘടനയെ ലക്ഷ്യമിട്ടുള്ളതല്ലെന്നാണ് കർണാടക സർക്കാർ വ്യക്തമാക്കുന്നത്. നിയമത്തിൽ ആർഎസ്എസിന്റെ പേര് പരാമർശിക്കുന്നില്ലെന്നും പൊതുസ്വത്തിന്റെ ഉപയോഗത്തിന് വ്യക്തമായ നിയമചട്ടക്കൂട് ഒരുക്കുകയാണ് ലക്ഷ്യമെന്നും ആഭ്യന്തരമന്ത്രി പ്രിയങ്ക് ഖാർഗെ പറഞ്ഞു. “ബിൽ വായിച്ചിട്ടുണ്ടെങ്കിൽ എതിർപ്പുകൾ വ്യക്തമാക്കട്ടെ; നിയമസഭയിൽ ബിൽ അവതരിപ്പിക്കട്ടെ, അവിടെ ചർച്ച ചെയ്യാം” എന്നായിരുന്നു അദ്ദേഹത്തിന്റെ പ്രതികരണം.

മുഖ്യമന്ത്രി ഡി.കെ. ശിവകുമാറും അനുമതി എല്ലാവർക്കും ബാധകമായിരിക്കുമെന്ന് വ്യക്തമാക്കി. സർക്കാർ പരിപാടികൾ ഉൾപ്പെടെ പൊതുസ്വത്ത് ഉപയോഗിക്കുന്ന ഏത് പരിപാടിക്കും അനുമതി ആവശ്യമായിരിക്കുമെന്ന് അദ്ദേഹം പറഞ്ഞു. രാഷ്ട്രീയ പാർട്ടിയോ സംഘടനയോ എന്ന വ്യത്യാസമില്ലാതെ നിയമം ബാധകമാകുമെന്നാണ് സർക്കാരിന്റെ നിലപാട്.

പൊതുസ്വത്ത് സംരക്ഷിക്കുക, അനധികൃത ഉപയോഗം തടയുക, പരിപാടികൾ നടത്തുന്നതിനുള്ള ഉത്തരവാദിത്തവും നിയന്ത്രണവും ഉറപ്പാക്കുക എന്നിവയാണ് ബില്ലിന്റെ ഔദ്യോഗിക ലക്ഷ്യങ്ങളെന്ന് സർക്കാർ പറയുന്നു. അതേസമയം, നിയമം പ്രാബല്യത്തിൽ വന്നാൽ ആർഎസ്എസ് ഉൾപ്പെടെയുള്ള സംഘടനകളുടെ പൊതുസ്ഥലങ്ങളിലെ പരിപാടികൾക്ക് സർക്കാർ അനുമതി നിർബന്ധമാകുമെന്നതിനാൽ ബിൽ നിയമസഭയിൽ ശക്തമായ രാഷ്ട്രീയ ഏറ്റുമുട്ടലിന് വഴിവെക്കുമെന്നാണ് വിലയിരുത്തൽ.