‘റിപ്പോർട്ടർ ടിവിക്കെതിരായ അന്വേഷണം മാധ്യമസ്വാതന്ത്ര്യത്തിന് നേരെയുള്ള കടന്നുകയറ്റമല്ല’; വി.ടി. ബൽറാം

റിപ്പോർട്ടർ ടിവിക്കെതിരായ അന്വേഷണം ഏതെങ്കിലും വാർത്ത നൽകിയതിന്റെ പേരിലല്ലെന്നും, സ്ഥാപനത്തിന്റെ ഉടമകൾക്കെതിരായതായി പറയപ്പെടുന്ന വിവിധ തട്ടിപ്പുകളും സാമ്പത്തിക ക്രമക്കേടുകളും സംബന്ധിച്ച അന്വേഷണത്തിന്റെ ഭാഗമായാണ് നടപടികളെന്നും വി.ടി. ബൽറാം എംഎൽഎ. ഇതിനെ മാധ്യമസ്വാതന്ത്ര്യത്തിന് നേരെയുള്ള കടന്നുകയറ്റമായി വ്യാഖ്യാനിക്കുന്നത് ബാലിശമാണെന്നും അദ്ദേഹം പറഞ്ഞു.

തട്ടിപ്പുകേസുകളിലും മറ്റ് ക്രിമിനൽ കേസുകളിലും പൊലീസ് പരിശോധന നടത്തുമ്പോൾ ആരോപണവിധേയരുടെയും അവരുമായി അടുത്ത ബന്ധമുള്ളവരുടെയും വിവിധ ഇടങ്ങളിൽ ഒരേസമയം പരിശോധന നടത്തുന്നതും, അന്വേഷണത്തിന്റെ ഭാഗമായി ഫോണുകൾ താൽക്കാലികമായി കസ്റ്റഡിയിലെടുക്കുന്നതും സാധാരണ നടപടിക്രമമാണെന്ന് ബൽറാം ചൂണ്ടിക്കാട്ടി. കോടതിയുടെ വാറണ്ടിന്റെ അടിസ്ഥാനത്തിലുള്ള നിയമപരമായ പരിശോധനകളാണ് ഇപ്പോൾ നടക്കുന്നതെന്നാണ് അറിയാൻ കഴിയുന്നതെന്നും അദ്ദേഹം പറഞ്ഞു.

അന്വേഷണസംഘം ആവശ്യപ്പെടുന്ന മുറികൾ തുറന്നുനൽകാൻ സ്ഥാപനത്തിലുള്ളവർ തയ്യാറാകാത്ത സാഹചര്യമുണ്ടായാൽ അന്വേഷണസംഘത്തിന് മറ്റ് മാർഗങ്ങൾ തേടേണ്ടിവരുമെന്നും ബൽറാം പ്രതികരിച്ചു. നിയമപരമായ പരിശോധനകളോട് ആരോപണവിധേയരും അവരോടൊപ്പമുള്ളവരും സഹകരിക്കുകയാണ് ഉത്തരവാദിത്തമെന്നും അദ്ദേഹം വ്യക്തമാക്കി.

വാർത്തകളുടെ പേരിൽ മാധ്യമ ഓഫീസുകളിൽ പരിശോധന നടന്ന സംഭവങ്ങൾ കേരളത്തിൽ മുൻകാലത്തും ഉണ്ടായിട്ടുണ്ടെന്നും ബൽറാം പറഞ്ഞു. അത്തരം നടപടികളെയാണ് മാധ്യമസ്വാതന്ത്ര്യത്തിനെതിരായ കടന്നുകയറ്റമായി കാണേണ്ടതെന്നും, തട്ടിപ്പുകേസുമായി ബന്ധപ്പെട്ട അന്വേഷണത്തെ അതുമായി താരതമ്യം ചെയ്യുന്നത് ശരിയല്ലെന്നും അദ്ദേഹം അഭിപ്രായപ്പെട്ടു.

എക്സാലോജിക്കുമായി ബന്ധപ്പെട്ട സാമ്പത്തിക ക്രമക്കേട് അന്വേഷണത്തെ പ്രതിപക്ഷ നേതാവിനും സിപിഎമ്മിനുമെതിരായ ഭരണകൂട വേട്ടയാടലായി ചിത്രീകരിക്കാൻ ശ്രമിച്ച സമീപനത്തോടാണ് ഇപ്പോഴത്തെ ‘റിപ്പോർട്ടർ ടിവി സംരക്ഷണ സമിതി’യുടെ വാദങ്ങളെയും ബൽറാം താരതമ്യം ചെയ്തത്. ഇഡി ഉദ്യോഗസ്ഥർക്കെതിരായ ആക്രമണവുമായി ബന്ധപ്പെട്ട് നേരത്തെ ഉണ്ടായ സംഭവങ്ങളെയും പരാമർശിച്ച അദ്ദേഹം, അതിന്റെ ‘ഡിജിറ്റൽ വേർഷൻ’ പോലെയാണ് ഇപ്പോൾ സോഷ്യൽ മീഡിയയിൽ ചിലർ മാധ്യമസ്വാതന്ത്ര്യത്തിന്റെ വക്താക്കളായി രംഗത്തെത്തുന്നതെന്നും വിമർശിച്ചു.

‘നിയമം നിയമത്തിന്റെ വഴിക്ക് പോകട്ടെ. തട്ടിപ്പുകാർക്കെതിരെ ശക്തമായ നടപടികൾ ഉണ്ടാകട്ടെ’ എന്നായിരുന്നു ബൽറാമിന്റെ പ്രതികരണം.