മുറസു ചുഴലിക്കാറ്റ് ഭീഷണി; ചെന്നൈയിൽ കനത്ത മഴ, 11 വിമാനങ്ങൾ റദ്ദാക്കി

ചെന്നൈ: മുറസു ചുഴലിക്കാറ്റ് തമിഴ്നാട്, ദക്ഷിണ ആന്ധ്ര തീരങ്ങളിലേക്ക് നീങ്ങുന്നതിനിടെ ചെന്നൈയിലും സമീപ ജില്ലകളിലും കനത്ത മഴ. മോശം കാലാവസ്ഥയെ തുടർന്ന് ചെന്നൈ വിമാനത്താവളത്തിൽ നിന്നുള്ള 11 വിമാന സർവീസുകൾ തിങ്കളാഴ്ച റദ്ദാക്കി.

ഞായറാഴ്ച രാത്രി മുതൽ ചെന്നൈ, ചെങ്കൽപട്ട്, തിരുവള്ളൂർ ജില്ലകളുടെ വിവിധ ഭാഗങ്ങളിൽ ശക്തമായ മഴ തുടരുകയാണ്. ചെന്നൈയിൽ നിന്ന് വിജയവാഡ, രാജമുണ്ട്രി, കടപ്പ, തിരുച്ചിറപ്പള്ളി എന്നിവിടങ്ങളിലേക്കുള്ള സർവീസുകളാണ് റദ്ദാക്കിയത്. യാത്രക്കാർ വിമാനക്കമ്പനികളുമായി ബന്ധപ്പെട്ട് സർവീസുകളുടെ സ്ഥിതി ഉറപ്പാക്കണമെന്ന് വിമാനത്താവള അധികൃതർ നിർദേശിച്ചു.

ബംഗാൾ ഉൾക്കടലിന്റെ പടിഞ്ഞാറൻ മധ്യഭാഗത്തും തെക്കുപടിഞ്ഞാറൻ മേഖലയോട് ചേർന്നും സ്ഥിതി ചെയ്യുന്ന അതിതീവ്ര ചുഴലിക്കാറ്റ് മണിക്കൂറിൽ 25 കിലോമീറ്റർ വേഗത്തിലാണ് നീങ്ങുന്നത്. നിലവിൽ ചെന്നൈയിൽ നിന്ന് വടക്കുകിഴക്ക്-കിഴക്ക് ദിശയിൽ 200 കിലോമീറ്ററും ആന്ധ്രാപ്രദേശിലെ നെല്ലൂരിൽ നിന്ന് 210 കിലോമീറ്ററും അകലെയാണ് ചുഴലിക്കാറ്റിന്റെ സ്ഥാനം.

നവംബർ രണ്ടിന് രാത്രി 11.30നും നവംബർ മൂന്നിന് പുലർച്ചെ നാലിനുമിടയിൽ നെല്ലൂരിനും നർസാപുരത്തിനും ഇടയിൽ ഓംഗോളിന് സമീപം ദക്ഷിണ ആന്ധ്ര തീരത്ത് ചുഴലിക്കാറ്റ് കരതൊടുമെന്നാണ് കാലാവസ്ഥാ വകുപ്പിന്റെ പ്രവചനം. തീരം തൊടുമ്പോൾ മണിക്കൂറിൽ 100 മുതൽ 110 കിലോമീറ്റർ വരെയും ചില ഘട്ടങ്ങളിൽ 120 കിലോമീറ്റർ വരെയും കാറ്റിന്റെ വേഗത ഉയരാൻ സാധ്യതയുണ്ട്. 

അതേസമയം, ചെന്നൈയിൽ രാത്രി മുഴുവൻ മഴ പെയ്തെങ്കിലും വലിയ അനിഷ്ടസംഭവങ്ങളൊന്നും റിപ്പോർട്ട് ചെയ്തിട്ടില്ലെന്ന് ഗ്രേറ്റർ ചെന്നൈ കോർപറേഷൻ കമ്മീഷണർ സമീരൻ അറിയിച്ചു. ആരെയും ദുരിതാശ്വാസ ക്യാമ്പുകളിലേക്ക് മാറ്റേണ്ട സാഹചര്യമുണ്ടായിട്ടില്ല. വടക്കൻ ചെന്നൈയിലെ ചില പ്രദേശങ്ങളിൽ നേരിയ വെള്ളക്കെട്ടുണ്ടായെങ്കിലും ഗതാഗതം തടസ്സപ്പെട്ടിട്ടില്ല.

നഗരത്തിലെ എല്ലാ സബ്‌വേകളും തുറന്നിട്ടുണ്ടെന്നും മരങ്ങൾ കടപുഴകി വീണതുമായി ബന്ധപ്പെട്ട പരാതികളിൽ അടിയന്തര നടപടി സ്വീകരിക്കുന്നുണ്ടെന്നും അധികൃതർ വ്യക്തമാക്കി.