മദ്യശേഖരം കണ്ടെത്തിയ കേസ്; ആന്റോ അഗസ്റ്റിൻ അറസ്റ്റിൽ

കൊച്ചി: വയനാട് വാഴവറ്റയിലെ വീട്ടിൽ അനുവദനീയമായ അളവിൽ കൂടുതലായി മദ്യം സൂക്ഷിച്ചെന്ന കേസിൽ റിപ്പോർട്ടർ ടിവി ഉടമ ആന്റോ അഗസ്റ്റിനെ എക്സൈസ് അറസ്റ്റ് ചെയ്തു. സെപ്റ്റംബർ 16ന് വീട്ടിൽ നടത്തിയ പരിശോധനയിലാണ് മദ്യശേഖരം കണ്ടെത്തിയത്. തുടർന്ന് അബ്കാരി നിയമപ്രകാരമുള്ള കേസെടുത്തതിന് പിന്നാലെയാണ് അറസ്റ്റ്.

ലയണൽ മെസ്സിയുടെയും അർജന്റീന ഫുട്ബോൾ ടീമിന്റെയും കേരള സന്ദർശനവുമായി ബന്ധപ്പെട്ട സാമ്പത്തിക ഇടപാടുകൾ അന്വേഷിക്കുന്ന പ്രത്യേക അന്വേഷണ സംഘമാണ് വാഴവറ്റയിലെ വീട്ടിൽ പരിശോധന നടത്തിയത്. പരിശോധനയ്ക്കിടെ മദ്യം കണ്ടെത്തിയതോടെ എക്സൈസ് ഉദ്യോഗസ്ഥരെ വിവരം അറിയിക്കുകയായിരുന്നു. തുടർന്ന് കൽപ്പറ്റ എക്സൈസ് സംഘം സ്ഥലത്തെത്തി മദ്യം കസ്റ്റഡിയിലെടുത്തു.

ഏകദേശം 67 ലിറ്റർ മദ്യമാണ് പിടിച്ചെടുത്തതെന്നാണ് പുറത്തുവന്ന വിവരം. വിദേശമദ്യം, വൈൻ, മിലിട്ടറി ലിക്കർ എന്നിവ ഉൾപ്പെടെയുള്ളവ ഇതിലുണ്ടായിരുന്നുവെന്നാണ് റിപ്പോർട്ടുകൾ. ഒരാൾക്ക് നിയമപരമായി കൈവശം വയ്ക്കാവുന്ന പരിധിയേക്കാൾ അധികമാണ് കണ്ടെത്തിയതെന്നാണ് എക്സൈസ് നിലപാട്.

ഇന്നലെ റിപ്പോർട്ടർ ചാനൽ എംഡി ആന്റോ അഗസ്റ്റിന്റെ വീട്ടിലും സ്ഥാപനത്തിലും നടത്തിയ പരിശോധനയിൽ കറൻസിയും ഇലക്ട്രോണിക് ഉപകരണങ്ങളും പിടിച്ചെടുത്തിരുന്നു. 67 ലീറ്റർ വിദേശമദ്യം, 6400 യുഎസ് ഡോളർ, യുഎഇ, ഘാന, കോംഗോ തുടങ്ങിയ രാജ്യങ്ങളിലെ കറൻസി, വിദേശ ക്രെഡിറ്റ് കാർഡുകൾ, ഒരു മൊബൈൽ, ഒരു ലാപ്ടോപ്, ഒരു ടാബ്, ഒട്ടേറെ രേഖകൾ എന്നിവയാണ് പിടിച്ചെടുത്തതെന്നാണ് പൊലീസിൽനിന്ന് ലഭിക്കുന്ന വിവരം.

കൊച്ചിയിലെ റിപ്പോർട്ടർ ടിവി ഓഫീസിലെത്തിയാണ് എക്സൈസ് സംഘം ആന്റോ അഗസ്റ്റിനെ അറസ്റ്റ് ചെയ്തതെന്നാണ് റിപ്പോർട്ടുകൾ. കേസുമായി ബന്ധപ്പെട്ട് എഫ്ഐആർ കാണിച്ചതിന് ശേഷമാണ് നടപടിയുമായി മുന്നോട്ടുപോയതെന്നും വിവരമുണ്ട്.

അതേസമയം, തനിക്കെതിരായ നടപടി പ്രതികാരപരമാണെന്നാണ് ആന്റോ അഗസ്റ്റിന്റെ ആരോപണം. താൻ മദ്യപിക്കാറില്ലെന്നും വീട്ടിൽ സൂക്ഷിച്ചിരുന്ന മദ്യത്തെക്കുറിച്ച് അറിയില്ലെന്നും അദ്ദേഹം പ്രതികരിച്ചതായാണ് റിപ്പോർട്ടുകൾ. തന്നെ കേസിൽ കുടുക്കിയതാണെന്നും അദ്ദേഹം ആരോപിച്ചു.

മദ്യത്തിന്റെ ഉറവിടം, വീട്ടിൽ സൂക്ഷിച്ച സാഹചര്യം, കൈവശം വച്ചിരുന്ന അളവ് എന്നിവ ഉൾപ്പെടെയുള്ള കാര്യങ്ങളാണ് എക്സൈസ് ഇനി പരിശോധിക്കുക. കേസിലെ തുടർനടപടികൾ അന്വേഷണത്തിന്റെ അടിസ്ഥാനത്തിലായിരിക്കും.