ഗൂഗിൾ പേയിൽ ആള് മാറി പണം അയച്ചോ? പേടിക്കേണ്ട, തിരിച്ചുപിടിക്കാൻ വഴികൾ ഇതാ

ഇന്ന് മുക്കിലും മൂലയിലും ഡിജിറ്റൽ പേയ്‌മെന്റുകളുടെ കാലമാണ്. വലിയ ഷോപ്പിംഗ് മാളുകൾ മുതൽ സാധാരണ പെട്ടിക്കടകളിൽ വരെ നമ്മൾ ഏറ്റവുമധികം ഉപയോഗിക്കുന്നത് ഗൂഗിൾ പേ ആണ്. നമ്മുടെ ജീവിതം അത്രമേൽ എളുപ്പമാക്കാൻ യുപിഐ ഇടപാടുകൾക്ക് കഴിഞ്ഞിട്ടുണ്ട്. എന്നാൽ, ഒരു ചെറിയ അശ്രദ്ധ മതി, കണ്ണടച്ചു തുറക്കുന്നതിന് മുൻപ് നമ്മുടെ പണം മറ്റാരുടെയെങ്കിലും അക്കൗണ്ടിലേക്ക് പോകും!

അക്ഷരത്തെറ്റുകളോ, ഫോൺ നമ്പർ മാറിയതോ ഒക്കെ കാരണം ആള് മാറി പണമയക്കുന്നത് ഇന്ന് പലർക്കും സംഭവിക്കുന്ന ഒരു പ്രധാന അബദ്ധമാണ്. എന്നാൽ ഇങ്ങനെ സംഭവിച്ചാൽ ഭയപ്പെടേണ്ടതില്ല. നഷ്ടപ്പെട്ട പണം സുരക്ഷിതമായി തിരികെ ലഭിക്കാൻ ചില എളുപ്പവഴികളുണ്ട്. അവ എന്തൊക്കെയാണെന്ന് നോക്കാം.

1. ആദ്യം വ്യക്തിയുമായി ബന്ധപ്പെടുക

പണം മാറിപ്പോയാൽ ചെയ്യാവുന്ന ഏറ്റവും ലളിതമായ കാര്യം, ആ തുക ആർക്കാണോ ലഭിച്ചത് അവരെ നേരിട്ട് ബന്ധപ്പെടുക എന്നതാണ്. നമ്മുടെ കോൺടാക്ട് ലിസ്റ്റിലുള്ള ആളാണെങ്കിൽ വിളിച്ച് പറയുകയോ മെസ്സേജ് അയക്കുകയോ ചെയ്താൽ പണം വേഗത്തിൽ റീഫണ്ട് കിട്ടാൻ സാധ്യതയുണ്ട്. ഇനി അപരിചിതനായ ഒരാൾക്കാണ് പണം പോയതെങ്കിൽ പോലും അവരോട് മാന്യമായി സംസാരിച്ച് കാര്യം വ്യക്തമാക്കുക. ഭൂരിഭാഗം ആളുകളും തെറ്റ് മനസ്സിലാക്കി പണം തിരികെ നൽകാൻ തയ്യാറാകാറുണ്ട്.

2. ഗൂഗിൾ പേ കസ്റ്റമർ കെയറിന്റെ സഹായം തേടാം

വ്യക്തിപരമായി സംസാരിച്ചിട്ട് കാര്യം നടന്നില്ലെങ്കിൽ ഒട്ടും വൈകാതെ ഗൂഗിൾ പേ കസ്റ്റമർ സർവീസുമായി ബന്ധപ്പെടണം. ഇതിനായി ഗൂഗിൾ പേ ഒരു ടോൾ ഫ്രീ നമ്പർ നൽകിയിട്ടുണ്ട്: 1800-419-0157. ഈ നമ്പറിൽ വിളിച്ച് പരാതിപ്പെട്ടാൽ ഗൂഗിളിന്റെ ഭാഗത്തുനിന്നും തുടർനടപടികൾ ഉണ്ടാകും.

ശ്രദ്ധിക്കുക: പരാതി നൽകുന്നതിന് മുൻപ് ഇടപാടിന്റെ ട്രാൻസാക്ഷൻ ഐഡി (Transaction ID), തീയതി, സമയം, അയച്ച തുക, പണം ലഭിച്ച ആളുടെ യുപിഐ ഐഡി (UPI ID) എന്നിവ നിങ്ങളുടെ കൈവശം ഉണ്ടെന്ന് ഉറപ്പുവരുത്തുക.

3. എൻപിസിഐ (NPCI) പോർട്ടലിൽ പരാതി നൽകാം

പണം തിരികെ ലഭിക്കാനുള്ള മറ്റൊരു ഔദ്യോഗിക മാർഗ്ഗമാണ് നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യയിൽ പരാതി നൽകുക എന്നത്.

• npci.org.in എന്ന ഔദ്യോഗിക വെബ്‌സൈറ്റ് സന്ദർശിക്കുക.

• അതിൽ 'What We Do' എന്ന ലിങ്ക് ക്ലിക്ക് ചെയ്ത് UPI തിരഞ്ഞെടുക്കുക.

• തുടർന്ന് വരുന്ന ഫോമിൽ യുപിഐ ട്രാൻസാക്ഷൻ ഐഡി, ബാങ്കുകളുടെ പേര്, തുക തുടങ്ങിയ വിവരങ്ങൾ കൃത്യമായി പൂരിപ്പിച്ച് പരാതി രജിസ്റ്റർ ചെയ്യാം.

ആർബിഐ (RBI) നിർദ്ദേശം പറയുന്നത് എന്ത്?

റിസർവ് ബാങ്ക് ഓഫ് ഇന്ത്യയുടെ (RBI) മാർഗ്ഗനിർദ്ദേശപ്രകാരം, തെറ്റായി പണം അയച്ചാൽ 24 മുതൽ 48 മണിക്കൂറിനുള്ളിൽ അത് റീഫണ്ട് ചെയ്യപ്പെടേണ്ടതുണ്ട്. ഒരേ ബാങ്കിലെ അക്കൗണ്ടുകളിലേക്കാണ് പണം മാറിപ്പോയതെങ്കിൽ നടപടികൾ വേഗത്തിലാകും. എന്നാൽ വ്യത്യസ്ത ബാങ്കുകളാണെങ്കിൽ റീഫണ്ട് ലഭിക്കാൻ അല്പം കൂടുതൽ സമയമെടുത്തേക്കാം.

എങ്കിലും, ഡിജിറ്റൽ ഇടപാടുകൾ നടത്തുമ്പോൾ അയക്കുന്നതിന് തൊട്ടുമുൻപ് പേരും നമ്പറും ഒന്നുകൂടി ഒത്തുനോക്കുന്നതാണ്​ പണം നഷ്ടപ്പെടാതിരിക്കാനുള്ള ഏറ്റവും നല്ല മാർഗ്ഗം!