2024 ൽ രാഹുൽ ഗാന്ധി സർക്കാർ അധികാരത്തിൽ വരും: ചെന്നിത്തല
രാജ്യത്തെ പൊതു മേഖലാ സ്ഥാപനങ്ങളെല്ലാം വിറ്റുതുലച്ച നരേന്ദ്ര മോദി സർക്കാർ പാവപ്പെട്ട ഉദ്യോഗാർഥികളു‌ടെ തൊഴിലവസരങ്ങൾ അട്ടിമറിച്ചതായി ഗുജറാത്തിലെ എഐസിസി തെരഞ്ഞെടുപ്പ് നീരീക്ഷകൻ രമേശ് ചെന്നിത്തല. രാജ്യത്തെ സാധാരണക്കാരായ മുഴുവൻ ജനങ്ങളും നിരാശയിലും ദുഃഖത്തിലുമാണ്. വിലക്കയറ്റം കൊണ്ട് ജനങ്ങൾ പൊറുതി മുട്ടി. കഴിഞ്ഞ എട്ടു വർഷമായി അധികാരത്തിലിരിക്കുന്ന നരേന്ദ്ര മോദി സർക്കാർ സമസ്ത മേഖലകളിലും പരാജയമാണെന്നു ചെന്നിത്തല കുറ്റപ്പെടുത്തി.
മോദി ഭരണത്തിന്റെ വീഴ്ചകൾ ജനങ്ങൾ തിരിച്ചറിയുന്നുണ്ട്. 2024 ലെ തെരഞ്ഞെടുപ്പിൽ മോദി സർക്കാരിനെ ജനം തൂത്തെറിയും. മോദിക്ക് ഒരു ബദൽ ജനങ്ങൾ ആഗ്രഹിക്കുന്നു. 2024ലെ ദേശീയ തെരഞ്ഞെടുപ്പിൽ രാഹുൽ ഗാന്ധി നയിക്കുന്ന കോൺഗ്രസ് സർക്കാർ അധികാരത്തിൽ വരും. അതിന്റെ മുന്നൊരുക്കമാണ് ഗുജറാത്തിലെ നിയമ സഭാ തെരഞ്ഞെടുപ്പെന്നും രമേശ് ചെന്നിത്തല പറഞ്ഞു.
ഗുജറാത്തിലെ വിവിധ നിയമസഭാ നിയോജക മണ്ഡലങ്ങളിലെ തെരഞ്ഞെടുപ്പ് പ്രചാരണ യോഗങ്ങളിൽ പ്രസംഗിക്കുകയായിരുന്നു ചെന്നിത്തല. വാമൻവാദ, കേശോദ് തുടങ്ങിയ നിയോജക മണ്ഡലങ്ങളിലെ സ്ഥാനാർഥികൾക്കു വേണ്ടി ചെന്നിത്തല പ്രചാരണം നടത്തി. തമിഴ്നാട്ടിൽ നിന്നുള്ള എഐസിസി ജനറൽ സെക്രട്ടറിയും ചെന്നിത്തലയ്ക്കൊപ്പമുണ്ടായിരുന്നു.
