മെസ്സിയുടെ പേരിലെ തട്ടിപ്പ്: മുൻ കായികമന്ത്രിയെ എസ്ഐടി ചോദ്യം ചെയ്യും; റിപ്പോർട്ടർ ടി.വി ഓഫീസിൽ നിർണായക രേഖകളും ഡോളറും കണ്ടെത്തി

കൊച്ചി: മെസ്സിയെയും അർജന്റീന ഫുട്ബോൾ ടീമിനെയും കേരളത്തിലെത്തിക്കാനുള്ള പദ്ധതിയുമായി ബന്ധപ്പെട്ട സാമ്പത്തിക ക്രമക്കേട് കേസിൽ പ്രത്യേക അന്വേഷണ സംഘത്തിന്റെ അന്വേഷണം കൂടുതൽ വ്യാപിക്കുന്നു. മുൻ കായികമന്ത്രി വി. അബ്ദുറഹിമാനെ എസ് ഐ ടി ചോദ്യം ചെയ്യും  കായികവകുപ്പിന്റെ അന്വേഷണത്തിൽ സ്പോൺസറെ തിരഞ്ഞെടുക്കുന്നതിലും ഫയൽ നടപടികളിലും ഉൾപ്പെടെ നിരവധി ചട്ടലംഘനങ്ങൾ ചൂണ്ടിക്കാട്ടിയിട്ടുണ്ട്.

ഇതിനിടെയാണ് കളമശ്ശേരിയിലെ റിപ്പോർട്ടർ ബ്രോഡ്കാസ്റ്റിങ് കമ്പനി ഓഫീസിലും അഗസ്റ്റിൻ സഹോദരന്മാരുമായി ബന്ധപ്പെട്ട വിവിധ കേന്ദ്രങ്ങളിലും എസ്ഐടി പരിശോധന നടത്തിയത്. ഏകദേശം 20 മണിക്കൂർ നീണ്ട പരിശോധനയിൽ മെമ്മറി കാർഡുകൾ ഉൾപ്പെടെ നിരവധി രേഖകളും കലൂർ ജവഹർലാൽ നെഹ്റു സ്റ്റേഡിയവുമായി ബന്ധപ്പെട്ട രേഖകളും കസ്റ്റഡിയിലെടുത്തതായി പൊലീസ് അറിയിച്ചു. വിദേശ കറൻസിയും കണ്ടെത്തിയതായി വിവിധ റിപ്പോർട്ടുകളുണ്ട്; 6,300 അമേരിക്കൻ ഡോളർ കണ്ടെത്തിയതായാണ് റിപ്പോർട്ട്.

മെസ്സി പദ്ധതിയുമായി ബന്ധപ്പെട്ട സാമ്പത്തിക ഇടപാടുകളിലും നികുതി ബാധ്യതകളിലും എസ്ഐടി നേരത്തെ തന്നെ ക്രമക്കേടുകൾ ചൂണ്ടിക്കാട്ടിയിരുന്നു. റിപ്പോർട്ടർ ബ്രോഡ്കാസ്റ്റിങ് കമ്പനിക്ക് വിദേശ ഇടപാടുകളുമായി ബന്ധപ്പെട്ട് ഏകദേശം ₹25.78 കോടി നികുതി വെട്ടിപ്പ് നടത്തിയെന്ന കണ്ടെത്തലും അന്വേഷണത്തിന്റെ ഭാഗമാണ്. അർജന്റീന ഫുട്ബോൾ അസോസിയേഷനുമായി ബന്ധപ്പെട്ട ഇടപാടുകളിൽ റിവേഴ്സ് ചാർജ് മെക്കാനിസം പ്രകാരമുള്ള ഐജിഎസ്ടി അടച്ചില്ലെന്നതും അന്വേഷണ റിപ്പോർട്ടിൽ പരാമർശിക്കുന്നു.

മുൻ കായികമന്ത്രി വി. അബ്ദുറഹിമാന്റെ നേതൃത്വത്തിലുള്ള സംഘം 2024ൽ സ്പെയിൻ സന്ദർശിച്ചതും അന്വേഷണത്തിൽ പരിശോധിക്കുന്ന വിഷയമാണ്. ഔദ്യോഗിക ക്ഷണം സംബന്ധിച്ച രേഖകളും സന്ദർശനത്തിന്റെ വിശദാംശങ്ങളും സംബന്ധിച്ച് ചോദ്യങ്ങൾ ഉയർന്നിട്ടുണ്ടെന്നും സർക്കാർ ഫണ്ടിൽനിന്ന് 13 ലക്ഷം രൂപ ചെലവഴിച്ചതായും റിപ്പോർട്ടുകളുണ്ട്. അർജന്റീന ടീമിന്റെ കേരള സന്ദർശനം സംബന്ധിച്ച ഫയൽ നടപടികളിൽ മന്ത്രിയുടെ പ്രൈവറ്റ് സെക്രട്ടറിയുടെ ഇടപെടലും കായികവകുപ്പ് അന്വേഷണത്തിൽ ചൂണ്ടിക്കാട്ടിയിട്ടുണ്ട്.

അന്വേഷണം മുന്നോട്ടുപോകുന്നതിനിടെ ആന്റോ അഗസ്റ്റിനെതിരെ അനധികൃതമായി മദ്യം കൈവശംവച്ച കേസിലും നടപടി ഉണ്ടായിട്ടുണ്ട്. മെസ്സി പദ്ധതിയുമായി ബന്ധപ്പെട്ട സാമ്പത്തിക ഇടപാടുകൾ, നികുതി സംബന്ധമായ വിഷയങ്ങൾ, മറ്റ് ആരോപണങ്ങൾ എന്നിവയിൽ കൂടുതൽ അന്വേഷണവും തെളിവ് ശേഖരണവും നടക്കുകയാണ്. റെയ്ഡിൽ പിടിച്ചെടുത്ത രേഖകളും ഡിജിറ്റൽ തെളിവുകളും പരിശോധിച്ച ശേഷമായിരിക്കും കേസിലെ തുടർനടപടികൾ സംബന്ധിച്ച് അന്വേഷണ സംഘം തീരുമാനമെടുക്കുക.