പ്രേം കുമാർ മുതൽ ജി. വേണുഗോപാൽ വരെ; സാംസ്‌കാരിക സ്ഥാപനങ്ങളിൽ പുതിയ നേതൃത്വം

തിരുവനന്തപുരം: കേരള സംസ്ഥാന ചലച്ചിത്ര വികസന കോർപ്പറേഷന്റെ പുതിയ ചെയർമാനായി പ്രശസ്ത നടനും ചലച്ചിത്ര അക്കാദമി മുൻ വൈസ് ചെയർമാനുമായ പ്രേം കുമാറിനെ തിരഞ്ഞെടുത്തു. സംവിധായകൻ ആലപ്പി അഷ്‌റഫിനെയാണ് വൈസ് ചെയർമാനായി നിയമിച്ചത്. കേരള സംഗീത നാടക അക്കാദമിയുടെ ചെയർമാനായി പ്രശസ്ത പിന്നണി ഗായകൻ ജി. വേണുഗോപാലിനെയും തിരഞ്ഞെടുത്തു. ഹേമന്ത് കുമാർ വൈസ് ചെയർമാനായും പ്രദീപ് കുമാർ എൻ.വി. സെക്രട്ടറിയായും ചുമതലയേൽക്കും.കേരള ഫോക്‌ലോർ അക്കാദമിയുടെ നേതൃത്വത്തിലും മാറ്റമുണ്ട്. സുരേഷ് ബാബു എളയാവൂരാണ് പുതിയ ചെയർമാൻ. ശ്രീരാമൻ കൊയ്യോൻ വൈസ് ചെയർമാനായും പ്രദീപ് കുമാർ എം. പയ്യന്നൂർ മെമ്പർ സെക്രട്ടറിയായും ചുമതലയേൽക്കും. സാംസ്‌കാരിക പ്രവർത്തക ക്ഷേമനിധി ബോർഡിന്റെ പുതിയ ചെയർമാനായി ചലച്ചിത്ര നിർമാതാവും സംഘാടകനുമായ എം. രഞ്ജിത്തിനെയും നിയമിച്ചു.

കേരള സാഹിത്യ അക്കാദമി ചെയർമാനായി പ്രഭാഷകനും എഴുത്തുകാരനുമായ കൽപ്പറ്റ നാരായണനും സെക്രട്ടറിയായി എം. പി. സുരേന്ദ്രനും ചുമതലയേറ്റു.നേരത്തെ കേരള സംസ്ഥാന ചലച്ചിത്ര അക്കാദമിയുടെ ചെയർമാനായി നടനും ഫിലിം ഫെസ്റ്റിവൽ ക്യൂറേറ്ററുമായ രവീന്ദ്രനെ നിയമിച്ചിരുന്നു. നടി പ്രിയങ്ക നായർ വൈസ് ചെയർപേഴ്‌സണായും ചുമതലയേറ്റു. നടൻ സലിം ഹസ്സനും സംവിധായകൻ ജോഫിൻ ടി. ചാക്കോയും എക്‌സിക്യൂട്ടീവ് കമ്മിറ്റി അംഗങ്ങളാണ്.

ഇതോടെ സംസ്ഥാനത്തെ പ്രധാന സാംസ്‌കാരിക സ്ഥാപനങ്ങളിലെ പുതിയ ഭരണസമിതികൾക്ക് രൂപമായി. സിനിമ, സാഹിത്യം, സംഗീതം, നാടകം, ഫോക്‌ലോർ തുടങ്ങിയ വിവിധ മേഖലകളിൽ നിന്നുള്ള പ്രമുഖരുടെ നേതൃത്വത്തിലുള്ള പുതിയ സമിതികൾ സാംസ്‌കാരിക സ്ഥാപനങ്ങളുടെ പ്രവർത്തനങ്ങൾക്ക് പുതിയ ദിശ നൽകുമെന്നാണ് പ്രതീക്ഷിക്കുന്നത്.