ആന്റോയുടെ വയനാട്ടിലെ വീട്ടിൽ 50 ലിറ്റർ മദ്യശേഖരം കണ്ടെത്തി

വയനാട്: ആന്റോ അഗസ്റ്റിനുമായി ബന്ധപ്പെട്ട കേസിന്റെ അന്വേഷണത്തിന്റെ ഭാഗമായി വയനാട്ടിലെ വീട്ടിൽ പോലീസ് നടത്തിയ പരിശോധനയിൽ പരിധിയിലധികം മദ്യം കണ്ടെത്തി. പരിശോധനയ്ക്കിടെ 43 ലിറ്റർ വിദേശമദ്യവും 7 ലിറ്റർ വൈനും ഉൾപ്പെടെയുള്ള മദ്യശേഖരമാണ് കണ്ടെത്തിയത്.

മദ്യം കണ്ടെത്തിയതിനെ തുടർന്ന് പോലീസ് എക്സൈസ് ഉദ്യോഗസ്ഥരെ വിവരമറിയിച്ച് സ്ഥലത്തേക്ക് വിളിച്ചുവരുത്തുകയായിരുന്നു. തുടർന്ന് എക്സൈസ് ഉദ്യോഗസ്ഥർ മദ്യത്തിന്റെ അളവും ഇനങ്ങളും പരിശോധിച്ചു. വീട്ടിൽ വ്യക്തിപരമായ ആവശ്യത്തിനായി നിയമപരമായി സൂക്ഷിക്കാവുന്ന പരിധിയെക്കാൾ കൂടുതലാണ് കണ്ടെത്തിയതെന്നാണ് പ്രാഥമിക വിവരം.

മദ്യം എവിടെനിന്ന് ലഭിച്ചു, ഇത്രയധികം അളവിൽ വീട്ടിൽ സൂക്ഷിച്ചതിന്റെ സാഹചര്യം, ആവശ്യമായ രേഖകളോ അനുമതികളോ ഉണ്ടായിരുന്നോയെന്നതടക്കമുള്ള കാര്യങ്ങൾ എക്സൈസ് പരിശോധിക്കുന്നുണ്ട്. കണ്ടെത്തിയ മദ്യവുമായി ബന്ധപ്പെട്ട് നിയമലംഘനം ഉണ്ടായിട്ടുണ്ടെങ്കിൽ തുടർനടപടികൾ സ്വീകരിക്കും.