വെനസ്വേല ഭൂകമ്പത്തിന് മുൻപ് ഗൂഗിൾ മുന്നറിയിപ്പ്; എങ്ങനെ പ്രവർത്തിച്ചു വിദഗ്ദരുടെ അഭിപ്രായം.

വെനസ്വേലയിൽ ഉണ്ടായ ശക്തമായ ഭൂകമ്പത്തിന് തൊട്ടുമുമ്പ് ഗൂഗിളിന്റെ മുന്നറിയിപ്പ് സംവിധാനത്തെക്കുറിച്ചുള്ള വാർത്തകൾ ശ്രദ്ധ നേടുകയാണ്. എന്നാൽ ഗൂഗിൾ ഭൂകമ്പം മുൻകൂട്ടി പ്രവചിച്ചതല്ലെന്നാണ് വിദഗ്ധരുടെ വിശദീകരണം. ഭൂകമ്പം ആരംഭിച്ച ശേഷം ആദ്യം എത്തുന്ന ചെറിയ തരംഗങ്ങൾ കണ്ടെത്തി, ശക്തമായ ആഘാതം എത്തുന്നതിന് മുമ്പായി ആളുകൾക്ക് അലർട്ട് നൽകുന്ന സംവിധാനമാണ് പ്രവർത്തിച്ചത്.

എല്ലാ ആധുനിക സ്മാർട്ട്ഫോണുകളിലും ഉള്ള ആക്സിലറോമീറ്ററാണ് ഭൂചലനം മുൻകൂട്ടി അറിയുന്നത്. ഫോൺ ലാൻഡ്സ്കേപ്പ് മോഡിൽ പിടിക്കുമ്പോൾ സ്ക്രീൻ ഓട്ടോമാറ്റിക്കായി തിരിക്കുന്ന സെൻസറാണ് ആക്‌സിലറോമീറ്റർ. എന്നാൽ ഇതിന് മറ്റൊരു ഉപയോഗം കൂടിയുണ്ട്. പ്രകമ്പനങ്ങൾ കണ്ടെത്താനും അളക്കാനും അതിന് കഴിയും.

സ്മാർട്ട്ഫോൺ ശക്തമായ പ്രകമ്പനങ്ങൾ കണ്ടെത്തുമ്പോൾ അത് ഗൂഗിളിന്റെ ആൻഡ്രോയിഡ് എർത്ത്ക്വേക്ക് അലേർട്ട് സിസ്റ്റത്തിലേക്ക് ഒരു സിഗ്നൽ അയയ്ക്കുന്നു. അതോടൊപ്പം ഏകദേശ ലൊക്കേഷനും അയയ്ക്കുന്നു. തുടർന്ന് ഗൂഗിളിന്റെ സെർവറുകൾ ധാരാളം ഫോണുകളിൽ നിന്നുള്ള വിവരങ്ങൾ ശേഖരിച്ച് ഭൂകമ്പ സാധ്യത കണ്ടെത്തുന്നു.

ആൻഡ്രോയിഡ് ഫോണുകളും സീസ്മിക് സെൻസറുകളും ഉപയോഗിക്കുന്ന ഈ സാങ്കേതികവിദ്യ ഭൂകമ്പം ഉണ്ടാകുന്നതിന് മുമ്പ് മണിക്കൂറുകളോ ദിവസങ്ങളോ മുന്നറിയിപ്പ് നൽകുന്നില്ല. പകരം, ഏതാനും സെക്കൻഡുകൾ മുതൽ ചില പത്ത് സെക്കൻഡുകൾ വരെ മുൻകൂട്ടി സുരക്ഷാ മുന്നറിയിപ്പ് നൽകാൻ കഴിയുന്ന സംവിധാനമാണിത്. അടിയന്തര സാഹചര്യങ്ങളിൽ ഈ ചെറിയ സമയവ്യത്യാസം പോലും ജീവൻ രക്ഷിക്കാൻ നിർണായകമാകുമെന്നാണ് വിലയിരുത്തൽ.